Nadudog a Puso, Nargaay a Pammati

“NAGKAIWARA dagiti bangkay, ket saanmi a masarakan ti dati a nagsaadan ti balaymi,” kinuna ti maysa a lalaki a taga-Sri Lanka kalpasan a dinadael ti tsunami ti purokda idi Disiembre 2004. Iti artikulo maipapan iti dayta a didigra, ti editor iti maysa a narelihiosuan a pagbasaan ti nagkuna nga isu ket “agngarngariet nga agkararag” no dadduma.

Adu dagiti mangibilang kadagiti natural a didigra kas panangdusa ti Dios. Maysa a kolumnista ti nangiladawan iti napigsa a bagyo kas “tungpa ti Dios.” Iti Estados Unidos, adda dagiti lider ti relihion a mangibilang nga ebkas ti “pungtot ti Dios” kadagiti “managbasol a siudad” dagiti pasamak a kas iti bagyo a Katrina. Idiay Sri Lanka, dagiti militante a Budista impabasolda kadagiti Kristiano ti napasamak a tsunami, nga ad-adda a nangpakaro iti panagginnura ti relihion. Patien ti mangay-aywan iti maysa a templo dagiti Hindu a nakapungtot ti dios a ni Shiva gapu ta dakes ti kabibiag dagiti tattao. Kuna ti maysa a lider ti Budismo iti Estados Unidos maipapan kadagiti natural a didigra: “Ditay ammo no apay a mapaspasamak dagitoy. Saantay pay ketdi nga ammo no apay nga addatayo ditoy.”

No makakitakayo kadagiti ladawan ti nadadael a balbalay, bangbangkay, ken malmaldaangan a tattao, napanunotyo kadin, ‘Apay nga ipalpalubos ti Dios ti nakaro a panagsagaba?’ Wenno naibagayo kadin iti bagiyo, ‘Adda la ketdi naimbag a rason ti Dios a mangipalubos a mapasamak dagitoy a bambanag nupay dina impalgak dagita a rason’? Dagiti sumaganad nga artikulo usigenna dagitoy a bambanag. Salaysayenna met ti sumagmamano a praktikal nga addang a mabalin nga aramiden dagiti tattao tapno maliklikanda ti pannakadangran ken ipapatay no dumteng ti natural a didigra.

[Ladawan iti panid 3]

Saan nga ammo ti adu a lider ti relihion no apay nga ipalpalubos ti Dios dagiti natural a didigra