Dagiti Tulip ti Nakatulong Kadakuada nga Agbiag
BAYAT ti naudi a bulbulan ti Gubat Sangalubongan II idiay Europa, sinerraan dagiti Nazi ti amin a pagnaan ti taraon a maipatulod babaen ti barko kadagiti kangrunaan a siudad iti laud ti Netherlands. Nakalkaldaang dagiti epektona, kas paneknekan ti adu a nakalasat iti dayta a panawen.
Gagangay a kasapulan ti maysa a tao iti agarup 1,600 agingga iti 2,800 a calorie iti kada aldaw. Ngem idi Abril 1945, ti inaldaw a rasion nga agdagup iti nagbaetan ti 500 ken 600 a calorie iti kada aldaw ti pinagbiag ti dadduma kadagiti agnanaed idiay Amsterdam, Delft, Ti Hague, Leiden, Rotterdam, ken Utrecht. Maipagarup a kas resultana, kabayatan ti Bisin iti Kalam-ek ti 1944/45, di kumurang a 10,000 a sibilian ti natay gapu iti malnutrision.
Sigun iti maysa a nakalasat a ni Susan Monkman, inkeddeng ti pamiliana a manganda laengen iti bagas ti tulip. “Talaga a nakersang dagiti bagas ti tulip,” kuna ni Monkman. “Dida lumukneng uray no ilingtam. Nupay kasta, naragsakankami a nagngalngal a naimbag ken siaannad kadagitoy. Kalpasanna, nagsakit dagiti karabukobmi iti sumagmamano nga aldaw.” Tapno saan unay a kumaro ti panagsakit ti karabukob, nalaokan dagiti bagas iti sumagmamano a carrot wenno sugar beet no adda dagitoy.
Ti 100 a gramo iti bagas ti tulip ket aglaon iti agarup 148 a calorie, 3 a gramo a protina, 0.2 a gramo a taba, ken 32 a gramo a karbohidrato. Gapuna, ti di makaay-ayo a pannangan iti bagas ti tulip ti mabalin a nakatulong a nangispal iti adu a taga Netherlands manipud iti bisin.
Ti nakaro a kinaulpit ti tao iti padana a tao, a dagiti pagarigan ket saan a malipatan ti adu, iyilustrarna no kasano a kasapulan unay ti sangatauan ti pannakatungpal ti kari iti Biblia: “Adda baro a langlangit ken maysa a baro a daga nga ur-urayentayo sigun iti kari [ti Dios], ket kadagitoy nga agtaeng ti kinalinteg.”—2 Pedro 3:13.
[Picture Credit Line iti panid 16]
International Bloembollen Centrum, Holland