Panangmatmat iti Lubong
Idiay Tanzania, ti promedio a serbian ti maysa a doktor ket 64,000 a tao.—THE CITIZEN, TANZANIA.
‘Di kumurang a 1 a bilion a napanglaw ti agsagsagaba iti nakaro a malnutrision, ket dinto maragpat ti Millennium Development Goal ti United Nations ti panggepna nga adu koma ti maksay iti bilang dagiti agbisbisin iti lubong inton 2015.’ —SCIENCE, U.S.A.
Idi 2008, $385 bilion ti naganansia “ti 100 a kadadakkelan a kompania ti armas iti intero a lubong,” nangatngato dayta iti $39 bilion ngem iti ganansiada idi 2007.—STOCKHOLM INTERNATIONAL PEACE RESEARCH INSTITUTE, SWEDEN.
Manmano a Mikrobio?
“Sigun iti panagsirarakmi, ti sobra a kinadalus ti aglawlaw bayat ti kinaubing ti mabalin a pakaigapuan ti nangato nga inflammation level (ti natural a reaksion ti bagi no madangran) inton adultodan, nga agresulta iti ad-adu a kita ti sakit,” kuna ni Thomas McDade, associate professor iti Northwestern University, idiay Illinois, U.S.A. Iti maysa a panagadal, napagdilig ti ubbing a Filipino ken Americano. Naduktalan a kaaduanna, dagiti Filipino ket nakaptan iti ad-adu nga impeksion idi dumakdakkelda. Ngem maisupadi iti ninamnama, adayo a nababbaba ti C-reactive protein level iti dara dagiti adulto a Filipino. No adda inflammation, ngumato ti C-reactive protein level. Ania ti maadaltayo? No nairuam dagiti ubbing kadagiti kadawyan a bakteria, mabalin a proteksionto dayta kadakuada kadagiti makapapatay a sakit inton adultodan.
Awanen Dagiti Nasayaat a Kababalin iti Trabaho
Maburiboran ti adu nga employer idiay Finland ta kasla awan a pulos ammo dagiti baro nga aplikante maipapan iti umiso a kababalin tapno makapagtalinaedda iti trabaho. “Ipagarup dagita a baro nga empleado a mabalinda ti sumrek wenno agawid iti oras a kaykayatda,” kinuna ni Anne Mikkola a manedyer ti restawran idi ininterbiu ti Finnish Broadcasting Company. Rumsua met dagiti problema iti panagkawkawes ken kondukta. Masansan a nasken nga isuro dagiti employer no ania a kawes ti di maitutop iti trabaho, nangruna kadagiti agtartrabaho iti serbisio publiko. Saan met a mapagduma dagiti empleado ti trabaho ken pribado a biagda no adda gagayyem a bumisita iti pagtartrabahuanda.
“Nasolbar” ti Panaginnagaw iti Teritoria
Ti nabayagen a panaginnagaw ti Bangladesh ken India iti bassit nga isla iti Baybay ti Bengal ket nasolbar idi immadalem ti baybay. Awan agnanaed iti dayta a puro a New Moore Island ti naganna kadagiti taga-India ken South Talpatti Island kadagiti taga-Bangladesh. Kurang a dua a metro ti kangato dayta nga isla iti patar ti baybay. Ngem kadagiti nabiit pay a retrato ti satellite, limneden dayta. “Ti saan a nasolbar ti dua a nasion iti adun a tawen a negosasion ket sinolbar ti panagbara ti globo,” kinuna ni Propesor Sugata Hazra, iti Jadavpur University School of Oceanographic Studies idiay Calcutta.