Usarenyo ti Bokleta nga Introduksion iti Sao ti Dios a Mangirugi iti Saritaan
1. Ania ti naawattayo a baro nga alikamen a makatulong iti ministerio?
1 Nairuar iti 2014 a Rehional a Kombension ti bokleta a napauluan iti Introduksion iti Sao ti Dios. Kasanotay a mausar daytoy nga alikamen no agsaganatayo kadagiti presentasion iti ministerio? Gapu ta napagtitipon dagiti teksto sigun kadagiti topiko ti Biblia, kas iti pannakaurnos ti libro a Pannakirinnason, dakkel ti maitulongna dayta iti panangirugi iti saritaan.
2. Ania ti maysa a pamay-an ti panangusartayo iti bokleta nga Introduksion iti Sao ti Dios iti ministerio?
2 No usarem ti saludsod 8, mabalinmo nga ibaga: “Bumisbisitakami iti apagbiit ditoy lugaryo ta adu ti mangpampanunot no ‘Ti kadi Dios ti mapabasol iti panagsagaba dagiti tattao?’ [Iti dadduma a teritoria, mas epektibo no ipakita ti saludsod iti bumalay.] Ania ti makunayo? [Palubosam a sumungbat.] Adda nagsayaat a sungbat ti Biblia iti dayta a saludsod.” Basaem a mismo iti Biblia ti maysa wenno ad-adu pay kadagiti nadakamat a teksto sa pagsaritaanyo dayta. No interesado ti bumalay, ipakitam kenkuana ti 20 a saludsod iti umuna a panid ken pagpiliem no ania ti kayatna a pagsaritaanyo inton sumaganad. Wenno mabalinmo nga itukon ti maysa kadagiti publikasion a maus-usar iti panagadal a naglaon iti ad-adu nga impormasion a mainaig iti nagsaritaanyo.
3. Ania ti maysa a pamay-an ti panangusartayo iti bokleta nga Introduksion iti Sao ti Dios a mangirugi iti saritaan kadagiti teritoria a saan a Kristiano ti relihion dagiti lumugar?
3 Mabalin a mas epektibo dagiti saludsod 4 ken 13 agingga iti 17 kadagiti teritoria a saan a Kristiano ti relihion dagiti lumugar. Kas pagarigan, no usarem ti impormasion iti saludsod 17, mabalinmo nga ibaga: “Bumisbisitakami iti apagbiit ta adda kayatmi nga iranud kadagiti pamilia. Umanamongkayo kadi nga adu a problema ti pakaipaspasanguan ita dagiti pamilia? [Palubosam a sumungbat.] Nakita ti adu nga agassawa a makatulong dagiti sasao a, “Ti babai rebbeng nga addaan iti nauneg a panagraem iti asawana.” [Dimo kasapulan nga ibaga a naggapu dayta iti Efeso 5:33. No babai ti makasaritam, mabalinmo nga ibaga ti sasao iti Efeso 5:28.] Iti panagkunayo, pagimbagan ngata ti agassawa no iyaplikarda dayta a balakad?”
4. Ania ti mabalinyo nga aramiden iti ngudo ti saritaanyo iti saan a Kristiano ti relihionna?
4 Iti ngudo ti saritaanyo, iyurnosmo ti panagsublim tapno maituloyyonto ti panagsaritayo. Mabalinmo nga iyurnos a pagsaritaanyonto ti sabali pay a teksto a nadakamat iti baba ti saludsod. Iti maitutop a gundaway, ibagam a naggapu iti Biblia dagiti iranranudmo a praktikal a balakad. Maibasar kadagiti napalabas a saritaanyo ken iti panangmatmatna iti Biblia, ikkam iti publikasion a namnamaem a paginteresanna.—Kitaenyo ti suplemento iti Disiembre 2013 a Ti Ministeriotayo iti Pagarian.