Limapulo a Tawen a Panagpinta iti Porselana
KAS INSALAYSAY NI ALFRED LIPPERT
KAYAT idi ni nanang nga agbalinak a karpintero. Ngem indagadag ti maestrok kenkuana a pagtrabahuennak iti paktoria ti porselana nga asideg iti pagtaenganmi ditoy Meissen, Alemania. Apay a kasta unay ti panangidagadagna? Nadlawna a paglaingak ti ag-drawing. Ay-ayatek ni nanangko, ngem maragsakanak ta nagballigi ti maestrok a nanggutugot kenkuana. Isu nga idi agtawenakon iti 14, rinugiak a sinursuro no kasano ti agbalin a pintor ti sumagmamano kadagiti kapipintasan nga inaramid ti ima a porselana iti lubong.
Dandanin 300 a tawen a maar-aramid ti porselana ditoy Meissen. Naipasdek ditoy idi 1710 ti immuna a paktoria ti pudno a porselana iti Europa. Agarup 30 a tawen kalpasanna, nangipasdek ti paktoria iti maysa nga eskuelaan a pagadalan dagiti agtutubo iti arte ti panagpinta iti porselana. Daytoy nga eskuelaan, a silulukat pay laeng ken tartarawidwidan ti Meissen Porcelain Manufactory, ti nangrugiak kas managbabain a pintor iti porselana.
Nasursurok met iti eskuelaan dagiti nalimlimpio a pamay-an ti panag-sketch ken panagpinta iti ladawan dagiti sabong, kayo, animal, ken tumatayab. Daytoy a panagadal ti nagserbi a pamuon ti trabahok idi agangay.
Napasileng Wenno Saan?
Ti porselana ket saragasag a seramika a mabalin a pintaan iti dua a kangrunaan a pamay-an. Mabalin a pintaan ti seramika sakbay a mapasileng. Ngem aragaag ti di pay napasileng a seramika ken agsepenna ti kolor, isu a nakaan-annad ti panagpinta, tangay din makorehir ti kaaduan a kamali. Iti kasumbangirna, mabalin a pintaan ti porselana kalpasan a napasileng. Nagbalin a paglaingak ti kastoy a pamay-an ti panagipinta kadagiti sabong a dekorasion. Ramanen daytoy a trabaho saan laeng a ti panagpinta no di ket uray ti panangdisenio iti saggaysa a rineppet a sabong para iti tunggal pedaso ti porselana. Isu a tangay nasursuron ti pintor nga isentro ti panunotna ken liklikan dagiti pakasingaanna, masursurona nga usaren ti imahinasionna a mangputar iti napintas a banag.
Kalpasan ti panagpinta kadagiti sabong a dekorasion iti sumagmamano a tawen, rimmang-ayak agingga iti karirigatan a kategoria—ti panagpinta iti ladawan dagiti sibibiag a parsua. Ditoy a talaga a nakagunggona ti nasaksakbay a panagadalko nga agpinta kadagiti animal ken tumatayab.
Kararagsakan a Karit
Makaparagsak a karit ti panagpinta kadagiti animal, ikan, ken tumatayab agsipud ta masapul nga agparang a kasla agpayso ti tunggal parsua, saan a nakapirmi a kas iti sabong wenno kayo. Masapul nga adda ammo ti artist iti estruktura ken kababalin dagiti animal ken tumatayab nga ipimpintana. Kas pagarigan, adu kadagiti eksena nga ipintak ket addaan kadagiti atap nga animal, a pakairaman dagiti ugsa nga addaan iti nagdadakkel a nagsasanga a sara.
No maipapan iti panagsursuro kadagiti animal, ti mismo a panagpaliiwmo ti kasayaatan a pamay-an. Sumagmamano a tawenen ti napalabas, implanok ti agpinta iti agsasaganad a ladawan ti ikan, isu a gimmatangak iti para balay nga aquarium sa kinargaak iti amin a klase ti ikan. Adu nga oras a nagtugawkami ken baketko iti asideg ti aquarium, a nagpalpaliiw iti panagkuti ken kababalin ti tunggal klase ti ikan. Narugiak laeng ti nagpinta kalpasan a naobserbarak idan a naimbag.
Kasano ti Agbalin a Nalaing a Pintor?
No dadduma, damagendak dagiti gagayyem no kasano ti agbalin a nalaing a pintor ti porselana. Nalawag a rumbeng nga adda artistiko a saguday ti pintor, natadem a mata, ken natalna nga ima. Ngem saan la a dagita. Tapno agbalin a naballigi nga artist ti maysa a tao, rumbeng nga umiso ti panangmatmatna iti bagina, iti trabahona, ken iti dadduma a tattao. Ti nalaing a pintor ket maysa nga artesano a sanayenna ti bagina nga agtrabaho a naimbag tapno lallalo a lumaing. Ammona a malipatam dayta no saanmo nga usaren. Kanayon a makasursuro, tangay denggenna ti ibaga ti dadduma ken awatenna ti pammagbagada.
Adtoy ti maudi a punto. Ti aduan kapadasan nga artist ammona dagiti kalikagum ti kustomer. Dagiti tattao a gumatang iti inaramid ti ima a porselana dida kayat ti maysa a banag a mausar iti kada aldaw a maidulin iti apagbiit ket kalpasanna maibellengton ken masukatan. Kayat ti kustomer ti maysa a gapuanan ti arte, banag a napateg iti kultura—daydiay makaallukoy, mangparagsak iti puso, ken mangpasayaat iti biag ti agtagikua. Maragsakan ti pintor a maaddaan iti paset a mangpennek kadagidiay a tarigagay.
Panagpinta a Nangiturong iti Panamati iti Dios
Ti trabahok kas pintor ti nangparegta kaniak nga ad-adda a mangusig iti Biblia ken mangpatanor iti nabileg a pammati iti Dios. Kasano? Bueno, namin-adun a nakipagtrabahoak kadagiti eksperto iti tumatayab, napadasakon ti nag-sketch ken nagpinta kadagiti ilustrasion para kadagiti libro a putputarenda. Idi rinugiak ti nangaramid kadagita nga ilustrasion, namatiak iti ebolusion. Ngem ti nasinged a pannakilangenko iti sumagmamano nga autor ti nangiturong kadagiti saritaan maipapan ti nagtaudan ti biag. Ket dagita a saritaan ti nangbalbaliw iti panangmatmatko.
Ti nagsiddaawak ket nupay ebolusion ti patien ti amin nga eksperto, tunggal maysa adda bukodna a teoria, a masansan a maisimparat iti dadduma nga eksperto. Agingga iti matukodko, awan ti agpapada a teoria ti ebolusion. Gapuna, nakunak a no di makapagtutunos dagiti eksperto iti maymaysa a panangilawlawag iti ebolusion, kasano ngayen ti dadduma pay? Isu a diak mamatin iti ebolusion. Ti kakaisuna nga alternatibo ti ebolusion ket adda namarsua iti biag ditoy daga. Dayta ti nangrugian ti panamatik iti Namarsua kadatayo.
Maragsakanak unay ta maay-ayo dagiti tattao iti trabahok, ket mapnekak gapu iti daytoy. Dinto pulos agkupas ti panagayatko iti panagpinta wenno ti panagayatko iti porselana.
[Picture Credit Line iti panid 17]
Dagiti retrato iti panid 16 ken 17: Mit freundlicher Genehmigung der Staatlichen Porzellan-Manufaktur Meissen GmbH