Nakatulong a Nangispal iti Biagna

Intampok ti Disiembre 22, 1999 a ruar ti “Agriingkayo!” ti tema ti akkub a “Panangkidnap​—No Apay a Sangalubongan a Pangta.” Imbaga ni William Louis Terrell a daytoy a ruar ti “Agriingkayo!” ti nakatulong a nangispal iti biagna.

PASADO la bassit ti alas dies ti agsapa idi Biernes, Marso 10, 2000, pinaturongan ni Joseph C. Palczynski, Jr. iti paltog sana kinidnap ni Terrell iti balayna. Dagiti artikulo ti Agriingkayo! nga imbaga ni Terrell a linaglagipna kabayatan ti nakaam-amak a kapadasanna ket naglaon iti sumaganad a pammagbaga dagiti eksperto maipapan iti aramiden no makidnapka:

“Makikooperarka; dika sumuksukir. Masansan a dakes ti pannakatrato dagiti nakidnap no agsukirda, ket ad-adda a mapapatay wenno madusada.

“Dika aglagaw. Laglagipem a kaaduan a biktima malasatanda ti panangkidnap.”

“Makisaritaka no mabalin ken padasem ti makikomunikar. No maam-ammo a naimbag dagiti kidnaper ti kinataom, mabalin a saandaka a dangran wenno papatayen.

“Ibagam kadakuada [kadagiti kidnaper] dagiti kasapulam iti nadayaw a pamay-an.”

“Napaneknekanen a ti pannakisarita ket mangsalaknib iti nakidnap, kas ilawlawag ti libro a Criminal Behavior: ‘No ad-adda nga aginnammo ti biktima ken ti kidnaper, ad-adda a magustuanda ti maysa ken maysa. Ipakita daytoy a pasamak a kalpasan ti sumagmamano a panawen, saanton a dangran ti kidnaper ti kinidnapna.’”

Ti 53 anyos a ni William Terrell, a maysa kadagiti Saksi ni Jehova, inkagumaanna nga iyaplikar dayta a pammagbaga kabayatan ti dandani 14 nga oras a pannakakidnapna, a napaturongan iti paltog iti kaaduan dagita nga oras. Nangrugi ti nakaam-amak a kapadasan kalpasan a nagtuktok ni Palczynski iti ridaw ti pagtaengan ni Terrell iti maysa nga away nga asideg ti Interstate Highway 95, a sadiay a naibusan iti gasolina ti lugan a tinakaw ni Palczynski.

Kalpasan a naammuanna ti kasasaad ti estranghero, impanamnama ni Terrell a tulonganna. Nagkiddaw ni Palczynski iti sangabaso a danum ken pagluganan a mangipan kenkuana idiay Baltimore, Maryland, E.U.A. Imbaga ni Terrell nga iyurnosna nga adda mangitulod kenkuana idiay siudad ti Fredericksburg, Virginia, a mabalin a pagluganannanto iti bus a mapan iti destinasionna. Idi iteden ni Terrell ti sangabaso a danum iti estranghero, addan paltog a naipaturong kenkuana. Imbilin ni Palczynski nga itulod ni Terrell iti destinasionna.

Panangsurot iti Pammagbaga

Kabayatan ti panagmaneho ni Terrell iti I-95, sinurotna dagiti bilin ni Palczynski a taginayonenna ti kalkalainganna a kapartak ti panagmaneho ken saan nga agmaneho iti wagas a mangatrakar iti atension. Tangay nagtalinaed a kalmado, kinasarita latta ni Terrell ti 31-anyos a ni Palczynski, nga inyebkasna ti napasnek nga interesna kenkuana kas maysa a tao ken ti pannakaawatna kadagiti kasasaad a nangiturong iti panagam-ammoda. Inyestoria ni Palczynski a tallo nga aldaw kasakbayanna, sinarungkaranna ti nobiana a ni Tracy, a nakiinnukas kenkuana. Sadiay a pinaltogan ken pinatayna ti dua a gagayyem ni Tracy ken ti maysa a kaarruba a nagpanggep a makibiang idi pinilitna ni Tracy a kumuyog kenkuana. Idi agangay, nakalibas ni Tracy.

Karabiyanna, kabayatan ti panagregget ni Palczynski a mang-hijack iti maysa a lugan, napuntaan iti maysa kadagiti balana ti dua ti tawenna nga ubing a nakadangran unay ti panga ti ubing. Napuntaan met ti kotse a manmanehuen ni Jennifer Lyn McDonel. Nakalkaldaang ta napuntaan ni Jennifer nga isut’ nakatayanna, ket napuntaan iti maysa pay a bala ti bakante a tugaw ti maysa ti tawenna nga anakda. Agturturong idin da Jennifer ken ti asawana a ni Thomas iti Kingdom Hall dagiti Saksi ni Jehova, nga agpadada a mangiparang koma iti pasetda iti gimong iti daydi a rabii. Inlawlawag ni Sarah Francis nga ina ni Jennifer: “Idi la a rabii a dida intugot ti ubing idiay Kingdom Hall. [Ta no intugotda], duada koma a sangsangitanmi ita.”

Bayat a sitatanang nga intuloy ni Terrell a kinasarita ti kidnaper, imbaga ni Palczynski nga awan a pulos idi ti panggepna a mangdangran iti siasinoman ket talaga nga ay-ayaten ken kayatna a makadua ni Tracy. Inlawlawag ni Terrell: “Imbagak kenkuana a dinan maisubli ti napalabas ngem mabalinna a baliwan ti masakbayan, ket pinaregtak a sumuko laengen. Kinunak a sarungkarakto iti pagbaludan ken iyadalak iti Biblia.” Idi agangay, naipadamag a nanipud idi nagturpos ni Palczynski iti haiskul idi 1987, binusbosnan ti intero a panagbiagna, malaksid iti sangapulo a bulan, iti pagbaludan wenno institusion a mangas-asikaso kadagiti addaan iti deperensia ti isip wenno nawayawayaan gapu iti probation.

Babaen ti panangusar ni Terrell iti kapadasanna kas nabayagen a Kristiano a panglakayen, intultuloyna ti nagpakpakaasi iti mariribukan nga agtutubo babaen ti panangdakamatna kadagiti agpayso a pakasaritaan manipud iti Biblia. Kas pagarigan, nasaona ti kapadasan ti maysa a naimbag a lalaki a ni David nga ari ti Israel, a kasta unay idi ti panaggustona iti asawa ni Urias, maysa kadagiti soldado iti buyot ni David. Idi nasikogan ni David ti babai, inyurnosna a mapapatay ni Urias iti gubat. Idi sitataktika a naiparupa ken David dagiti basolna, sipapasnek a nagbabawi ket naisubli kenkuana ti anamong ti Dios.​—2 Samuel 11:2–12:14.

Nakigayyem ni Terrell iti pugante, sana inawagan iti birngasna a Joby. Idi nagsardengda iti maysa a tiendaan ket naibaon ni Terrell a gumatang iti taraon ken iti maaw-awit a telebision, imbaga ni Palczynski nga ad-adu pay ti patayenna no agipulong ni Terrell. Nagtulnog ni Terrell tangay naamirisna a nariribuk ti kasasaad ti pugante. Idi agangay, kalpasan a nabuya ni Palczynski ti pannakaipadamag dagiti krimen nga inaramidna iti alas 11 a brodkas ti damag, inarakup ni Palczynski ni Terrell, sa siuulimek a nagpukawen iti maysa a siudad idiay Baltimore.

Agarup makalawas kalpasanna, natiliw ni Palczynski iti maysa a balay a nangkautibuanna iti adu a tattao. Ni Terrell, a nadakamat idin ti pugante, ket naayaban a tumulong iti negosasion. Nakalkaldaang ta saan a nagballigi dagitoy, ket idi Marso 22, sinerrek dagiti polis ti balay ket pinaltoganda ni Palczynski nga isut’ nakatayanna. Awanen ti sabali pay a nasaktan.

Kalpasanna, nangala ni Terrell iti agarup 600 a kopia ti ruar ti Agriingkayo! nga imbagana a nakatulong a nangispal iti biagna. Ginasut kadagitoy ti inranudna kadagiti sabsabali. Agyaman ni Terrell ta nakayugaliannan a basaen ti napateg nga impormasion iti Agriingkayo! ket patienmi a kastanto met ti aramidenyo.

[Ladawan iti panid 26]

Ni William Terrell