Panangsalaknib Kadagiti Delikado a Ngipen
MANO ti tawenmo idi nangrugi a nagtubo dagiti ngipenmo? Nalabit masdaawka a makaammo a nangrugi dayta bayat nga addaka pay laeng iti aanakan—mabalin a sakbay pay nga ammo ni nanangmo nga isut’ masikog! Napateg ngarud para iti asidegen nga agbalin nga ina a kanayon nga umdas ti magun-odanna a sustansia, agraman ti calcium, phosphorus, protina, ken bitamina.
Dagiti ngay kappasngay? Sigun kadagiti eksperto, dagiti agbiberon a maladaga ti kangrunaan a nalaka nga agrukab, a masansan a mangrugi iti makinngato a sango a ngipen. Ngem kasano a mapasamak daytoy? Nakairuaman ti dadduma a maladaga ti maturog bayat a nakabiberonda iti gatas, juice, naasukaran a danum, wenno soda. Adda karbohidrato dagitoy a nalaka a mabangles a likido a kaykayat a pagbiagan dagiti bakteria. Inton agangay, agpataud dagiti bakteria kadagiti acid a mangdadael iti ngipen dagiti maladaga—nangnangruna no agtalinaedda iti ngipen iti agpatnag. Nasapa nga agtuppol ti dadduma a maladaga a nakaro ti panagrukab ti ngipenda, a mangdadael iti itatanor dagiti permanente a ngipenda.
Kasano a masalakniban ti nagannak dagiti delikado a ngipen ti maladagada? Maisingasing ti panangpasuso, nangnangruna ta nadalus ti gatas ti ina ken nabaknang kadagiti antibody. Ngem no mausar ti biberon, kuna dagiti eksperto a maisardeng koman dayta kalpasan a 18 bulanen ti maladaga. Isingasingda met a mausar la koma ti biberon a pagpasuso—ket saan a kas ay-ayam a susuen ti maladaga. Kanayonanna, no mapaturog a nakabiberon ti maysa a maladaga, nasaysayaat nga amang no danum laeng ti nagyanna. Kalpasan ti tunggal panagpasuso, mabalin nga usaren ti nadalus, nalamuyot a lupot a pangdalus iti ngipen ti ubing.
Malapdan ti nasapa a panagrukab. Napateg ti umiso a panangaywan kadagiti ngipen—wen, uray kadagiti ngipen ti maladaga!