Manipud Baldado Nagbalin nga Aktibo a Managdaydayaw iti Dios
DUA a Saksi ni Jehova a makiramraman iti ministerio a panagbalaybalay idi Pebrero 1984 ti nakisarita iti maysa a babai iti bario iti Corcovada, Añasco, Puerto Rico. Nangngegda ti maysa a timek iti uneg ti balay ket sinaludsodda iti babai no adda agsakit.
“Wen,” kinunana, “ti asawak. Isut’ masakiten iti 14 a tawen ket saan a pulos a rumrummuar iti kuarto malaksid no agdigos ken mangan.”
Dagiti dua a Saksi dinawatda no mabalin a kasaritada ti asawa a lalaki. Imbaga ti asawana a dina kayat ti makisarita iti siasinoman, ngem no mayat dagiti Saksi a sumrek, mabalin.
“Simrekkami iti kuarto,” inlawlawag ti maysa kadagiti Saksi, “ket nakitami ti lalaki a nakaidda. Idi nakitami ti kasasaadna, naasiankami kenkuana. Nakakapkapuy ta agpigpigerger. Imbagami kenkuana ti maipapan iti Pagarian ti Dios ken ti namnama nga agbiag iti maysa a lubong nga awanen ti sakit wenno uray pay ti ipapatay. Nagarubos ti lua iti rupana. Sinaludsodko kenkuana no kayatna ti agbiag iti dayta a baro a lubong a sadiay awanton ti agsakit.”—Apocalipsis 21:3, 4.
“Wen,” insungbatna. “Intukonmi nga agsublikami ket makipagadalkami ti Biblia kenkuana. Babaen iti pananganamongna nagsublikami, ket naaramid ti panagadal bayat nga isut’ nakaidda.
“Kalpasan ti sumagmamano a panagsarungkar, insingasingko nga isut’ agtugaw iti kama tapno nalaklaka ti panagadalna. Inkagumaanna, nupay idi damo isut’ makatugaw laeng iti apagbiit ta isut’ maulaw. Kalpasan iti sumagmamano pay a panagadal, idi isut’ pumigpigsan, insingasingko nga agadalkami iti salas. Immanamong, ket linawas isut’ tulonganmi a rummuar sadiay.
“Nasayaat ti irarang-ay ti lalaki iti panagadalna, nupay no dandanin di makakita ken kasta unay ti panagpigpigerger dagiti imana ta marigatan a mangiggem iti magnifying glass. Imbagana kadakami nga iti 14 años a panagsakitna, isut’ di pulos napnapan iti doktor ta isut’ di makapanaw iti balay. Gapuna inyurnosmi ti mangipan kenkuana iti doktor.
“Sibaballigi a naaramid ti maysa nga operasion iti matana, ket di nagbayag basbasaennan ti Biblia nga awan ti tulong ti magnifying glass. Simmardengen ti panagpigerger dagiti imana. Kankanayonen a magmagna iti aglawlaw ti balay, ket kamaudiananna isut’ agidda laengen iti rabii. Di nagbayag kalpasanna rinugianna ti tumabuno kadagiti Nakristianuan a gimgimong idiay Kingdom Hall.
“Idi agangay ti panagayat ti dati a baldado ken Jehova a Dios ken kadagiti karkarina ti nangiduron kenkuana a mangisarita kadagiti dadduma maipapan kadagiti bambanag a nasursurona. Di nagbayag, nakikaduan kadakami iti ministerio a panagbalaybalay, isu a nangpasiddaaw iti kasta unay kadagiti kaarrubana ken gagayyemna. Simmayaaten ti salun-atna iti kasta unay ta rinugianna payen ti nagtrabaho iti talonna.”
Idi Nobiembre 1988 daytoy a kapadasan naisalaysay iti maysa nga asamblea sirkito dagiti Saksi ni Jehova, ket ti lalaki, ni Pedro Martínez, nagparang iti entablado. Kamaudiananna, idi Nobiembre 1989, insimbolonan ti dedikasionna ken Jehova babaen ti bautismo iti danum.