Sumarungkarkayo a Dagus

Manipud idi mabalinen nga usaren ti napabaro a disenio ti Web site-tayo, dakkel ti immaduan dagiti agkidkiddaw iti panangyadal iti Biblia iti Web site-tayo. Dagiti kanayonan a panagkiddaw ket maigapu iti baro a pamay-an ti panangasaba iti publiko. Maas-asikaso a dagus dagitoy iti sanga nga opisina. Kas pagarigan, no ti kiddaw ket naaramid iti jw.org, dagiti panglakayen a makinteritoria iti lugar a pagnanaedan ti interesado a tao ket masansan a pakaammuan ti sanga nga opisina kalpasan ti dua nga aldaw laeng. Nupay kasta, ipakita dagiti report a ti dadduma a nagkiddaw iti panangyadal iti Biblia ket saan a nasarungkaran uray naglabasen ti sumagmamano a lawas. Kasanotayo a masigurado a matulongan ti interesado a tao sakbay a bumaaw ti interesna?—Mar. 4:14, 15.

No ti interesado a tao ket saan nga agnanaed iti teritoriayo, suratanyo a dagus ti porma a Please Follow Up (S-43) sa itedyo iti sekretario ti kongregasionyo iti sumaganad a gimongyo. Iti uneg ti maysa wenno dua nga aldaw, ited ti sekretario ti impormasion iti maitutop a kongregasion wenno ipatulodna iti sanga nga opisina babaen ti panangusarna iti tab a “Congregation” iti jw.org. Masapul a regular a kitaen dagiti panglakayen ti Web site. No mapakaammuanda nga adda masapul a sarungkaranda, dagus koma nga aramidenda dayta. Ti agibumbunannag a madutokan a mangsarungkar masapul nga iyun-unana nga aramiden dayta. No saanyo a madanon iti pagtaenganna, nalabit mangibatikayo iti surat a nakaikabilan ti numero ti teleponoyo wenno ti adresyo.