Taraon a Kalluto iti Balay sa Maipan iti Opisina Gagangay Idiay Mumbai

INALDAW nga alas singko pay laeng iti bigat ket mapankan iti pagtrabahuam. No pangngaldawen, kanemon ti magusgustuam a taraon a naluto idiay balayyo. Gagangay daytan iti rinibu nga agtartrabaho idiay Mumbai, India gapu kadagiti dabbawala a mangitultulod kadagiti taraon a kalluto iti balbalay idiay India.a

Nasayaat nga Oportunidad

Idi arinunos ti maika-19 a siglo, ti Mumbai a maaw-awagan idi iti Bombay ket rumangrang-ayen a sentro ti komersio. Dagiti negosiante a Briton ken Indian ket agdaliasat iti adayo no mapanda kadagiti opisinada. Nabuntog dagiti lugan, sa manmano ken agaaddayo pay dagiti restawran. Praktikal ngarud no iti balay laengen a maluto ti pangngaldaw. Isu a nangtangdan dagiti agop-opisina a negosiante kadagiti mangitulod iti pangngaldawda a naluto iti balayda. Nakita ti maysa a negosiante a nasayaat dayta nga oportunidad. Nangala kadagiti awanan trabaho nga agtutubo kadagiti bario tapno regular nga agitulodda kadagiti taraon manipud balbalay agingga kadagiti opisina. Kasta ti nangrugian ti nakapigpigsan a negosio.

Magusgustuan pay laeng ti adu dagiti taraon a naluto iti balay. Uray no ad-adu itan ti restawran, nalaklaka ken kaykayat latta ti adu ti taraon a naluto iti balay. Mapili met ti taraon ti dadduma gapu iti kasasaad ti salun-atda wenno iti relihionda. Kas pagarigan, adda dagiti tattao a saan a mangmangan iti lasona wenno bawang. Adu kadagita ti mailalaok kadagiti taraon iti restawran isu a maliklikan dagita no aggapu iti balay ti taraon a maitulod iti opisina.

Mapangnamnamaan Unay a Serbisio

Iti panaglabas ti tawtawen, awan unay ti nagbaliwan ti simple a sistema ti panagitulod, malaksid iti kaadu ti maitulod. Ita, nasuroken a 5,000 a lallaki agraman sumagmamano a babbai ti inaldaw nga agitultulod iti nasurok a 200,000 a pangngaldaw manipud iti balbalay iti lugarda agingga kadagiti opisina iti nadumaduma a paset ti siudad nga addaan iti nasurok a 20 milion nga umili. Agarup 60 a kilometro ti kaadayo ti pagitulodan dagiti dabbawala, a magna ti dadduma—nga agiduron iti kariton a naglaon iti 30 wenno 40 a pagbalonan—idinto ta agbisikleta wenno agtren met ti dadduma. Iti aniaman a wagas, maitulodda ti umiso a taraon iti umiso a tao ken oras. Kinapudnona, iti tunggal 6 a milion nga itulodda, 1 kano laeng ti kamali! Apay a kasta kasayaat ti serbisioda?

Idi 1956, ti negosio dagiti dabbawala ket nairehistro kas “charitable trust” nga addaan kadagiti mamangulo ken dadduma pay nga opisial. Adda met dagiti grupo ti trabahador a tunggal grupo ket iwanwanwan ti maysa a superbisor. Nupay kasta, aminda ket makinkukua iti kompania—ket dayta kano ti sekreto ti balligida. Kinapudnona, awan pay ti napasamak a welga sipud idi nangrugi ti negosio nasurok a 100 a tawenen ti napalabas.

Adda ID dagiti dabbawala ken nalakada a mailasin gapu ta nakakawesda iti puraw a polo nga ababa wenno atiddog ti manggasna, nalawa a pantalon, ken puraw a kallugong. Mamultada no maladawda, malipatanda ti agkallugong, aglanganda nga awan nasayaat a rason, wenno matiliwanda a nakainum bayat ti trabaho.

Ti Inaldaw a Rutinada

No 8:30 ti agsapan, adda nakaluton iti balay ti kostumer, nalabit a ti asawa, ken naisagananan ti pangngaldaw iti pagbalonan wenno dabba. Dagiti dabba ket addaan kadagiti agtutuon a pagkargaan ken metal a pangtengngel ken pagiggaman. Kolektaen ti dabbawala ti sumagmamano a pagbalonan iti maysa a lugar, sana ibisikleta wenno ikariton dagita sa mapan a dagus iti estasion ti tren a pagkikitaanda kadagiti kagrupona. Sadiay a paglalasinenda dagiti pagbalonan sigun iti destinasion dagita a kas iti ar-aramiden dagiti kartero.

Kada pagbalonan ket adda pagilasinanna a letra, numero, ken kolor. Ipakita dagita ti naggapuan ti taraon, ti asideg nga estasion ti tren, ti pakaitulodanna nga estasion, ti nagan ti pasdek, ken numero ti kadsaaran. Dagiti pagbalonan a maitulod iti kada lugar ket mapagtitipon iti atiddog a kayo a kasla kahon a makalaon iti aginggat’ 48 a pagbalonan. No sumangpeten ti tren, maikabil dagitoy iti espesial a benneg iti likud ti drayber. Inton makagteng ti tren iti maysa kadagiti dadakkel nga estasion, mapaglalasin manen dagitoy sa maipan iti pakaitulodanda nga estasion. Mapaglalasinda manen sadiay sa maibisikleta wenno maikariton dagita agingga iti makinkukua.

Naannayas ken saan a nagastos dagita a pamay-an ti panagitulod. Saan met a matrapik ti dabbawala ta iti igid ti kalsada wenno nagbabaetan dagiti lugan ti pagnaanna. Isu a no 12:30 ti aldaw, naituloden ti taraon iti pakaipananna nga opisina. Kalpasan a nakapangaldaw ti nagaget a dabbawala, kolektaenna dagiti awan nagyannan a pagbalonan iti nagbaetan ti 1:15 ken 2:00 ti malem. Isublina dagita iti balay ti makinkukua tapno mainnawan ken maisagana manen para iti sumaruno nga aldaw. Napartak ken naannayas dayta a proseso manipud rugi aginggat’ ungto a kas iti lumba a panagpipinnasa!

Nanumo a Serbisio Ngem Maap-apresiar Unay

Adu ti nakadlaw iti nagsayaat a serbisio dagiti dabbawala. Inadal ti dadduma nga organisasion ti sistema ti panagitulod dagiti dabbawala tapno maipakatda dayta iti dadduma a benneg ti negosio. Adda payen dagiti naaramid a dokumentario a pelikula maipapan kadagiti dabbawala. Ti Forbes Global Magazine impaayanna ida iti sertipikasion a Six Sigma gapu iti dandani awan mintisna a serbisioda. Nairamanda payen iti The Guinness Book of World Records ken kadagiti panagsirarak iti Harvard Business School idiay Estados Unidos. Pinasiar met ida dagiti prominente a tattao a pakairamanan ti maysa a prinsipe ti Britania a nangapresiar unay iti trabahoda nga uray la inawisna ti dadduma kadakuada iti kasarna idiay England.

Agus-usar itan dagiti dabbawala iti kompiuter ken selpon no agalada iti order ken agirekordda maipapan kadagiti kostumerda. Ngem saan a nagbalbaliw ti wagas ti panagitulodda. No dandanin pangngaldaw, kampante ti adu a mabisin nga agop-opisina iti Mumbai ta ammoda a dandanin sumangpet ti taraonda a kalluto idiay balayda ken saan a pulos a maladaw dayta!

[Footnote]

[Ladawan iti panid 11]

Panangikarga iti tren kadagiti maitulod a “dabba”

[Ladawan iti panid 11]

Ti “dabba” ket addaan nasinasina a pagkargaan a mapagtutuon tapno nalaka a mabitbit ken maibiahe

[Ladawan iti panid 12]

Nakasursuro ti adun a negosiante iti naannayas a sistema ti panagitulod dagiti “dabbawala”