Dagiti Naparaburan a Tawen?
ALAS seis media idin iti nakalamlamiis nga agsapa idiay Soweto, South Africa. Masapul a bumangonen ni Evelyn.a Iti balayna nga awanan iti pagpaimeng, talaga a nakarigrigat daytoy.
Inin-inayadna nga impaigid iti kama dagiti agreuma a tumengna. Nagtugaw sana impadpad-eng agingga nga in-inut a nabang-aran ti ut-ot dagiti gurongna. Inkagumaanna ti timmakder. Immasug gapu iti ut-ot. Nagbannikes, sa kas iti ‘rumsa a ginuyodna ti bagina,’ sibabannayat a nagna ni Evelyn a napan iti banio.—Eclesiastes 12:5.b
‘Yaman pay!’ kinuna ni Evelyn iti bagina. Saan la a nagyaman ta sibibiag iti sabali manen nga aldaw no di ket gapu ta naigarawna ti agut-ut-ot a bagina.
Nupay kasta, adda sabali pay a pakadanaganna. “Dayta ti ‘kinamananglilipatko,’ ” kinuna ni Evelyn. Sagpaminsan a mapukawna dagiti tulbekna, ngem nasiglat pay laeng ti panunotna. “Ikarkararagko a saanak koma nga agkabaw,” kinuna ni Evelyn, “kas iti dadduma a lallakay ken babbaket.”
Idi kaub-ubinganna, pulos a di pinampanunot ni Evelyn no ania ti mapasamak no nataenganen dagiti tattao.c Ngem dina napupuotan a nagbiit a limmabas ti adu a tawen, ket itan ti panagut-ot ti bagina ti kanayon a mangipalagip kenkuana nga agtawenen iti 74.
Dadduma a nasaysayaat ti kasasaadda ngem ni Evelyn ken awanan iti nakaro a sakit ken di masiksikoran, mabalin a matmatanda dagiti maudi a tawen ti biagda kas naparaburan a tawtawen. Kas ken patriarka nga Abraham, mabalin a madanonda ti “naimbag a kinalakay, lakay ken napneken.” (Genesis 25:8) Dadduma napasaranda “dagiti dakes nga aldaw ken tawen” ket naikunada laeng: “Awan ragsakko iti biag.” (Eclesiastes 12:1, Ti Baro a Naimbag a Damag Biblia) Iti maysa a surbey, adu a tattao ti mangibilang a makapadanag ti panagretiro isu nga insingasing ti magasin a Newsweek a mabaliwan ti termino a naparaburan a tawtawen iti “Dagiti Nariribuk a Tawen.”
Ania ti panangmatmatmo iti kinanataengan? Ania ti sumagmamano kadagiti rigat a sarsarangten dagiti nataengan? Saan kadi a maliklikan ti panagkabaw no lumakay wenno bumaketen ti maysa a tao? Ania ti maaramidan tapno maaddaanka iti natalna a panunot iti naparaburan a tawtawen ti biag?
[Footnotes]
a Iti daytoy a serye nabaliwan ti dadduma a nagan.
b Nabayagen a mabigbigbig dagitoy a sasao iti nagkauna a libro ti Biblia nga Eclesiastes kas mannakaawat a naindaniwan a pannakailadawan dagiti rigat iti panaglakay ken panagbaket.
c Iti daytoy a serye, ti termino a nataengan tuktukoyenna dagiti lallakay ken babbaket.