Nadisenio Kadi?
Ti Kola ti Sandcastle Worm
● Tarimaanen dagiti siruhano ti natukkol a tultulang babaen kadagiti landok a pin, plate, ken screw, ngem dadakkel dagita no mausar iti babbabassit a tulang. Agingga iti nabiit pay, dagiti managsirarak ket di pay nakapartuat iti kola a tumangken uray nabasa ti pakaikaptanna iti bagi ti tao. Ngem idi inadalda ti sandcastle worm, nakasarakda iti posible a solusion!
Usigem: Dagiti partikulo ti darat ken shell ti pangsangal ti sandcastle worm iti kasla tubo a balayna iti danum. Babaen iti kola a mapataud iti glandula iti barukongna, pagdedekketenna ti tunggal partikulo. Adayo a napigpigket daytoy a kola ngem kadagiti maus-usar ita nga aramid ti tao. Naglaon dayta iti naisalsalumina a grupo dagiti protina a no mapagtitipon, nagbiit a tumangken uray adda iti danum! Gapuna, maaw-awagan ti sandcastle worm kas nakalalaing a mason. Kuna ni Russell Stewart iti University of Utah a daytoy bassit nga animal ti nangsolbar kadagiti “komplikado a problema a nainaig iti panamagdedekket.”
Nangaramid dagiti managsirarak kadagiti sintetiko a klase ti kola ti sandcastle worm a napigpigket nga amang ngem iti patauden dayta nga animal. Masapul a biodegradable (marunaw a bukbukodna) ti kola a mausar inton agangay kadagiti siled a pagoperaan tapno inton mausar a mamagsilpo iti natukkol a tultulang, marunaw dayta bayat nga umim-imbag ti tulang. No epektibo iti tattao, naisangsangayanto dayta a takuat iti tay-ak ti medisina.
Ania ti makunam? Naiparna la kadi ti naisalsalumina a kola ti sandcastle worm? Wenno nadisenio dayta?
[Ladawan iti panid 26]
Inanamaen dagiti managsirarak a mapaimbagda dagiti natukkol a tulang a didan agusar kadagiti landok
[Picture Credit Line iti panid 26]
Sandcastle worm: © Peter J. Bryant, University of California, Irvine