ADALEN 7

Umiso ken Makakombinsir

Lucas 1:3

SUMARIO: Agusar kadagiti mapagtalkan nga ebidensia tapno matulongam dagiti agdengdengngeg a makaaramid iti umiso a konklusion.

Agkonsultaka kadagiti mapagtalkan a reperensia. Ibataymo ti ibagam iti Sao ti Dios, a direkta a basaem dayta no posible. No adda dakamatem maipapan iti siensia, news report, kapadasan, wenno dadduma pay a mangsuporta nga ebidensia, siguraduem a mapagtalkan ken kabaruan ti reperensiam.
Usarem dagiti reperensia iti umiso a pamay-an. Ilawlawagmo dagiti teksto maitunos iti kontekstoda, iti intero a mensahe ti Biblia, ken kadagiti publikasion ti “matalek ken masirib nga adipen.” (Mat. 24:45) Usarem dagiti sekular a reperensia maitunos iti orihinal a kontekstoda ken iti kayat a sawen ti nagsurat.

Dimo nayonan wenno sobraan dagiti detalye ken bilang. Agannadka tapno ti “dadduma a tattao” ket saanmo a maibaga a “kaaduan a tattao,” ti “no dadduma” ket saan nga agbalin a “kanayon,” ken ti “posible” ket saan nga agbalin a “nalabit.”
Agrasonka maibatay iti ebidensia. Kalpasan a binasam ti maysa a teksto wenno kinotarmo ti maysa a reperensia, agusarka kadagiti nataktika a saludsod wenno iyilustrarmo ti punto tapno matulongam dagiti agdengdengngeg a mangaramid iti bukodda a konklusion.