Ad-adu Kadi ti Makitam Ngem ti Makita Dagiti Matam?
DAGITI tsuper gagangay a dida makita ti aglawlaw ti narigat a malasin a kurba. Ngem babaen ti tulong ti aganninaw a metal a naikabil iti kurba, mailasin dagiti sumungad a lugan ket maliklikan dagiti aksidente. Kasta met, talaga a di makita dagiti tattao ti di makita a Namarsua. Adda kadi pamay-an tapno maammuan nga Isut’ adda?
Dinakamat ti mannurat idi umuna a siglo no kasano a maammuantayo ti ditay makita. Insuratna: “Dagiti di makita a kualidad [ti Dios] ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen kadagiti bambanag a naaramid, uray ti agnanayon a pannakabalin ken kina-Diosna, iti kasta awan ti pagpambarda.”—Roma 1:20.
Panunotem dayta. Makitam kadi nga adda saririt a naiparangarang kadagiti banag iti aglawlawtayo a di mabalin a partuaten ti abilidad ti tao? Tulongannaka kadi dagita a bambanag a makakita babaen ‘dagiti mata ti pannakaawatmo’ nga adda maysa a persona a natantan-ok ngem tao? Amirisentayo ti sumagmamano a pagarigan.—Efeso 1:18, King James Version.
Panagsursuro Manipud iti Panamarsua
Nasdaawka kadin iti kinangayed ti naariwanas, nabituen a langit iti nasipnget a rabii, ta makitam iti dayta ti ebidensia nga adda Naindaklan a Nangaramid? “Ti langlangit idekdeklarada ti dayag ti Dios; ket maipapan iti aramid ti im-imana ibagbaga ti tangatang,” kinuna ti maysa a managpaliiw idi unana. “No makitak ti langlangitmo, dagiti aramid ti ramramaymo, ti bulan ken dagiti bituen nga insaganam,” nautob daytoy a lalaki, “ania ti mortal a tao tapno sipapanunotka kenkuana, ken ti anak ti naindagaan a tao tapno taripatuem?”—Salmo 8:3, 4; 19:1, NW.
Gagangay laeng a masdaawtayo kadagiti nakaskasdaaw a parsua a narigat a tuladen ti tao. Maysa a nalatak a paset ti daniw kunana: “Ti Dios laeng ti makaaramid iti kayo.” Kaskasdi, ad-adda pay a nakaskasdaaw ti pannakaparsua ti maysa a maladaga, a mapasamak nga awan ti aniaman a panangiturong ti nagannak maipapan iti pannakaparsuana. No makitipon ti semilia ti ama iti itlog ti ina, dagus a maaramid dagiti plano iti DNA ti kabarbaro a naporma a selula tapno maparsua ti maysa nga ubing. Naikuna a “no maisurat,” dagiti instruksion iti uneg ti DNA “mabalin a punnuenda ti sangaribu nga 600-ti-panidna a libro.”
Pangrugian laeng daytoy. Agbingay ti orihinal a selula tapno agbalin a dua, kalpasanna uppat, kalpasanna walo, ken agtultuloyen. Kalpasan iti agarup 270 nga aldaw, maipasngayen ti ubing a buklen ti rinibu a milion a sibibiag a selula a nasurok a 200 a kita. Ket panunotem laengen nga adda iti uneg ti orihinal a selula dagiti impormasion maipapan iti pannakapartuat ti amin a kita ti nadumaduma a selula ken ti pannakapataud dagitoy iti apag-isu a tiempo! Matignayka kadi a mangidayaw iti Namarsua kadatayo? Paliiwem ti panangidayaw ti salmista a nagsurat: “Sika pinataudmo dagiti bekkelko; pinagtalinaednak a nalingedan iti tian ni inak. Idayawkanto agsipud ta iti nakaam-amak a pamay-an nakaskasdaaw ti pannakaaramidko.”—Salmo 139:13-16, NW.
Agamanga dagidiay nangadal kadagitoy a “milagro.” Kinuna ni Dr. James H. Hutton, presidente idi ti Chicago and Illinois State Medical Society, nga isut’ masmasdaaw unay iti “kinalaing ti selula a mangyallatiw iti adu nga impormasion maipapan iti kayat a kopiaen [dagiti gene ken chromosome] kadagiti selula a kasandi dagitoy. Talaga a nakaskasdaaw ta naammuan dagiti agsuksukimat a sientistami dagita a bambanag. Ngem sigurado nga adda Nadibinuan a Saririt a nangiplano kadagitoy a nakaskasdaaw a pasamak.”
Intuloy pay a kinuna ni Dr. Hutton: “Iti maysa a benneg ti paglaingak nga endocrinology, ti panangadal kadagiti maaramidan ti endocrine ken dagiti sakit a mainaig kadagitoy a glandula ti mangpabileg iti panamati nga adda la ketdi Nadibinuan a Pannakabalin a makinggapuanan kadagiti nakaskasdaaw a kinakomplikado ken panagandar dagitoy a nagpapateg a paset ti bagi.” Kastoy ti konklusionna: “Para kaniak, ti panangpanunot kadagitoy a pagsidsiddaawan ti kasla mangipapati kaniak nga adda mannakabalin-amin ken naan-anay a makaammo iti amin a nangiplano iti daytoy nga uniberso, nangirugi ken mangtartarawidwid iti dayta.”
Kalpasan dagitoy a kapaliiwan, inimtuod ni Dr. Hutton: “Isu kadi ket maysa a Dios a makaammo iti tunggal billit-tuleng a matnag?” Isut’ simmungbat: “No maminsan pagduaduaak dayta. Ket diak met mamati nga as-asikasuenna dagiti saan unay a nasken a banag a mapaspasamak iti inaldaw.”
Apay nga adu ti mangbigbig nga adda saririt kadagiti “milagro” iti panamarsua ngem pagduaduaanda ti kaadda ti maysa a Dios a maseknan iti sangatauan?
Pudno Aya a Maseknan ti Dios Kadatayo?
Adut’ agkuna a no adda Dios, dina koma palubosan nga agsagaba unay ti tattao. Maysa a gagangay a saludsod nga imtuoden ti dadduma ket, “Sadino ti ayan ti Dios idi kasapulanmi?” Maysa a tao a nakalasat iti panangpapatay dagiti Nazi kadagiti minilion idi Gubat Sangalubongan II ti nagladingit unay gapu iti panagsagaba a nakitana ta kinunana: “No madilpatam la koma ti pusok, mabalin a masabidonganka.”
Isu a para iti adu, narikut a problema dayta. Kas kinuna ti nadakamat itay a managpaliiw idi unana, nalawag ti ebidensia nga adda Namarsua no amirisentayo dagiti namilagruan nga urnos ken disenio ti bambanag. Kaskasdi, no Isu ket maysa a Dios a maseknan kadatayo, apay a palubosanna ti kasta a nakaro a panagsagaba? Tapno maawatan ken madaydayawtayo ti Dios iti umiso a pamay-an, masapul a maaddaantayo iti makapnek a sungbat iti dayta a nagpateg a saludsod. Sadino ti pakasarakantayo iti dayta?
Awisendaka a manggun-od iti kopia ti broshur a Pudno Aya a Maseknan ti Dios Kadatayo? Iti panid 32 daytoy nga Agriingkayo!, maammuam no kasano ti mangkiddaw iti kopia. Patienmi a ti naannad a panangusig kadagiti seksion a “No Apay a Pinalubosan ti Dios ti Panagsagaba” ken “Aniat’ Nagbanagan ti Iyaalsa?” ket mangipaay kenka kadagiti makapnek a sungbat.
[Dagiti ladawan iti panid 10]
Makitam kadi kadagitoy a bambanag ti ebidensia nga adda Namarsua?