Panawen Kadin a Mapabaro ti Kama?

Babaen ti koresponsal ti Agriingkayo! idiay Britania

Masansan kadi nga alimbasagenka iti rabii, nga agkarabalikidka ta birbirokem ti nasayaat a posision, ket mariingka nga aglaladut iti agsapa? No kasta, mabalin a ti kamam ti parikut.

MABALIN a gayyemmo wenno kabusormo daytoy a muebles. No agnanaedka iti lugar a maus-usar ti kama, nalabit binusbosmon ti kakatlo ti intero a panagbiagmo a naginana iti maysa kadagitoy, ngem saan nga agpaut iti agnanayon ti kamam. Nasayaat kadi ti panagserbi ti kamam kenka?

Masapulmo Kadi ti Baro a Kama?

Gagangay a ti maysa a kama ket mangipaay iti nasayaat a serbisio iti agarup sangapulo a tawen. Mabalin a mabibiit a madadael ti kama ti nadagsen a tao. Laglagipem met nga agbalbaliw dagiti kasapulam ken pagayatam bayat nga agmatmataenganka. Tapno maikeddengmo no kasapulam ti baro a kama, saludsodam ti bagim, ‘Mariingak kadi a nasakit ti tengngedko wenno ti bukotko? Bassit unay kadi ti kamak? Mariknak kadi dagiti spring wenno ikingna? Mangngegko kadi nga agranetret no agkutiak? Agtulidkami kadi nga agassawa a saanmi nga igaggagara? Bangking kadi wenno agyukayok ti lansadna? Narunot kadin dagiti saka ken daligna?’ Dagiti sungbatmo kadagitoy a saludsod matulongannaka a mangikeddeng no panawenen a gumatang iti baro a kama.

Ania ti Makuna a Nasayaat a Kama?

Makapabang-ar ken makatapaya ti nasayaat a kama, maibagay iti partikular a kasapulam ken pagayatam. Kaaduan a kama ket buklen ti kudson ken ti mangtapaya a kahana, ngem ti kudson ti nangnangruna a makapabang-ar kenka. Adda sumagmamano a mangbukel iti dayta. Umuna ti abbongna, wenno balkutna a mamagkaykaysa iti isuamin. Kalpasanna adda dagiti naseksekan a nabalkut a kudsonmo ken mangagsep iti agneb ti bagim. Ti maikatlo a paset, a mangtapaya ken addaan kinatibker, gagangay a maikkan iti natenneb a nakawikaw a landok wenno spring. Adda nadumaduma a porma ti mangtapaya nga adda iti uneg, ngem kaaduanna, no ad-adu ti spring-na ken no napuspuskol ti alambre a nausar, nasaysayaat ti panangtapayana. Ti polyurethane wenno latex foam ti uso a kudson itatta; nalaglag-an daytoy ngem ti adda spring iti unegna.

Nupay kasta, nasayaat laeng ti kudson no maitutop ti nagsaadanna, gagangay a daydiay pakaibagayan ti diseniona. Ti pagiddaan a kama masansan a mailako a maysa a set, nga addaan iti kudson ken pagsaadan. Ti nauneg ti sikiganna, arig kahon a pagsaadan ket agserbi a kasla dakkel a shock absorber, tapno makasngaw ti kudson ken iti kasta agpaut dayta. Ti bedstead ti sabali pay a pagpilian. Gagangay a daytat’ nalagalaga a pagsaadan a silulukat ti sirokna. Mangipaay dayta iti nasayaat a bentilasion para iti maitutop a kudsonna. Natibtibker dagiti solido a laga, ngem nalaplap-it ti spring a laga.

Panangpili iti Umiso a Kama

Ania ti laglagipem no gumatangka iti kama? Ti segunda-mano a kama ket nakaagsepen iti ling-et ken kursing ti dadduma a tao ken mabalin nga aduan iti kiteb a pakaigapuan iti alergik, angkit, wenno eksema. Mabalin a saan met a maitutop iti pagalagadan ti salun-at wenno kinatalged.

Sakbay a gumatangka iti baro a kama, nasayaat no ikeddengmo dagiti kapatgan a banag, kas iti presio, salun-at, ken ti kadakkel ti kama. Mangilatangka koma iti tiempo a sumarungkar iti adu nga agdindinamag a paglakuan, ket ammuem ti adu nga impormasion maipapan iti tunggal klase ti kama wenno kudson. Tangay masansan a nangina dagiti kama, dika agapura nga agdesision.

Narigrigat ti agpili no nabannogka. Agkaweska iti komportable. Dika maal-alumiim a mangipadas iti kama. Uksobem ti kagaymo ken ikkatem ti sapatosmo ket agiddaka iti tunggal kama iti sumagmamano a minuto. Padasem ti sumagmamano a posision a maturog, a siputam ti panangtapayana iti abaga, patong, ken makimbaba a bukotmo.​—Kitaem ti kahon nga adda iti baba.

Panangaywan iti Kamam

No maaywanan a naimbag ti kamam agpaut dayta. Agpabalakadka kadagiti aglaklako, ket iwayaam a basaen dagiti instruksion ti nangaramid. No iyawidmon ti baro a kamam, ikkatem a dagus ti balkutna a plastik. Makatulong daytoy tapno saan nga agagneb, buoten, ken agrunot. Adtoy ti sumagmamano a kanayonan a singasing.

● Baliktadem ti baro a de-spring a kudson iti tunggal lawas wenno dua a lawas iti umuna a sumagmamano a bulan ken tunggal tallo a bulan kalpasanna. Makatulong daytoy a mangipuesto a naimbag kadagiti seksekna ken mangipasigurado nga agpapada ti panagrunotna. No adda sakit ti bukotmo, nasaysayaat no piliem ti kudson a foam, ta saan a masapul a kanayon a baliktadem.

● Dika pilkuen, lukoten, wenno pitpiten ti kudsonmo. Tapno di madadael ti lupotna, usarem laeng ti pangiggamanna a pangipuesto, saan a tapno pangbitbitan.

● Tunggal bigat, ikkatem ti kubre-kama iti agarup 20 a minuto tapno maanginan ti kama ket mamagaan ti aniaman nga agneb.

● Pagtalinaedem a nadalus ti kudson babaen ti panangap-apmo iti malabaan a lupot. Kanayon nga i-vacuum-mo ti kudson ken ti pagsaadanna tapno maikkat ti burbor ken tapok, ken dalusam a dagus ti mantsa ken aniaman a naibukbok babaen ti saan unay a napigsa a sabon ken nalamiis a danum.

● Ikagumaam ti di agtugaw a kanayon iti maymaysa a pingir ti kudson. Dika palubosan dagiti ubbing wenno siasinoman nga aglagtolagto iti kama.

Saan laeng a kuarta ti impuonam iti kamam. Impuonam ti kakatlo iti panagbiagmo​—a mabalin a mangapektar iti nabatbati a dua a kakatlo iti panagbiagmo. No nainsiriban ti panangpilim iti manangandingay a gayyemmo (ti kamam) ken aywanam dayta, taripatuennaka a naimbag.

[Kahon iti panid 22]

Ania a Kama ti Maitutop Kenka?

Nanam-ay ken mangtapaya. Saan a masapul a natangken ti kudson a kas iti tabla tapno naimbag dayta para kenka. Kinapudnona, ti natangken unay a kama mabalin a pakaruenna ti sakit ti bukot. Bay-am a ti bagim ti mangibaga no ania ti marikna ti bagim a kasayaatan. Agdataka. No maisuksokmo ti imam iti lukong ti bukotmo ket nagsayaat ti panagdissona ken nalaka ti panagbalikidmo, kalkalainganna laeng ti kinatangken ti kudson para kenka. Ti makatapaya a kudson pagtalinaedenna a nalinteg ti durim no agsikigka. Ti nadagdagsen a tao masapulna ti natibtibker a kama.

Kadakkel. Piliem ti kama a nawayaka a makakuti. No dua a tao ti agidda iti kama, laglagipem a ti dua a tao a maturog iti gagangay ti kadakkelna a kama a 135 a sentimetro ti kalawana ket maaddaan laeng iti lugar ti tunggal maysa a kas iti kalawa ti kona ti maladaga.

Agkabagay a pagsaadan ken kudson. No mabalin, gumatangka iti agkabagay a kudson ken pagsaadan ken daydiay nadisenio a mangbang-ar ken mangtapaya kenka. Ti daan a pagsaadan mabalin a dadaelenna ti baro a kudson ken apektaranna ti panagpautna.

Presio. Masansan a no ania ti bayadam isu laeng ti magun-odam, isu a gumatangka iti kasayaatan a kama a kabaelam.

Espasio. No limitado ti espasio, mabalin a kayatmo ti kama a Murphy, wenno kama a mapagbalin a kasla aparador. Ti sabali pay ket ti futon a buklen ti natuon-tuon a kapas a nalaka laeng a mayaplag iti suelo no rabii. Dagiti futon mailakoda met a kas sofa bed a mailatag iti nalagalaga a makupkupin a kaha.

Dagiti an-annayen. No saanka a komportable iti gagangay a kama, ti maibagaybagay a kama mangipaay iti nagduduma a posision ti pannaturog. Ti water bed mangtapaya ken agpapada ti panagdisso ti bagi, ket matulonganna dagidiay agut-ot dagiti pressure point-da.

Dagiti agalergik. No alergikka iti tapok wenno gagangay a seksek, nasayaat no piliem ti kudson nga addaan iti sintetiko a linabag wenno foam. Usigem met a saan a nalaka a maurnong dagiti makapaalergik a banag no nalagalaga ti pagsaadanna wenno maysa a water bed.

Lallakay ken Babbaket. Siguraduem a makabatay ti sakam iti suelo no agtugawka iti pingir ti kamam. No natibker ti pingir ti kama, nalaklaka ti bumaba ken sumagpat iti kama no nakatugawka.

[Kahon iti panid 23]

Singasing Tapno Natalged

◼ Agusarka iti narigat a sumged a pagturog.

◼ Siguraduem a dagiti ap-ap ket adayo iti apuy wenno heater.

◼ Masansan a sukimatem ti electric blanket no adda pigisna, immuneg a pasetna, nauram a paset, ken narunot a kurdon. Dika usaren ti electric blanket no nabasa, ngem bay-am nga agmaga a bukodna. Dika parabawan ti kama iti nadagsen no naka-switch ti electric blanket.

◼ Dika kargaan ti agburburek a danum ti bote a pagkargaan iti napudot a danum, wenno usaren dayta a kadua ti electric blanket. Ikkatem dayta sakbay a maturog ti ubing.

[Diagram iti panid 23]

(Para iti aktual a pannakaurnosna, kitaem ti publikasion)

Ap-ap, wenno supot

Deep-stitch diamond quilting

Microquilting

Tufting

Nagtutuon a naseksekan a kudson

Makin-uneg a pagsaadan

Foam

Continuous springs

Open springs

Pocket springs

[Credit Line]

Nakopia babaen ti pammalubos ti Sleep Council

[Picture Credit Line iti panid 21]

Nakopia babaen ti pammalubos ti Sleep Council