Dikay Padaeg iti Danag

“DIKAY pulos maringgoran maipapan iti sumaganad nga aldaw, ta ti sumaganad nga aldaw addaanto iti bukodna a pakaringgoran. Umdasen iti tunggal aldaw ti bukodna a kinadakes.” (Mateo 6:34) Kadagitoy nga aldaw, nalawag a praktikal dayta a balakad ni Jesu-Kristo para kadatayo amin nga agbibiag iti naapura ken nariribuk a kagimongan.

Ngem iti kinapudnona, posible aya a ditay maringgoran kadagiti problema, desision, obligasion, ken rebbengentayo? Minilion a tattao ti madukotan, mariribukan, ken madagsenan. Dayta ti gapuna a maysa a multimilion-doliar a negosio dagiti agas a pagpakalma ken pagpaturog.

Panangikeddeng iti Pagbeddengan

Nasken nga agplano ken saganaantayo dagiti obligasion, annongen, desision, ken problematayo​—naganat man dagitoy wenno saan. Idagadag ti Biblia nga ‘agtugaw ket pattapattaentayo ti magastos’ sakbay nga irugitayo ti aniaman a napateg a gannuat. (Lucas 14:28-30) Ramanen daytoy ti panangtingiting kadagiti adda a pagpilian, panangamiris kadagiti posible nga epekto ti pagbanagan dagiti bambanag, ken panangpattapatta iti mabusbos a panawen, pigsa, ken kuarta.

Nupay nasken nga usigen a naimbag ti mabalin a mapasamak, imposible wenno saan a nasayaat a panunoten ti amin a posible a mapasamak. Kas pagarigan, agpaay iti kinatalged ti pamiliayo, mabalinyo a panunoten no ania ti aramidenyo no bilang ta adda uram iti pagtaenganyo. Mabalinyo ti gumatang ken mangikabil kadagiti smoke detector ken pagpatay iti apuy. Mabalinyo a planuen ken ensaywen dagiti pagruaran iti nadumaduma a paset ti balayyo. Ngem kaano nga agpatingga ti nainkalintegan, praktikal a panagplano ken kaano a mangrugi ti aglablabes, di nainkalintegan a panagdanag? Mangrugi ti kasta a panagdanag no matutuokkayo iti nakaad-adu a situasion a mapanunotyo, nga adu kadagitoy ti nalabit bunga ti naalikuteg nga imahinasionyo. Nalabit mariribukankayo, nga ipagarupyo nga adda la ketdi naliwayanyo wenno saan nga umdas ti inaramidyo tapno masalakniban ti pamiliayo. Mabalin a buriborennakayo ti panunotyo met laeng nga uray la dikay makaturog.

Ni Moises iti Saklang ni Faraon

Narigat ti annongen nga inted ni Jehova a Dios ken Moises a propetana. Umuna, nasken a dumatag ni Moises kadagiti Israelita ket kombinsirenna ida nga isu ti dinutokan ni Jehova a mangiruar kadakuada idiay Egipto. Kalpasanna, nasken a dumatag ni Moises ken Faraon ket idawatna a palubosanna dagiti Israelita. Kamaudiananna, idauluan ni Moises ti minilion a tattao iti let-ang agingga a makastrekda iti daga a pagnanaedan dagiti naranggas a tattao. (Exodo 3:1-10) No anagen, makapadanag unay koma amin daytoy, ngem nariribukan unay aya ni Moises a mangpampanunot iti daytoy a rebbengen?

Nabatad nga adda dagiti banag a pakaseknan idi ni Moises. Insaludsodna ken Jehova: “No dumtengak kadagiti annak ti Israel, ket kunakto kadakuada, Ti Dios dagiti ammayo imbaonnak kadakayo, ket no isuda ta saludsodenda kaniak, Asino ti naganna? Ania ti isungbatko kadakuada?” Inted ni Jehova ti sungbat kenkuana. (Exodo 3:13,14) Pakaseknan met idi ni Moises ti posible a mapasamak no saan a mamati kenkuana ni Faraon. Sinungbatan manen ni Jehova ti propeta. Adda maysa pay a maudi a parikut​—inannugot ni Moises nga isu ket ‘saan a tao a sumasao.’ Kasano a mairemedio daytoy? Impaay ni Jehova ni Aaron a pannakangiwat ni Moises.​—Exodo 4:1-5, 10-16.

Tangay ammonan ti sungbat dagiti saludsodna ken adda pammatina iti Dios, inaramid ni Moises ti imbilin ni Jehova. Imbes a buriborenna ti panunotna ken agamak iti posible a mapasamak no dumatag ken Faraon, “kasta ti inaramid” ni Moises. (Exodo 7:6) No nalapunos iti danag, nalabit kimmapuy ti pammatina ken naawanan iti tured a kasapulan tapno maaramidna ti annongenna.

Ti natimbeng a panangtaming ni Moises iti annongenna ket maysa nga ehemplo ti inawagan ni apostol Pablo a “kinasimbeng ti panunot.” (2 Timoteo 1:7; Tito 2:2-6) No saan a nasimbeng ti panagpampanunot ni Moises, mabalin a nalaka laeng koma a malapunos iti kinadagsen ti annongenna ket nalabit dina inawat dayta.

Panangkontrol iti Panunotyo

Ania ti reaksionyo no maipasangokayo kadagiti pakasuotan ti pammatiyo wenno pannubok iti inaldaw a panagbiagyo? Agannayaskay kadi nga aglagaw, nga awan sabali a pampanunotenyo no di laeng dagiti sumangbay a tubeng ken karit? Wenno natimbeng kadi ti panangmatmatyo kadagitoy? Kas ’tay kunadan, ‘Saanmo a ballasiwen ti rangtay no awanka pay sadiay.’ Nalabit saan pay ketdi a kasapulan a ballasiwenyo dayta a rangtay a parnuay ti panunot! Isu nga apay koma a madukotankayo iti banag a nalabit saan a pulos mapasamak? Kuna ti Biblia: “Ti bantot ti puso ti maysa a tao mamagdumog kenkuana.” (Proverbio 12:25) Ti masansan a resultana, itantanna ti agdesision, nga itungtungkuana dagiti bambanag agingga a naladawen ti amin.

Nakarkaro pay ti naespirituan a pannakadangran a mabalin nga ibunga ti nalabes a panagdanag. Impakita ni Jesu-Kristo a mabalin a malapdan a naan-anay ti idadakkel ti panangipateg iti “sao ti pagarian” gapu iti makaallilaw a pannakabalin ti kinabaknang ken “ti pakaringgoran daytoy a sistema ti bambanag.” (Mateo 13:19,22) No kasano a malapdan dagiti siit ti panagdakkel ken panagbunga dagiti mula, kasta met a ti di mamedmedan a panagdanag mabalin a lapdanna ti naespirituan nga irarang-aytayo ken ti panangpataudtayo kadagiti bunga a pakaidayawan ti Dios. Ti makadadael a panagdanag a bunga ti panunotda met laeng ti makagapu a bumdeng dagiti dadduma a mangidedikar iti biagda ken Jehova. Sidadanag a kunada, ‘Kasanon no diak matungpal ti dedikasionko?’

Kinuna ni apostol Pablo nga iti naespirituan a pannakidangadangtayo, ikagkagumaantayo a ‘kayawan ti tunggal panunot tapno pagbalinen a natulnog ken Kristo.’ (2 Corinto 10:5) Maragsakan la ketdi ti kangrunaan a kabusortayo, ni Satanas a Diablo, a manggundaway kadagiti pakaringgorantayo tapno maupay ken kumapsuttayo iti pisikal, emosional, ken naespirituan. Eksperto ni Satanas a mangusar iti panagduadua tapno matnag iti palab-ogna dagiti saan a naridam. Dayta ti gapuna a binallaagan met ni Pablo dagiti Kristiano a saanda nga “ilugaran ti Diablo.” (Efeso 4:27) Kas “dios daytoy a sistema ti bambanag,” sibaballigi a ‘binulsek [ni Satanas] ti pampanunot dagiti di manamati.’ (2 Corinto 4:4) Sapay koma ta pulos a ditay ipalubos a kontrolenna ti panunottayo!

Magun-odan ti Tulong

No adda problemana, mabalin ti maysa nga ubing ti umasideg iti naayat nga amana a mamagbaga ken mangliwliwa kenkuana. Mabalintay met nga iyamang dagiti parikuttayo iti nailangitan nga Amatayo, ni Jehova. Kinapudnona, iyaw-awis ni Jehova nga iyallatiwtayo kenkuana dagiti dagensen ken pakaringgorantayo. (Salmo 55:22) Kas iti maysa nga ubing a saanen a madukotan kadagiti parikutna kalpasan a maliwliwa ni tatangna, saantay laeng nga iyallatiw ken Jehova dagiti dagensentayo no di pay ket ipabiangtayo dagitoy kenkuana.​—Santiago 1:6.

Kasanotay nga iyallatiw ken Jehova dagiti pakaringgorantayo? Sumungbat ti Filipos 4:6,7: “Dikay maringgoran iti aniaman, no di ket iti amin a banag babaen ti kararag ken araraw agraman panagyaman maipakaammo koma dagiti dawdawatyo iti Dios; ket ti talna ti Dios a mangringbaw iti amin a panunot aywanannanto dagiti pusoyo ken dagiti pannakabalin ti isipyo babaen ken Kristo Jesus.” Wen, kas sungbat iti naynay a panagkarkararag ken panagar-ararawtayo, mapagkalma ni Jehova ti panunottayo tapno saantay a mariribukan kadagiti di nasken a pakaringgoran.​—Jeremias 17:7,8; Mateo 6:25-34.

Ngem, tapno makapagtignaytayo a maitunos kadagiti kararagtayo, ditay koma isinsina ti bagbagitayo iti pisikal man wenno mental. (Proverbio 18:1) Imbes ketdi, nasayaat no utobentayo dagiti prinsipio ken balakad ti Biblia a mainaig iti parikuttayo, iti kasta saantay nga agpannuray iti bukodtayo a pannakaawat. (Proverbio 3:5,6) Dagiti agtutubo ken nataengan mabalinda ti agkonsulta iti Biblia ken kadagiti publikasion ti Watch Tower ta naglaon dagitoy iti nabaknang nga impormasion maipapan iti panagdesision ken panangtaming kadagiti parikut. Maysa pay, iti kongregasion Kristiano, naparaburantayo kadagiti masirib ken aduan kapadasan a panglakayen ken dadduma pay a natataengan a Kristiano a kanayon a madadaan a makisarita kadatayo. (Proverbio 11:14; 15:22) Dagidiay awan pakaikalamiatanda iti parikuttayo ken kas iti Dios ti panangmatmatda iti maysa a banag masansan a matulongandatayo a mangusig kadagiti parikuttayo iti sabali a panirigan. Ket nupay saandatayo nga idesisionan, mabalin a gubuayan ida ti dakkel a pammaregta ken pannaranay.

“Manginanamaka iti Dios”

Di mailibak nga umdasen a pakasikorantayo ti panangtaming kadagiti napaypayso a problematayo iti inaldaw ket ditay koman nayonan pay dagitoy babaen ti pannakaringgor kadagiti parikut nga adda laeng iti panunottayo. No maamak ken mariribukantayo iti posible a mapasamak, agkararag ken umararawtayo ken Jehova. Agpannuraytayo iti Sao ken iti organisasionna maipaay iti pannarabay, sirib, ken kinasimbeng ti panunot. Matakuatantayto nga uray ania a kasasaad ti tumaud, adda magun-odan a tulong iti panangsango iti dayta.

Idi madukotan ken mariribukan, inkanta ti salmista: “Apay a mapasagka man, O kararuak? Apay a maringgoranka man iti unegko? Manginanamaka iti Dios; ta idaydayawkonto pay, isu a tulong ti langak, ken Diosko.” (Salmo 42:11) Kasta met koma ti kaririknatayo.

Wen, saganaanyo ti nainkalintegan a namnamaenyo a mapasamak, ket ipabiangyo ken Jehova dagiti di ninamnama. “Iyallatiwyo kenkuana amin a pakaringgoranyo, agsipud ta isu maseknan kadakayo.”​—1 Pedro 5:7

[Ladawan iti panid 23].

Kas ken David, iyal-allatiwyo kadi ken Jehova dagiti dagensen ken pakaringgoranyo?