Dagiti Ilustrasion a Naadaw Kadagiti Gagangay a Kasasaad

SIEMPRE, nasken a mayataday iti material a salsalaysayem ti aniaman nga ilustrasion nga usarem. Ngem tapno ad-adda nga epektibo, nasken a mayataday met dagita kadagiti agdengdengngeg.

Kasano a ti panangpilim kadagiti ilustrasion nga usarem iti palawagmo iti maysa a grupo ket mabalin nga agpannuray iti no siasino dagiti agdengngeg? Ania ti inaramid idi ni Jesu-Kristo? Iti panagpalawag ni Jesus kadagiti man umariwekwek a tattao wenno kadagiti adalanna, saan a nagusar kadagiti ehemplo a naadaw kadagiti kasasaad ti biag iti ruar ti Israel. Saan a pamiliar kadagiti agdengdengngeg kenkuana dagiti kasta nga ehemplo. Kas pagarigan, awan ti dinakamat ni Jesus maipapan iti kasasaad ti biag iti palasio ti Egipto wenno dagiti narelihiosuan a kaugalian ti India. Nupay kasta, naadaw dagiti ilustrasionna kadagiti aktibidad a kadawyan kadagiti tattao iti amin a pagilian. Nadakamatna ti maipapan iti panangtakup kadagiti kawes, panagnegosio, pannakapukaw ti banag a napateg, ken pannakiboda. Maawatanna ti reaksion dagiti tattao iti nadumaduma a sirkumstansia, ket inusarna daytoy a pannakaammo. (Mar. 2:21; Luc. 14:7-11; 15:8, 9; 19:15-23) Tangay dagiti umili ti Israel ti kangrunaan a kinaskasabaan ni Jesus, dagiti banag ken aktibidad a paset ti inaldaw a panagbiagda ti kaaduan a nangadawanna kadagiti ilustrasionna. Gapuna, dinakamatna dagiti banag a kas iti panagtalon, kinatulnog dagiti karnero iti pastorda, ken panangusar kadagiti lalat a pangikargaan iti arak. (Mar. 2:22; 4:2-9; Juan 10:1-5) Dinakamatna met dagiti historikal a pasamak a pagaammoda​—ti pannakaparsua ti immuna a pagassawaan, ti Layus idi kaaldawan ni Noe, ti pannakadadael ti Sodoma ken Gomorra, ti pannakatay ti asawa ni Lot, ken dadduma pay. (Mat. 10:15; 19:4-6; 24:37-39; Luc. 17:32) Iti panangpilim kadagiti ilustrasion nga usarem, ikonkonsiderarmo met kadi a naimbag dagiti aktibidad a kadawyan kadagiti agdengdengngeg kenka ken ti kultura a nabangonanda?

No ngay maymaysa wenno nalabit sumagmamano laeng ti kasarsaritam, imbes a dakkel a grupo? Mangpilika iti ilustrasion a maitutop kadakuada. Idi kinasabaan ni Jesus ti maysa a Samaritana iti abay ti bubon iti asideg ti Sicar, dinakamatna ti maipapan iti “nabiag a danum,” ‘saanton a pulos a pannakawaw,’ ken “ubbog ti danum nga agburburayok a mangipaay iti agnanayon a biag”​—a bin-ig a piguratibo a sasao a direkta a nainaig iti ar-aramiden daydi a babai. (Juan 4:7-15) Ket idi kinasaritana dagiti lallaki a mangug-ugas kadagiti iketda, nainaig iti panagkalap ti pangngarig nga inusarna. (Luc. 5:2-11) Kadagita a kasasaad, mabalinna koma a dakamaten ti panagtalon, tangay agrikultura ti pagbibiagan dagiti tattao sadiay, ngem anian a mas epektibo ti panangtukoyna iti personal a trabahoda ta dayta ti namagbalin iti puntona a nalawag iti panunotda! Ikagkagumaam kadi nga aramiden ti kasta?

Inturong ni Jesus ti atensionna “kadagiti napukaw a karnero iti balay ti Israel,” ngem ni apostol Pablo ket naibaon saan laeng nga iti Israel no di pay ket kadagiti Gentil a nasion. (Mat. 15:24; Ara. 9:15) Adda kadi nakaidumaan ti panagsao ni Pablo? Adda. Idi sinuratanna dagiti Kristiano idiay Corinto, dinakamatna ti maipapan kadagiti lumba, ti ugali a pannangan iti uneg dagiti templo ti didiosen, ken dagiti parada ti panagballigi a pamiliar kadagidiay a Gentil.​—1 Cor. 8:1-10; 9:24, 25; 2 Cor. 2:14-16.

Kas met kadi kada Jesus ken Pablo ti kaannad ti panagpilim kadagiti ilustrasion ken ehemplo nga us-usarem iti panangisurom? Ikonkonsiderarmo kadi ti kasasaad ken ti inaldaw nga aktibidad dagiti agdengdengngeg kenka? Siempre, adun ti nagbaliwan ti lubong manipud idi umuna a siglo. Adu ti makadamdamag iti telebision kadagiti mapaspasamak iti sangalubongan. Masansan nga ammoda dagiti kasasaad kadagiti sabali a pagilian. No pudno dayta iti lugaryo, saan a dakes nga agadawka kadagiti kasta a damag nga usarem kas ilustrasion. Nupay kasta, dagiti banag nga ad-adda a makaallukoy kadagiti tattao ket dagidiay mainaig iti personal a panagbiagda​—ti pagtaenganda, pamiliada, trabahoda, taraon a kankanenda, paniempo iti lugarda.

No kasapulan nga ilawlawagmo a naimbag ti ilustrasionmo, mabalin a saan a pamiliar kadagiti agdengdengngeg ti ibagbagam. Ti kasta nga ilustrasion nalakana a gaburan ti puntom. Pagbanaganna, matandaanan dagiti agdengdengngeg ti ilustrasionmo ngem saan a ti Nainkasuratan a kinapudno a kayatmo nga iyallatiw.

Imbes a nagaramat kadagiti komplikado a pangngarig, nagusar ni Jesus kadagiti simple ken inaldaw a kasasaad. Inusarna dagiti babassit a banag tapno mailawlawagna dagiti dadakkel a banag ken dagiti banag a nalaka a matarusan tapno mailawlawagna dagiti banag a narigat a maawatan. Babaen ti panangipakitana no kasano a nainaig dagiti inaldaw a pasamak kadagiti naespirituan a kinapudno, tinulongan ni Jesus dagiti tattao tapno nalaklakada a maawatan dagiti naespirituan a kinapudno nga isursurona ken matandaananda dagitoy. Anian a nagsayaat nga ulidan a tuladen!