Nabannogka Unay Kadin?
ITI intero a lubong, dakkel a problema ti panangbalanse iti trabaho ken pamilia. Maysa a reperensia ti nagkuna a gapu iti ‘globalisasion, baro a teknolohia, ken ekonomia nga inaldaw a napartak ti tarayna, saanen a nalaka a pagsinaen ti trabaho ken pamilia.’ Dagita a panagbalbaliw ket nangyeg iti awan kaaspingna a kinabaknang. Ngem adda pagdaksanna. Kuna ti maysa a mannurat: “Nalabes ti panagtrabaho, nagadu ti pakakumikoman, ken mapakpaksuyan ti minilion kadatayo. Iti ababa a pannao, nabambannogtayo unayen.”
Malaksid kadagita, makapaupay dagiti epekto ti nabiit pay a panagsuek ti ekonomia. Adu a mangmangged iti intero a lubong, agop-opisina man wenno obrero, ti naawanan iti trabaho ken pagtaengan. Nalabit pampanunotenda a no la koma ta ad-adda pay a maigaedda ti agtrabaho.
Usigentayo ti kasaknap dagitoy a problema:
▶ Kadagiti mangmangged iti Europa, 6 iti kada 10 ti mabambannog unay iti trabahoda.
▶ Kadagiti empleado iti Estados Unidos, 1 iti kada 3 ti makarikna a napaksuyanen iti trabahona.
▶ Nasurok a 2 iti kada 3 a Canadiano ti marigatan a mangbalanse iti pamilia ken trabahoda.
▶ Mapattapatta a nasurok nga 600 a milion a trabahador, wenno 22% iti amin a trabahador iti lubong, ti agtartrabaho iti nasurok nga 48 nga oras kada lawas.
Ipakita dagita a bilang ti nakakaskas-ang a kasasaad dagiti tattao. Sigun iti dadduma a panagadal, ti napaut ken agbaliwbaliw nga oras ti panagtrabaho ket nainaig iti panagsakit, pannakadadael dagiti relasion, di nasayaat a panangpadakkel kadagiti annak, panagsina, ken diborsio.
Sika met ngay? Nalabes kadi unay ti panagtrabahom? Wenno maysaka kadagiti minilion nga awanan ita iti trabaho? Tartarigagayam kadi a nasaysayaat koma ti panangbalansem iti rebbengem iti trabahom ken pamiliam? No wen, kasano a pumayso dayta?
[Kahon/Ladawan iti panid 3]
TI “MAIKADUA A TRABAHO”
“No makaawidakon,” kuna ti maysa a mangmangged a babai, “nasken nga isaganak ti pangrabii, agdalusak iti balay, aglabaak, sukonek dagiti ubbing, tulongak ida kadagiti asaynmentda, ken siertuek a makadigusda sakbay a paturogek ida. Kalpasanna, napaksuyanakton.” Iti mapattapatta a 1.2 a bilion a mangmangged a babbai iti lubong, minilion kadakuada ti mangar-aramid iti dayta a makabannog a “maikadua a trabaho,” a kas met iti adu a lallaki. Ngem sigun iti surbey, masansan a di kayat dagiti lallaki nga aramiden dagiti trabaho iti balay. Babbai ti kaaduanna a mangar-aramid kadagita, mangmanggedda man iti ruar ti balayda wenno saan.