Dagiti Asukar a Napateg nga Elemento ti Biag
ASUKAR—nalabit us-usarem dayta a pangpasam-it iti aniaman manipud kadagiti keyk agingga iti kape. Ngem ammom kadin a ti asukar ket mabalin a mangirugi iti panagbalbaliw iti biolohia, daydiay mabalin a mangartap iti imbunga ti pannakatakuat iti DNA?
Kadagiti kallabes a tiempo, inadal dagiti sientista no kasano nga agusar dagiti selula iti simple nga asukar kas iti glucose a mangaramid kadagiti nagdadakkel a molekula “a mangartap iti kadakkel ken kinakomplikado ti DNA ken protina,” kuna ti pagiwarnak a New Scientist. “Nairaman dagiti asukar iti dandani tunggal aspeto ti biolohia, manipud panangilasin kadagiti pathogen wenno pakaigapuan ti saksakit, agingga iti panagbalay ti dara, ken ti iseserrek ti semilia ti lalaki iti itlog ti babai.” Maigiddan iti dayta, dagiti depekto iti pannakabukelda ket nainaig iti umad-adu a sakit, kas iti depekto ti masel a maawagan iti muscular dystrophy ken reuma. “Mangrugrugi pay laeng a maawatan dagiti biologo ti nadumaduma nga epekto dagitoy nga asukar iti bagi ti tao,” sigun iti report, “ngem bayat a maaw-awatanda, masapul nga anagenda manen dagiti nabayagen a kapanunotanda maipapan kadagiti narikut a panagandar ti biag.”
Pinartuat dagiti sientista ti sao a “glycome” a mangtukoy iti amin nga asukar a mangbukel iti maysa a selula wenno organismo, no kasano a ti sao a “genome” saklawenna ti amin a pakabuklan dagiti gene. Ngem ti maysa a glycome ti selula ket “nalabit narikrikut nga amang ngem iti genome,” kuna ni Ajit Varki, direktor ti Glycobiology Research and Training Center idiay University of California, San Diego, E.U.A. Apay a nakarikrikut ti glycome?
Iti uneg dagiti selula, dagiti simple nga asukar—dagiti monosaccharide—ket agkakanaig tapno mapataud dagiti polysaccharide. Agtitipon met dagitoy kas dadakkel a molekula a makalaon iti nasurok a 200 a yunit dagiti nasimsimple nga asukar. Gapu iti kasla agpaypayso a pannakatulad ti kasasaad dagitoy nga asukar, a napateg a paset iti panagandarda, “ti maysa a molekula a buklen ti innem laeng a yunit ti monosaccharide ket mabalin nga addaan iti nakaskasdaaw a 12 a bilion a posible nga estruktura,” kuna ti New Scientist.
Iti panangdeskribirna iti nakaro a parikut a naipasango kadagiti managsukisok iti daytoy rumangrang-ay a tay-ak ti glycobiology, kinuna ni Varki: “Kas man la ita laeng a natakuatanmi ti kontinente ti Amianan nga America. Ita, masapul a mangibaonkami kadagiti agsawar a grupo tapno maammuan no kasano kadakkel dayta.”
Nalawag nga awan kaimudingan dagiti komplikado a mekanismo ti sibibiag a selula iti kasta unay a kinasaririt ti Katan-okan a Persona. Para iti adu a tattao, makapaamanga daytoy a kinapudno. Kasta met aya ti panagriknam?—Apocalipsis 4:11.