Panangmatmat iti Lubong
“Iti kada tawen, dandani innem a milion nga ubbing—maysa iti tunggal lima a segundo—ti matay gapu ta kurang ti taraonda.”—JAMES T. MORRIS, DIREKTOR EHEKUTIBO TI WORLD FOOD PROGRAMME
◼ Nakadanonen iti 1,300 ti bilang dagiti natay gapu iti Bagyo a Katrina, a nangapektar iti makin-abagatan nga Estados Unidos idi Agosto 2005.—THE WASHINGTON TIMES, E.U.A.
◼ Ti ginggined idiay makin-amianan a Pakistan ken India idi Oktubre 2005 ti nangkeltay iti nasurok a 74,000 a biag.—BBC NEWS, BRITANIA.
◼ Sigun iti damag, “dandani 1.2 a milion a tattao ti matay gapu kadagiti aksidente iti kalsada kada tawen.”—SOUTH AFRICAN MEDICAL JOURNAL, SOUTH AFRICA.
Dagiti Makapadanag a Gameng
Agpangpangadua dagiti mangtartarawidwid iti Iglesia Romana Katolika no kasano a masalakniban ti gamengna iti arte a naaramid idi kinolonia ti Espania ti Peru. Dagita ti mangpappapintas kadagiti simbaan sadiay, ngem iti napalabas a nasurok nga innem a tawen, natakawan ti 200 a simbaan. Idiay laengen Cuzco iti napalabas a 15 a tawen, natakaw ti agarup 5,000 nga obra ti arte, kangrunaanna dagiti nangina a lamina a naaramid iti oleo. Awan ti makaammo iti eksakto a bilang dagiti natakaw iti intero a pagilian. Tapno malapdanda dagiti mannanakaw, dadduma a simbaan inlemmengdan dagiti obra ti arteda, ngem iti sidong dagiti di mayanatup a kasasaad. Iti maysa a parokia, kinnan dagiti utot ti sumagmamano kadagiti urnongna a lamina a naaramid iti oleo.
Kinakurang Dagiti Nalaing a Trabahador iti Finland
Dagiti industria a mangipapaay iti serbisio idiay Finland ket agkasapulan unay kadagiti nalaing a trabahador a nakaturpos kadagiti bokasional a pannakasanay, kas kadagiti karpintero, tubero, aglanlanang, kantero, mekaniko, makinista, ken nars. Apay? Maipagpaganetget ngamin ti panagturpos iti nangatngato nga edukasion, sigun iti periodiko a Helsingin Sanomat. “Saan a nainkalintegan a ti intero a henerasion ket pagbalinentayo kas dodoktor ken nakaturpos iti masters of arts and sciences,” kinuna ni Heikki Ropponen ti Federation of Finnish Retailers. “Ad-adda koma a maipangpangruna ti bokasional a pannakasanay.”
Makaay-ayo a Desision ti Korte Idiay Francia
Idi Disiembre 1, 2005, ti Paris Court of Appeal imbilinna iti ministro a mangtartarawidwid iti linteg ken urnos ti Francia a palubosanna dagiti Saksi ni Jehova a mangkita kadagiti dokumento ti polisia a nakailistaanda kas nakabasol ken nangibilang kadakuada kas maysa a “kulto” idi 1996. Naisagana dayta a listaan babaen kadagiti nalimed a panangbista. Nailimed met ti linaon dagiti dokumento tapno ‘masalakniban [kano] ti seguridad ti Gobierno ken dagiti umili.’ Nupay kasta, natakuatan ti korte nga “awan kaimudingan” ti naaramid “a panangusig kadagiti epekto” ti ar-aramid dagiti Saksi a naammuan kadagiti dokumento. Nupay kasta, namin-adun a nausar dayta a listaan tapno maikalintegan ti pannakamaltrato dagiti Saksi ni Jehova idiay Francia.
Ti “Berde a Dakkel a Pader”
Ti aglablabes a panagpaarab, panangkalbo kadagiti kabakiran, tikag, ken panangsakdo iti aglaplapusanan a reserba a danum ti makagapu a timmapok ken timmikag ti nalawa a paset ti China. Dayta ti gapuna a rinugian dagiti autoridad iti China “ti kadakkelan iti lubong a proyekto a mangsalaknib iti aglawlaw ken gameng ti nakaparsuaan,” kuna ti New Scientist. “Babaen iti daytoy a programa, a nagdinamag kas ti ‘berde a dakkel a pader,’ naimula dagiti kayo iti nakalawlawa a disso tapno mapataud ti bangen a manglapped iti panagtayab ti napuskol a tapuk.” Naimula met dagiti ruot ken babassit a kayo tapno mapadam-eg ti natapuk a daga. Nanipud panangrugina idi 1978, dandani 50 a porsiento ti nalpasen iti dayta a proyekto. Ti intero a proyekto saklawenna ti 35 a milion nga ektaria a kakaykaywan ken nakaimulaan dagiti naandur iti tikag.