Dagiti Babassit a Mansion Idiay Istanbul

● Dagiti kayo a balay ti billit ket gagangay a makita iti adu a paset ti lubong. Maitutop dagita a panganan, paglinongan, pagumokan, pangaywananda kadagiti sibongda, ken pagkamanganda no adda aganup kadakuada ken no dakes ti paniempo. Idiay Istanbul, ti balbalay dagiti billit ket nadisenio a kalanglanga ti dadakkel a balay. Ti sumagmamano ket kasla mansion, moske wenno palasio.a Pagaammo dagita kas balay dagiti kalapati, mansion dagiti billit, ken palasio dagiti tumatayab.

Idi pay maika-15 a siglo a naaramid dagiti kadadaanan kadagita a balay ti billit, ken nadisenioda maibatay iti arkitektura dagiti Ottoman. Simple idi dagita, ngem sipud idi maika-18 a siglo, naaramid dagitan a naranga ken nalabor. Addaan ti dadduma iti pagkargaan iti taraon ken danum, pasilio, ken beranda a pannakabalkonahe dagiti billit. Kadawyan a naisaad dagita iti sikigan ti pasdek a masansan a mainitan, saan a pagdalanan ti napigsa nga angin, ken di madanon dagiti pusa, aso, ken tao. No dadduma, saan laeng a nairanta dagita kadagiti billit no di ket pangarkos metten kas paset ti intero a disenio ti pasdek. Makita dagita iti sikigan ti babassit wenno dadakkel a moske, ken uray kadagiti publiko a paginuman, libraria, rangtay, ken pribado a balbalay.

Nakalkaldaang ta madaddadaelen ti adu kadagita a babassit a mansion gapu iti nadumaduma nga epekto ti paniempo. Naperdi ti dadduma gapu ta inggagara a dinadael dagidiay saan a mangipatpateg kadagita. Manmano laengen ita ti makita a kakasta. Ngem no agpasiarka idiay Istanbul ken interesadoka iti nagkauna nga arkitektura, padasem a sapulen dagita a napipintas ken babassit a balay a naimontar kadagiti sagumaymay dagiti patakder. Ita ta ammomon ti maipapan kadagita, maragsakankanto a makakita kadagita a babassit a mansion inton agpasiarka idiay Istanbul.

[Footnote]