Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • Panamarsua Wenno Ebolusion?—Paset 1: Apay a Mamati iti Dios?
    Saludsod Dagiti Agtutubo
    • Agtutubo a mangilawlawag iti kaeskuelaanna no apay a mamati iti Dios

      SALUDSOD DAGITI AGTUTUBO

      Panamarsua Wenno Ebolusion?—Paset 1: Apay a Mamati iti Dios?

      • Panamarsua wenno ebolusion?

      • Apay a mamatiak iti Dios?

      • Ti panangilawlawagko iti pakakombinsirak

      Panamarsua wenno ebolusion?

      Mamatika kadi a pinarsua ti Dios ti amin a banag? No wen, saanka nga agmaymaysa; adu nga agtutubo (ken adulto) ti mamati met a kas kenka. Ngem kuna ti dadduma a timmaud ti biag ken ti uniberso babaen iti ebolusion​—nga awan ti tulong ti “Kangatuan a Persona.”

      Ammom kadi? Masansan nga alisto nga ibaga agpadpada dagiti mamati iti ebolusion ken panamarsua no ania ti patpatienda. Ngem kinaagpaysuanna, dida ammo no apay a mamatida iti dayta.

      • Mamati ti dadduma iti panamarsua gapu ngamin ta dayta ti maisursuro iti simbaanda.

      • Adu ti mamati iti ebolusion gapu laeng ta dayta ti maisursuro iti eskuelaanda.

      Makatulong kenka daytoy a serye dagiti artikulo a mangpapigsa iti panamatim iti panamarsua ken mailawlawagmo dayta. Ngem masapul nga isaludsodmo nga umuna iti bagim ti maysa a simple a saludsod:

      Apay a mamatiak iti Dios?

      Apay a napateg dayta a saludsod? Ngamin, paregtaennaka ti Biblia nga usarem ti isipmo, ti ‘pannakabalinmo nga agrason.’ (Roma 12:1) Kaipapananna a ti panamatim iti Dios ket saan la koma a naibasar iti

      • emosion (Panagriknak ket adda a talaga ti natantan-ok a mannakabalin)

      • impluensia ti sabsabali (Relihioso dagiti kalugarak)

      • pannakapilit (Pinadakkeldak dagiti nagannakko a mamati iti Dios​—ta no saan)

      Imbes ketdi, masapul a kombinsidoka a mismo nga adda Dios ken rumbeng nga adda dagiti nainkalintegan a rasonmo iti dayta.

      Ania ngarud ti pakakombinsiram nga adda Dios? Ti worksheet nga “Apay a Mamatiak iti Dios?” ti mangpapigsa iti kombiksionmo. Nalabit makitam pay a makatulong ti panangusigmo iti sungbat ti dadduma nga agtutubo iti dayta a saludsod.

      “No addaak iti klase a dumdumngeg iti eksplanasion ti titsermi maipapan iti panagandar ti bagitayo, diak pulos agduadua iti kaadda ti Dios. Adda usar ti tunggal paset ti bagi agingga iti kabassitan a detalye, ken masansan a ditay mapupuotan ti panagandar dagita. Talaga a nakaskasdaaw ti bagi ti tao!”​—Teresa.

      “No adda makitak a nangato a pasdek, pangpasiar a barko, wenno kotse, isaludsodko iti bagik, ‘Asino ti nangaramid iti dayta?’ Kas pagarigan, dagiti laeng intelihente a tattao ti makaaramid iti lugan, ta nagadu a babassit a piesa ti masapul nga eksakto ti panaggarawda tapno agandar ti intero a lugan. Ket no adda nangdisenio kadagiti lugan, kasta met laeng kadatayo a tattao.”​—Richard.

      “No maamirismo a ginasut a tawen sakbay a naawatan dagiti kasisiriban a tattao ti maipapan kadagiti kabassitan a paset ti uniberso, saan ngarud a pulos a nainkalintegan a panunoten nga awan ti masirib a nangpataud iti uniberso!”​—Karen.

      “Idi inadalko a naimbag ti siensia, kasla ad-addan a saan a nakappapati ti ebolusion. Kas pagarigan, pinampanunotko ti matematikal a kinaumiso dagiti adda iti nakaparsuaan ken ti kinanaisangsangayan dagiti tattao, agraman ti kinapateg ti panangammotayo iti kinasiasinotayo, nagtaudantayo, ken pagturturongantayo. Panggep ti ebolusion nga ilawlawag amin dagita a banag kadagiti termino a nainaig kadagiti animal, ngem dina pulos mailawlawag no apay a naisangsangayan dagiti tattao. Para kaniak, dakdakkel a ‘pammati’ ti kasapulan iti panamati iti ebolusion ngem iti panamati iti maysa a Namarsua.”​—Anthony.

      Ti panangilawlawagko iti pakakombinsirak

      Kasanon no uy-uyawendaka dagiti kaklasem gapu iti panamatim iti saanmo a makita? Kasanon no kunada a “napaneknekanen” ti siensia nga umiso ti ebolusion?

      Umuna, agtalekka iti patpatiem. Dika agdanag wenno agbain. (Roma 1:​16) Laglagipem:

      1. Saanka nga agmaymaysa; adu pay laeng ti mamati iti Dios. Karaman kadakuada dagiti intelihente unay ken propesional a tattao. Kas pagarigan, adda dagiti sientista a mamati nga adda Dios.

      2. No kuna dagiti tattao a saanda a mamati iti Dios, ti talaga a kaipapanan dayta no dadduma ket dida maawatan ti Dios. Imbes a mangibagada iti ebidensia a mangsuportar iti panangmatmatda, mangpataudda kadagiti saludsod a kas iti, “No adda Dios, apay nga ipalpalubosna ti panagsagaba?” No ar-arigen, pagbalbalinenda nga intelektual nga isyu ti emosional nga isyu.

      3. Adda ‘naespirituan a kasapulan’ dagiti tattao. (Mateo 5:3) Karaman iti dayta ti panagkasapulan a mamati iti Dios. Isu a no adda mangibaga nga awan ti Dios, dayta a tao​—saan a sika​—ti makinresponsabilidad a mangilawlawag no apay a kasta ti konklusionna.​—Roma 1:​18-​20.

      4. Talaga a nainkalintegan ti panamati iti Dios. Maitunos dayta iti napaneknekanen a kinapudno a ti biag ket saan a tumaud a bukbukodna. Awan a pulos ti ebidensia a mangsuporta iti kapanunotan a basta timmaud lattan ti biag manipud iti banag nga awan biagna.

      Ania ngarud ti ibagam no adda mangkuestion iti panamatim iti Dios? Usigem ti sumagmamano a posibilidad.

      No adda agkuna: “Dagiti laeng awan adalna ti mamati iti Dios.”

      Mabalin nga isungbatmo: “Talaga kadi a mamatika iti dayta? Siak, saan. Kinapudnona, idi nasurbey ti nasurok a 1,600 a propesor ti science iti nadumaduma a de kalidad nga unibersidad, 33% ti saan a nangibaga a dida pulos mamati iti Dios wenno agduaduada nga adda Dios.a Kayatmo a sawen, saan nga intelihente dagita a propesor gapu ta mamatida iti Dios?”

      No adda agkuna: “No adda Dios, apay a nakaro unay ti panagsagaba iti lubong?”

      Mabalin nga isungbatmo: “Nalabit ti kayatmo a sawen ket dimo maawatan no kasano ti panagtignay ti Dios​—wenno iti daytoy a kaso, kasla awan ar-aramidenna. Husto kadi ti imbagak? [Bay-am a sumungbat.] Adda nasarakak a makapnek a sungbat iti saludsod nga apay nga adda nakaro a panagsagaba. Ngem tapno maawatan dayta, masapul a mausig ti sumagmamano a pannursuro ti Biblia. Kayatmo kadi a maammuan ti ad-adu pay?”

      Salaysayen ti sumaganad nga artikulo iti daytoy a serye no apay a ti ebolusion ket saan a makaipaay iti makapnek a panangilawlawag maipapan iti kaaddatayo.

      a Reperensia: Social Science Research Council, “Religion and Spirituality Among University Scientists,” ni Elaine Howard Ecklund, Pebrero 5, 2007.

  • Panamarsua Wenno Ebolusion?—Paset 2: Apay a Masapul a Kuestionaram ti Ebolusion?
    Saludsod Dagiti Agtutubo
    • Dagiti estudiante iti haiskul a maisursuro iti ebolusion

      SALUDSOD DAGITI AGTUTUBO

      Panamarsua Wenno Ebolusion?​—Paset 2: Apay a Masapul a Kuestionaram ti Ebolusion?

      Magulguluan ni Alex. Inkakaubinganna ti mamati iti Dios ken iti panamarsua. Ngem ipappapilit ti maestrona iti biology a ti ebolusion ket pudno ken naibatay iti mapagtalkan a nasirarak ti siensia. Saan a kayat ni Alex ti maibilang nga ignorante. ‘Ngamin,’ pampanunotenna, ‘no napaneknekanen dagiti sientista a pudno ti ebolusion, asinoak koma tapno kuestionarak ida?’

      Kasta kadi met ti situasionmo? Nalabit sipud kinaubingmo, patiemon ti kuna ti Biblia: “Ti Dios pinarsuana ti langlangit ken ti daga.” (Genesis 1:1) Ngem iti nabiit pay, adda dagiti mangkomkombinsir kenka a sarsarita laeng ti panamarsua ken ti ebolusion kano ti pudno. Rumbeng kadi a patiem ida? Apay a masapul a kuestionaram ti ebolusion?

      • Dua a rason a masapul a kuestionaram ti ebolusion

      • Dagiti saludsod a pagpanunotam

      • Ti kuna dagiti padam nga agtutubo

      Dua a rason a masapul a kuestionaram ti ebolusion

      1. Saan nga agtutunos dagiti sientista maipapan iti ebolusion. Iti laksid ti pinullo a tawtawen a panagsirarak, awan pay ti panangilawlawag maipapan iti ebolusion a pagtutunosan ti amin a sientista.

        Panunotem: No saan a makapagtutunos dagiti sientista maipapan iti ebolusion​—idinto ta isuda koma ti eksperto​—kamalika kadi no kuestionaram dayta?​—Salmo 10:4.

      2. Napateg no ania ti patiem. “No naiparna laeng a timmaud ti biag, awan ngarud serserbi ti biagtayo ken ti amin a banag iti unibersotayo,” kuna ti agtutubo a ni Zachary. Adda puntona. Ngamin, no agpayso ti ebolusion, kasla awan aniaman a manayon a panggep ti biag. (1 Corinto 15:32) Ngem no pudno ti panamarsua, makabiroktayo kadagiti makapnek a sungbat dagiti saludsod maipapan iti panggep ti biag ken iti mapasamak iti masanguanan.​—Jeremias 29:11.

        Panunotem: Ania ti maitulongna iti biagmo no maammuam ti kinapudno maipapan iti ebolusion ken panamarsua?​—Hebreo 11:1.

      Dagiti saludsod a pagpanunotam

      TI KUNADA: ‘Amin a banag iti uniberso ket resulta ti naiparna a nakapigpigsa a panagbettak (big bang).’

      • Siasino wenno ania ti makagapu iti nakapigpigsa a panagbettak?

      • Ania ti mas nakappapati​—awan nagtaudan ti amin wenno adda nangpataud iti amin?

      TI KUNADA: ‘Naggapu ti tao kadagiti animal.’

      • No naggapu ti tao kadagiti animal​—kas pagarigan, kadagiti sunggo​—apay ngarud a nagdakkel ti nakaidumaan ti abilidad ti tattao nga agpanunot no idilig kadagiti sunggo?a

      • Apay a nakaskasdaaw unay ti kinakomplikado uray dagiti “kasisimplean” a kita ti biag?b

      TI KUNADA: ‘Napaneknekanen a pudno ti ebolusion.’

      • Ti kadi tao a mangibagbaga iti dayta inusignan a mismo dagiti ebidensia?

      • Mano ti mamati iti ebolusion gapu laeng ta naibaga kadakuada a patien kano dayta ti amin a nalaing a tattao?

      TI KUNA DAGITI PADAM NGA AGTUTUBO

      Gwen

      Gwen

      “Ipapanmo a nadamagmo a bimtak ti maysa a planta a pagimprentaan. Naiparsiak ti tinta iti pader ken bobida. Pagammuan ta adda timmaud a maysa a kompleto a diksionario. Mamatika? Lallalo pay ngarud nga imposible nga amin a banag iti naurnos nga uniberso ket timmaud laeng babaen iti naiparna a nakapigpigsa a panagbettak!”

      Jessica

      Jessica

      “Adda kualidad dagiti tattao a napatpateg nga amang ngem iti kasapulan tapno laeng agtultuloyda nga agbiag. Kinapudnona, aywanantayo dagiti masakit ken tulongantayo dagiti agkasapulan. Apay nga aramidentayo dayta no agpayso ti ebolusion​—a mangibagbaga a dagiti laeng kabilgan ti agtalinaed nga agbiag?”

      Julia

      Julia

      “No magmagnaka iti kabakiran ket makakitaka iti napintas a balay a naaramid iti kayo, panunotem kadi: ‘Nagpintasen! Nagtinnag la ketdi dagiti kayo iti eksakto a lugarda tapno maaramid daytoy a balay.’ Siempre saan! Imposible dayta. Apay koma ngarud a patientayo a basta timmaud lattan ti amin a banag iti uniberso?”

      a Mabalin a kuna ti dadduma a nalalaing dagiti tattao ta dakdakkel ti utekda ngem kadagiti sunggo. Ngem tapno maammuam dagiti rason a saan nga umiso dayta nga argumento, kitaem ti broshur a The Origin of Life—Five Questions Worth Asking, panid 28.

      b Kitaem ti broshur a The Origin of Life—Five Questions Worth Asking, panid 8-12.

  • Panamarsua Wenno Ebolusion?—Paset 3: Apay a Masapul a Mamatika iti Panamarsua?
    Saludsod Dagiti Agtutubo
    • Dagiti estudiante iti museo a mangkitkita kadagiti fossil ti dinosaur

      SALUDSOD DAGITI AGTUTUBO

      Panamarsua Wenno Ebolusion?​—Paset 3: Apay a Masapul a Mamatika iti Panamarsua?

      “No mamatika iti panamarsua, nalabit panunoten dagiti tattao nga ignoranteka ta mamatpatika iti pang-ubbing nga estoria nga insuro kenka dagiti nagannakmo, wenno inallilawnaka ti relihion.”—Jeanette.

      Kas ken Jeanette met kadi ti riknam? No wen, nalabit agduaduaka iti panamarsua. Asino met ngamin ti mayat a maibilang nga ignorante? Ania ngarud ti makatulong?

      • Dagiti pangkontra

      • Panunotem dagiti patpatiem

      • Dagiti makatulong kenka a mangsukimat iti ebidensia

      • Ti kuna dagiti padam nga agtutubo

      Dagiti pangkontra

      1. No mamatika iti panamarsua, panunoten dagiti tattao a konkontraem ti siensia.

      “Kuna ti maestrak a mamati dagiti tattao iti panamarsua ta masadutda a mangammo no kasano ti panagandar dagiti bambanag iti lubong.”—Maria.

      Ti rumbeng a maammuam: Di ammo dagidiay mangibagbaga iti kasta no ania a talaga ti agpayso. Dagiti nalatak a sientista a kas kada Galileo ken Isaac Newton ket namati iti Namarsua. Saan a maikontra dayta a patpatienda iti panangipategda iti siensia. Addada met sientista ita a mamati a saan nga agkontra ti siensia ken ti panamati iti panamarsua.

      Padasem daytoy: I-type-mo ti sasao (agraman dagiti quotation marks) a “no apay a mamati” wenno “no apay a mamati iti Dios” iti search box ti Watchtower ONLINE A LIBRARIA para kadagiti pagarigan dagiti agtrabtrabaho iti tay-ak ti medisina ken siensia a mamati iti panamarsua. Basaem no ania ti nakatulong kadakuada a namati iti dayta.

      Laglagipem: No mamatika iti panamarsua, dina kayat a sawen a konkontraem ti siensia. Kinaagpaysuanna, no umad-adu ti maammuam maipapan iti nakaparsuaan, ad-adda a mapabileg ti panamatim iti panamarsua.—Roma 1:20.

      2. No mamatika iti salaysay ti Biblia maipapan iti panamarsua, panunoten dagiti tattao a panatikoka iti relihion.

      “Para iti adu, linoloko ti panamati iti panamarsua. Maysa la kano ngamin nga es-estoria ti salaysay ti Genesis.”—Jasmine.

      Ti rumbeng a maammuam: Masansan nga adda di umiso a pagarup dagiti tattao maipapan iti panamarsua a nairekord iti Biblia. Kas pagarigan, kuna ti dadduma a creationist a nabiit pay a naparsua ti daga wenno ti biag ket naparsua iti 6 nga aldaw a sag-24 nga oras. Saan a suportaran ti Biblia dagita.

      • Simple laeng ti kuna ti Genesis 1:1: “Idi punganay, ti Dios pinarsuana ti langlangit ken ti daga.” Maitunos dayta iti ebidensia ti siensia a binilion a tawenen ti daga.

      • Ti sao nga “aldaw” a nausar iti Genesis ket mabalin a tumukoy kadagiti atiddog a periodo ti tiempo. Kinapudnona, nausar ti sao nga “aldaw” iti Genesis 2:4 a pangtukoy iti amin nga innem nga aldaw ti panamarsua.

      Laglagipem: Ti panamarsua a salaysay ti Biblia ket maitunos kadagiti nasientipikuan a kinapudno.

      Panunotem dagiti patpatiem

      Ti panamati iti panamarsua ket saan a “basta panamati lattan.” Naibatay dayta iti lohikal a panagrason. Usigem daytoy:

      Amin a banag iti lubong ket mangisursuro kenka a no adda disenio, adda nangdisenio. No makakitaka iti kamera, eroplano, wenno balay, husto laeng a mapanunotmo nga adda nangdisenio kadagita. Apay koma a laksidem dayta a lohika no panunotem ti maipapan iti mata ti tao, tumatayab iti tangatang, wenno iti planetatayo a Daga?

      Panunotem: Masansan a tuladen dagiti inheniero dagiti disenio a makitada iti nakaparsuaan tapno mapasayaatda dagiti imbensionda, ket natural laeng a kayatda ti mapadayawan gapu kadagiti inaramidda. Nainkalintegan kadi a bigbigen ken padayawantayo dagiti tattao nga imbentor ken dagiti inimbentoda ngem ditay man la bigbigen ken padayawan ti Namarsua ken dagiti adayo nga amang a nakaskasdaaw a diseniona?

      Eroplano ken billit nga agtaytayab

      Rasonable kadi a panunoten nga adda nangdisenio iti eroplano ngem awan ti nangdisenio iti billit?

      Dagiti makatulong kenka a mangsukimat iti ebidensia

      Mapabilegmo ti panamatim iti panamarsua no usigem dagiti ebidensia a makita iti nakaparsuaan.

      Padasem daytoy: I-type-mo ti sasao (agraman quotation marks) a “nadisenio kadi” iti search box ti Watchtower ONLINE A LIBRARIA. Agpilika iti dadduma a paulo a makapainteres kenka manipud iti “Nadisenio Kadi?” a serye ti Agriingkayo! Iti kada artikulo, ammuem no ania ti nakaskasdaaw a paset ti nakaparsuaan a nailawlawag iti dayta. Kasano a makombinsirnaka dayta nga adda Diseniador?

      Sukimatem a naimbag: Usarem dagiti sumaganad a broshur para iti mas detalyado a panangsukimat kadagiti ebidensia maipapan iti panamarsua.

      • Naparsua Kadi ti Biag?

        • Eksakto ti lokasion ti daga ken kabaelanna a suportaran ti biag.—Kitaem ti panid 4-10.

        • Dagiti pagarigan ti disenio ket makita iti nakaparsuaan.—Kitaem ti panid 11-17.

        • Ti salaysay ti Biblia iti Genesis maipapan iti panamarsua ket maitunos iti siensia.—Kitaem ti panid 24-28.

      • The Origin of Life—Five Questions Worth Asking

        • Saan a mabalin a basta nangrugi ti biag iti awan biagna a banag.—Kitaem ti panid 4-7.

        • Komplikado unay dagiti sibibiag nga organismo tapno ibagatayo a naiparna laeng a timmaud dagita.​—Kitaem ti panid 8-12.

        • Awan kaimudingan ti moderno a teknolohia iti kabaelan ti genetic code a manglaon kadagiti impormasion.—Kitaem ti panid 13-21.

        • Amin a biag ket saan a nagtaud iti maymaysa nga inapo. Ipakita ti rekord dagiti fossil a dagiti kangrunaan a grupo dagiti animal ket kellaat a timmaud, saan nga in-inut a nagbalin a sabali a kita.—Kitaem ti panid 22-29.

      “Ti nakaparsuaan ti kangrunaan a nakakombinsirak nga adda Dios, manipud kadagiti animal ditoy daga agingga iti uniberso ken ti kinaurnos nga adda iti dayta.”—Thomas.

      TI KUNA DAGITI PADAM NGA AGTUTUBO

      Hannah

      “Idi nabasak iti klasek iti science ti maipapan kadagiti amin a kinakomplikado dagiti mula, animal, ken ti bagi ti tao, talaga a bimmilibak unay. Siguradoak nga inaramid dagita ti Namarsua. Para kaniak, kasapulan ti ‘basta panamati lattan’ tapno patiem ti ebolusion, ngem saan a kasta ti panamati iti panamarsua.”—Hannah.

      Talia

      “Magustuak a basaen ti paset a ‘Nadisenio Kadi?’ iti magasin nga ‘Agriingkayo!’ Pampaneknekan kaniak dayta a saan a pudno ti ebolusion. Saan a nakappapati a panunoten a ti nagpintas a kulibangbang wenno ti hummingbird ket basta timmaud lattan.”—Talia.

  • Panamarsua Wenno Ebolusion?​—Paset 4: Kasano a Mailawlawagko ti Panamatik iti Panamarsua?
    Saludsod Dagiti Agtutubo
    • Balasitang a Saksi a mangilawlawag kadagiti kaklasena iti panamatina iti panamarsua

      SALUDSOD DAGITI AGTUTUBO

      Panamarsua Wenno Ebolusion?​—Paset 4: Kasano a Mailawlawagko ti Panamatik iti Panamarsua?

      Mamatika iti panamarsua, ngem dimo kayat nga ibaga dayta kadagiti kaeskuelaam. Nalabit ti ebolusion ngamin ti isursuro dagiti libroyo ken madanaganka amangan no pagkakatawaandaka dagiti mannursurom ken kaklasem. Kasanom a situtured a maibaga ken mailawlawag ti panamatim iti panamarsua?

      • Kayam dayta!

      • Agsaganaka

      • Dagiti makatulong kenka a mangilawlawag iti patpatiem

      • Ti kuna dagiti padam nga agtutubo

      Kayam dayta!

      Nalabit ipagarupmo: ‘Saanak a nalaing a mangilawlawag iti siensia ken makidebate maipapan iti ebolusion.’ Dayta ti narikna idi ni Danielle. “Diak maitured a kontraen ti mannursurok ken dagiti kaklasek,” kinunana. Kasta met laeng ni Diana: “Matikawak no makirinnasonda babaen kadagiti scientific terms.”

      Nupay kasta, ti panggepmo ket saan a tapno mangabak kadagiti argumento. Daytoy ti naimbag a damag: Saan a kasapulan a nakalalaingka iti science tapno mailawlawagmo no apay a para kenka, ti panamarsua ti rasonable a mangilawlawag iti kaadda ti amin a banag ditoy daga.

      Suhestion: Usarem ti simple a lohika iti Biblia a mabasa iti Hebreo 3:4: “Tunggal balay adda nangibangon, ngem ti nangibangon iti amin a bambanag isu ti Dios.”

      Kastoy ti panagrason ti agtutubo a ni Carol maipapan iti prinsipio ti Hebreo 3:4: “Ipapanmo a magmagnaka iti naraber a kabakiran. Kasla awan pakakitaan nga addan tao a napan dita. Ngem idi nagdumogka, nakakitaka iti toothpick. Ania ti konklusionmo? Kaaduan la ketdi ti mangibaga nga ‘Adda immay idin ditoy.’ No ti bassit ken di unay napateg a kas iti toothpick ket ebidensia nga adda tao a naggapuan dayta, di nakarkaro pay nga amang nga ad-adu ti prueba nga adda nagtaudan ti uniberso ken ti amin nga adda iti dayta!”

      No adda mangibaga: “No husto ti panamarsua, asino ngarud ti nangparsua iti Namarsua?”

      Mabalin nga isungbatmo: “Saan a gapu ta ditay maawatan ti amin maipapan iti Namarsua, kaipapanan daytan nga awan ti Namarsua. Kas pagarigan, nalabit dimo am-ammo ti tao a nangdisenio iti selponmo, ngem kaskasdi a patiem nga adda nangdisenio iti dayta, di ngamin? [Palubosam a sumungbat.] Nagadu ti mabalin a maammuantayo maipapan iti Namarsua. No interesadoka, maragsakanak a mangibaga kadagiti naammuakon maipapan kenkuana.”

      Agsaganaka

      Kuna ti Biblia a rumbeng a ‘kankanayon a sisasaganaka nga agikalintegan iti sanguanan ti tunggal maysa nga agkalikagum kenka iti rason maipaay iti namnama nga adda kenka, ngem aramidem ti kasta buyogen ti naalumamay a kababalin ken nauneg a panagraem.’ (1 Pedro 3:​15) Adda ngarud dua a nasken nga ikabilangam​—no ania ti ibagam ken no kasano ti panangibagam.

      1. No ania ti ibagam. Napateg ti panagayatmo iti Dios ken dayta ti mangtignay kenka nga agsao maipapan kenkuana. Ngem nalabit saan nga umdas ti basta panangibagam kadagiti tattao nga ay-ayatem unay ti Dios tapno makombinsirda a ti Dios ti nangparsua iti amin a banag. Nasaysayaat nga amang nga agusarka kadagiti pagarigan manipud iti nakaparsuaan tapno maipakitam no apay a nainkalintegan ti mamati iti panamarsua.

      2. No kasano ti panangibagam. Papigsaem ti pakinakemmo ngem saanka koma nga agbalin a bastos wenno arogante. Posible nga ikabilangan dagiti tattao ti kapanunotam no nadayaw ti panagsaom maipapan iti patpatienda ken bigbigem nga adda kalinteganda a mangaramid kadagiti bukodda a konklusion.

        “Panagkunak, masapul a saan a pulos a makapainsulto ti pannakisaritatayo wenno kasla ket ’tay ammotayon ti amin. Awan ti pagimbaganna ti napangas a panagsasao.”​—Elaine.

      Dagiti makatulong kenka a mangilawlawag iti patpatiem

      Balasitang a magmagna iti katuduan

      No nakasaganaka a mangidepensa kadagiti patpatiem, arigna nakasaganaka no agbaliw ti paniempo

      “No ditay nakasagana,” kuna ti tin-edyer a ni Alicia, “ditayto lattan agtagtagari tapno saantay laeng a mapabainan.” Kas imbaga ni Alicia, napateg ti panagsagana tapno agballigitayo. Kuna ni Jenna: “Mas komportableak a makisarita maipapan iti panamarsua no adda naisaganak a simple a pagarigan a mangsuportar iti patpatiek.”

      Pakasarakam ngay kadagita a pagarigan? Adu nga agtutubo ti nagballigin babaen ti panangusarda kadagitoy:

      • Naparsua Kadi ti Biag?

      • The Origin of Life​—Five Questions Worth Asking

      • The Wonders of Creation Reveal God’s Glory (video)

      • Dagiti serye ti “Nadisenio Kadi?” iti magasin nga Agriingkayo! (I-type ti sasao [agraman quotation marks] a “nadisenio kadi” iti kahon a kaabay ti BIROKEN iti Watchtower ONLINE A LIBRARIA.)

      • Usarem ti Watchtower ONLINE A LIBRARIA para iti kanayonan a panagsukimat.

      Nalabit makitamto met a makatulong no repasuem dagiti napalabas nga artikulo iti daytoy a serye a “Panamarsua Wenno Ebolusion?”

      1. Paset 1: Apay a Mamati iti Dios?

      2. Paset 2: Apay a Masapul a Kuestionaram ti Ebolusion?

      3. Paset 3: Apay a Masapul a Mamatika iti Panamarsua?

      Suhestion: Mangpilika kadagiti pagarigan a makakombinsir kenka. Nalaklakanto ngamin a matandaanam ken kabaelamto nga ibaga dagita a situtured. Praktisem no kasano nga ilawlawagmo ti patpatiem.

      TI KUNA DAGITI PADAM NGA AGTUTUBO

      Brittany

      “No timmaudtayo babaen iti ebolusion, apay ngarud nga addaantayo kadagiti galad a kas iti asi ken ayat? Gapu kadagita a galad, ti sabsabali ti panunotem imbes a ti bagim. Para kaniak, imposible a basta timmaud lattan dagita a galad.”​—Brittany.

      Breanna

      “Iti klasemi iti biology, naadalko ti pakabuklan ken panagandar dagiti selulatayo. Nupay ti ebolusion ket maisursuro iti biology, nalawag kadagiti naadalko nga adda intelihente a nangparsua kadatayo.”​—Breanna.

Dagiti Publikasion iti Iloko (1984-2025)
Ag-log out
Ag-log in
  • Iloko
  • I-share
  • Ti Kayatmo a Setting
  • Copyright © 2025 Watch Tower Bible and Tract Society of Pennsylvania
  • Pagannurotan iti Panagusar
  • Pagannurotan iti Kinapribado
  • Privacy Settings
  • JW.ORG
  • Ag-log in
I-share