ADALEN 2

Agsao iti Natural a Pamay-an

2 Corinto 2:17

SUMARIO: Agsao iti natural a pamay-an ken naimpusuan tapno maipakitam no ania ti riknam iti topiko ken kadagiti agdengdengngeg.

Agkararag ken agsaganaka a naimbag. Ikararagmo a makapokuska iti mensahem, saan nga iti bagim. Nalawag koma iti isipmo dagiti kangrunaan a punto nga ibagam. Ibagam ti pampanunotem iti bukodmo a sasao; saanmo a basta ikabesa ti nayimprenta a sasao.

No planom nga ibasa ti Biblia wenno ti sabali a publikasion, ammuem a naimbag ti linaonna tapno naannayas ti panagbasam. No nakotar ti imbaga dagiti tattao, basaem ti sasaoda nga addaan rikna, ngem saanmo koma a sobraan.
Agsaoka a naimpusuan. Panunotem no apay a masapul a mangngeg dagiti agdengdengngeg ti mensahe. Agpokuska kadakuada. Iti kasta, ipakitanto ti postura, panagkompas, ken ekspresion ti rupam a napasnek ken interesadoka kadakuada.

Natural koma ti panagsaom ngem desente latta a denggen. Pagtalinaedem ti dignidad ti mensahem babaen ti panagusarmo iti nalawag a sasao ken umiso a gramatika.
Kumitaka kadagiti agdengdengngeg. Kanayon a kitaem ida no maitutop dayta. No agpalpalawagka, agpokuska iti maysa a tao tunggal kumitaka, imbes a kumitaka wenno iwarasmo laeng ti panagkitam iti intero a grupo.