Isuro ti Kinapudno

Mangrugi inton Septiembre, adda mainayon a baro a pagtuladan a presentasion iti Workbook iti Gimong a Panagbiag ken Ministerio a napauluan iti “Isuro ti Kinapudno.” Tulongannatayo daytoy a mangitampok iti maysa a kangrunaan a kinapudno iti Biblia babaen ti panangusar iti maysa a saludsod ken teksto.

No madlawtayo nga interesado ti kaskasabaantayo, mabalintayo a paggagaren iti sumaruno a panagsarungkar babaen iti panangibati iti publikasion wenno babaen iti panangipabuya iti maysa a video iti jw.org. Ikagumaantayo koma ti agsubli kalpasan ti sumagmamano nga aldaw tapno maituloy ti napagsaritaan. Dagiti baro a presentasion ken dagiti paset ti estudiante ket maibatay kadagiti topiko iti libro nga Isursuro ti Biblia. Makatulong dagiti kanayonan a teksto iti repaso ti kapitulo dayta a libro iti panangyadal iti Biblia wenno panagsarungkar, a Biblia laeng ti mausar.

Maymaysa laeng ti dalan nga agturong iti biag. (Mt 7:13, 14) Gapu ta nagduduma ti relihion ken kasasaad dagiti tattao a makasarsaritatayo, dagiti topiko iti Biblia a makapainteres iti tunggal indibidual ti masapul nga ilawlawagtayo kadakuada. (1Ti 2:4) No mas pamiliartayo iti nagduduma a topiko iti Biblia ken mapasayaattayo ti abilidadtayo a ‘mangaramat a siuumiso iti sao ti kinapudno,’ naragragsaktayo, ken agballigitayo a mangisuro iti kinapudno iti sabsabali.—2Ti 2:15.