Dagiti Bendision a Napatpateg Ngem iti Kinabaknang

NAKABALBALLIGI ni Jon iti trabahona idiay Estados Unidos. Uray agkabannuag pay, napasiarnan ti lubong ken adun a kuarta ti naurnongna. Nagpintas ti balayda nga agassawa ken nanam-ay ti panagbiagda. Sigun iti adu, nagadut’ bendision dagita nga agassawa.

Usigem ti maysa pay a pagarigan. Iti nasurok a 5,000 nga aplikante, maysa ni Kostasa kadagiti 80 laeng a napili nga agtrabaho iti nalatak a banko iti Europa. Iti sumagmamano la a tawen, namin-adu a naingato ti saadna agingga nga isun ti mangimaton iti maysa kadagiti kangrunaan a departamento iti sabali pay a banko. Sakbay nga immikkat iti dayta a trabaho tapno mangbuangay iti bukodna a kompania, ti makatawen a sueldona ket ad-adun ngem iti masapulan ti kaaduan a tattao iti unos ti panagbiagda. Para kenkuana, aglaplapusanan ti bendisionna.

Nupay kasta, kombinsido da Jon ken ni Kostas nga adda dagiti bendision a napatpateg ngem iti material a kinabaknang. Kas pagarigan, ni Jon ket maysa itan a boluntario a mannursuro iti Biblia a tumultulong iti sabsabali tapno agbalinda a nasingsinged iti Dios. Kinunana: “Nakitak ken napaneknekak a mismo a ti material a kinabaknang ket saan a mangyeg iti kinaragsak. Mangibus iti panawen ti panangikagumaan a manggun-od ken mangmantener iti dayta isu a bassiten ti panawenmo a mangaramid iti dadduma pay. Iti kasumbangirna, ti panagbiag maitunos kadagiti prinsipio ti Biblia ket mangyeg iti adu a bendision, kas iti naragragsak nga amang a panagasawa, talna ti panunot, ken nadalus a konsiensia.”

Umasping iti dayta ti kinuna ni Kostas: “Saan a kayat ti Dios nga agbalintayo a nabaknang unay ken naluho. Talaga a patiek a ti aniaman nga ipapaayna kadatayo nga ad-adu ngem iti inaldaw a kasapulantayo ket masapul nga usarentayo a maitunos iti pagayatanna.” Itay nabiit, rinugian ni Kostas ken ti pamiliana ti agadal iti sabali a lenguahe tapno ad-adu ti masuruanda maipapan kadagiti prinsipio ti Biblia. Kinunana: “Napaneknekanmi a naragragsak ti mangted ngem ti umawat.”—Aramid 20:35.

Wen, napaneknekan da Jon ken Kostas a napatpateg nga amang dagiti naespirituan a bendision ngem kadagiti material a kinabaknang. Sigun ken Daniel Gilbert a propesor idiay Harvard, dagiti eksperto iti salun-at iti isip “pinulpullo a tawenen nga ad-adalenda ti pakainaigan ti kinabaknang iti kinaragsak, ket kinuna ti kaaduan kadakuada nga ad-adda a mangparagsak ti kinabaknang no ilung-awna dagiti tattao manipud iti nakaro a kinapanglaw tapno masagrapda ti kalkalainganna a panagbiag.” Ngem innayonna, “Bassitto laengen ti maipaayna a ragsak kalpasan dayta.”

Leksion a Masansan a Nasaem Sakbay a Maipapuso

Kinuna ti maysa nga eksperto a sikologo: “Apaman a nakalung-awen ti maysa manipud iti rigat, nakaskasdaaw ta saan unayen a mangparagsak kenkuana ti iyaadu pay ti masapulanna.” Uray idi rugrugi ti napalabas a siglo, dayta a leksion ti nasursuro ti maysa a reporter idi ininterbiuna ni Andrew Carnegie, maysa kadagiti nangirusat iti industria ti asero ken maysa idi kadagiti kabaknangan ditoy lubong. “Didak rumbeng nga apalan,” kinuna ni Carnegie iti dayta a reporter. “Kasano koma a matulongannak ti kinabaknangko? Sesenta anyosakon ken diak matunawen ti taraonko. Itedko ti amin a minilionko no la ket ta agsubli ti kinasalun-at ken kinaagkabannuagko.”

Kalpasan dayta, kinuna ti reporter: “Pagammuan ta imbaw-ing ni Mr. Carnegie ti panagkitana ken sisesennaay a kinunana iti nakapsut a timek a nabuyogan iti di mailadawan a rikna, ‘No la koma mabalin, sidadaanak a mangited iti amin a sanikuak basta sumalun-atak manen.’” Idi agangay, umasping met laeng iti dayta ti kinuna ni J. Paul Getty, maysa pay a multimilionario a bimmaknang unay gapu iti negosiona a langis: “Saan a kanayon a mangparagsak ti kuarta. Mabalin a mangpaliday pay ketdi.”

Nalabit umanamongka iti nangisurat iti Biblia a nagkiddaw: “Saannak nga ikkan iti kinakurapay wenno uray kinabaknang. Bay-annak a mangalun-on iti taraon a naibilin nga agpaay kaniak, tapno saanak a mapnek ket pudno nga ilibakka ket kunaek: ‘Siasino ni Jehova?’ ken tapno saanak a kumurapay ket pudno a takawak ken tabbaawak ti nagan ti Diosko.”—Proverbio 30:8, 9.

Inlawlawag ni Ari Solomon iti nagkauna nga Israel: “Nagbalinak a dakdakkel ken rimmang-ayak nga ad-adda ngem iti asinoman nga adda idi iti kasakbayak idiay Jerusalem.” Ngem innayonna: “Isuamin kinaubbaw ken panangkamkamat iti angin.” Kinunana pay: “Ti bendision ni Jehova—isu dayta ti mangpabaknang, ket awan rigat nga inayonna iti dayta.”—Eclesiastes 2:9-11; 5:12, 13; Proverbio 10:22.

Ti Dalan nga Agturong Kadagiti Agnanayon a Bendision

Nalawag ngarud a magun-odantay laeng ti pudno ken manayon a kinaragsak kalpasan a siuumiso a napennektayon dagiti naespirituan a kasapulantayo. No ipangpangrunatayo ti Dios, ad-addanto a makapnek ken makagunggona ti tunggal aspeto ti biagtayo.

Naimbag laengen ta maikunatayo a ti kuarta ket saan a kankanayon lattan a pakaigapuan ti panagsikor. Ipasigurado kadatayo ti Biblia ti tiempo nga awanton a pulos ti naagum ken mananggundaway a komersio. (1 Juan 2:15-17) Agarinto dagiti nalinteg a prinsipio ti Dios iti iyegna a baro a sistema ti bambanag. Agbalinto a paraiso ti daga kas iti damo a panggep ti Dios idi pinagtaengna ti immuna a pagassawaan iti dayta. Nagsayaatto ketdin nga imatangan inton ti intero a daga ket mapno iti ragsak, talna, ken ayat!—Isaias 2:2-4; 2 Pedro 3:13; 1 Juan 4:8-11.

Saanto a makauma ti biag iti dayta a tiempo. Agpadpada nga ipaayto ti Dios dagiti material ken naespirituan a bendision bayat a tungpalenna ti orihinal a panggepna nga agbiag nga agnanayon dagiti tattao iti paraiso a daga. Manamnamatayo nga amin ket addaanto iti pagtaengan, makapnek a trabaho, ken aglaplapusanan a taraon. Mapukawton a naan-anay ti kinapanglaw.—Salmo 72:16; Isaias 65:21-23; Mikias 4:4.

Saanto a maupay ti amin a sipapasnek a mangipakita iti pammatida ken Jehova, ti Dios nga isursuro ti Biblia. (Roma 10:11-13) Nainsiriban ngarud nga ikagumaantayo itan a gun-oden dagiti bendision a napatpateg ngem iti kinabaknang!—1 Timoteo 6:6-10.

[Footnote]

[Blurb iti panid 8]

Ad-adda a makagunggona ti biagtayo no ipangpangrunatayo ti Dios

[Blurb iti panid 8]

Naragragsak ti biagtayo no nainsiriban ti panangusartayo iti kuarta