Natalged Pay Laeng Aya ti Ageroplano?
UPPAT a dadakkel a pangpasahero nga eroplano ti na-hijack. Uppat ti na-kras. Nadadael dagiti nalatak nga estruktura a kas iti Twin Towers. Maulit-ulit a maipabuya iti telebision ti panangdungpar ti 767 a jetliner iti maysa kadagiti Twin Towers.
Dagiti panangatake idi Setiembre 11, 2001 ti nangitunda kadatayo iti nakaam-amak a panawen ti panangraut dagiti terorista. Nangrugin nga inusarda dagiti eroplano nga instrumentoda a mangibanag iti makapapatay a panggepda, ket nagbalinen dagiti eroplano a bomba a mangpataud iti nakaro nga uram no bumtak dagitoy.
Nagbanaganna, rimsua ti baro a kita dagiti mabutbuteng a biahero iti eroplano: Dagidiay natalged idi ti riknada ket maam-amakda itan di la ket ta rumaut dagiti terorista. Kanayonanna, kimmaro ti panagbuteng ti adu nga ageroplano gapu iti agsasaruno a makapapatay nga aksidente dagiti eroplano a di nainaig iti terorismo kalpasan ti Setiembre 11.
Annugotentayo a nanam-ay ti ageroplano. Minilion iti intero a lubong ti di makabael iti dayta. Ngem para iti dadduma, nasken nga ageroplanoda a kanayon. Dagidiay addaan iti panggedan a makasapul iti kanayon a panagbiahe gapu iti negosio, di maliklikan ti panageroplanoda. Masansan nga ageroplano dagiti Kristiano a misionero ken ministro iti naunday a biahe nga agpapan agawid manipud iti destinoda. Uray kadagiti napanglaw, ti eroplano no dadduma ti kakaisuna a pagluganan no masapul ti kellaat a pannakaagas. Ken rinibu a piloto ken tripulante ti mangmangged babaen iti panageroplano.
Adu kadagitoy a biahero iti tangatang, a nalabit mabutbutengda met a mismo, ket nasken a pagkalmaenda ti isip dagiti madanagan nga assawa ken mabutbuteng nga annakda sakbay a pumanawda iti pagtaenganda. Ket yantangay nagbalinen a napeggad dagiti gagangay a panagrubbuat iti eropuerto, pampanunoten dagiti biahero no natalged pay laeng ti panageroplano kas matarigagayan a pamay-an ti panagbiahe.
Tapno masungbatan dagita a pakadanagan, nakiuman ti Agriingkayo! kadagiti eksperto iti kinatalged, agtartrabaho iti eropuerto, opisial ti eroplano, ken agmanmantener kadagiti eroplano. Kasla agtutunosda amin iti daytoy: Nupay ti panageroplano ti maysa kadagiti katalgedan a pagluganan, adda dagiti baro a peggad a makasapul kadagiti baro a pamay-an ti panangpasayaat iti kinatalged ti panagbiahe ti publiko.
Salaysayen dagiti sumaganad nga artikulo dagiti parikut a nairaman ken no ania ti maaramidam a mismo tapno nataltalged ken nanamnam-ay ti panageroplanom.