Gimong ti Kongregasion Babaen ti Videoconference

Adu a gobierno iti intero a lubong ti nangipatungpal iti physical distancing ken nangiparit kadagiti dadakkel a panagtataripnong. Determinado dagiti Saksi ni Jehova a sumurot kadagitoy a paglintegan ngem itultuloyda latta ti natalged a panagtataripnongda. Gapuna, us-usaren dagiti kongregasion dagiti videoconferencing app, kas iti Zoom, tapno makapaggigimongda.

Tapno regular dagiti panaggigimong, inaprobaran ti Bagi a Manarawidwid a mausar dagiti naidonar a pondo a paggatang kadagiti Zoom account para kadagiti kongregasion. Dakkel ti naitulong daytoy iti dadduma a kongregasion a saan a makakaya iti $15-$20 wenno nangatngato pay, a gagangay a bayad ti videoconference account. Dagitoy a kongregasion ket kaaduanna nga agus-usar idi kadagiti libre nga app a bassit laeng ti makakonek ken saan unay a natalged. Ngem ita, amin a kongregasion a mangus-usar kadagitoy a Zoom account ti organisasion nalakadan a makontrol ti security setting ken ad-adun a tattao ti makakonek kadagiti gimong. Iti agdama, nasuroken a 65,000 a kongregasion iti nasurok a 170 a pagilian ti agus-usar kadagitoy nga account.

Insardengen ti Kairagi Congregation, iti Manado, North Sulawesi, Indonesia, ti agusar kadagiti libre a videoconferencing app ket inusardan ti Zoom account ti organisasion. Inlawlawag ni Brother Hadi Santoso: “Uray dagiti kakabsat a saan unay a nalaing nga agusar iti gadyet, matagiragsakdan dagiti gimong gapu ta saanda nga agkara-log in bayat ti gimong.”

Kuna ni Lester Jijón, Jr., maysa a panglakayen iti Guayacanes Oeste Congregation iti Guayaquil, Ecuador: “Gapu ta marigrigat ti adu a kakabsat, imposible a makagatang ti dadduma a kongregasion iti Zoom license a mabalin a pagkonektaran ti intero a kongregasion kadagiti gimong. Imbag laengen ta adu ti mabalin nga agkonek kadagiti Zoom account nga impaay ti organisasion. Nawayakamin nga agawis iti gimong, ken saankami a madanagan a baka adda dagiti saan a makakonek.”

Imbaga ni Johnson Mwanza, maysa a panglakayen iti Ngwerere North Congregation iti Lusaka, Zambia: “Kanayon nga ibagbaga dagiti kakabsat, ‘Gapu iti Zoom nga impaay ti organisasion, nadekdekketkami kadagiti kakabsat ken mariknami nga ipatpateg ken ay-aywanannakami ni Jehova.’”

Ti pinanggatang kadagitoy nga account ket naggapu iti pondo a nairanta a pangsaranay kadagiti nadidigra. Dayta a pondo ket naggapu kadagiti boluntario a donasion para iti sangalubongan a trabaho. Adu kadagitoy a donasion ti naited babaen ti donate.jw.org. Pagyamanan iti nabuslon a donasionyo, a maus-usar met iti dadduma pay a trabaho a panangsaranay iti intero a lubong.—2 Corinto 8:14.