Kapadasan Dagiti Naballigi a Pamilia nga Addaan Siuman
SAANKAMIN A BASTA AGKABBALAY LAENG
Adda iti poder ni Philip ti 20 anyos a balasangna a ni Elise. Isu ti mangas-asikaso kadagiti trabaho iti balay. Idi agangay, inkasar ni Philip ni Louise. Agkatunosanto ngata da Louise ken Elise?
Louise: Idi damo, marigatankami unay. Kaay-ayok nga asikasuen dagiti trabaho iti balay ken kayatko met a siertuen a siak ti agtagibalay.
Elise: Binaliwan ti madrastak ti urnos ti balay. Imbellengna ti adu kadagiti alikamenmi. Naminsan, nagdalusak ngem di umiso ti nangikabilak kadagiti alikamen. Diak ngaminen ammo no pangikabilak pay kadagita isu a nakaunget. Nagsinnungbatkami ket makalawas a diak pinagpagunian.
Louise: Kinunak naminsan ken Elise, “Diak ammo ti mabalin pay a mapasamak. Diak maanusanen ti kastoy a kasasaad.” Karabianna, inasitgannak sa nagpadispensar. Inarakupko ket nakasangitkami a dua.
Elise: Pinagtalinaed ti madrastak ti sumagmamano a retratok iti diding. Saan met nga inikkat ni Papang ti silaw nga inkabilko iti sala. Kasla bassit la a banag ti inaramidda. Ngem dagita ti nangiparikna kaniak a saan met gayam nga interamente a nagbalbaliw ti amin iti balaymi. Agyamanak met ta as-asikasuen ti madrastak ti adingko no agpasiar kadakami. Dua a tawenen ti napalabas. Mangrugrugin a mariknak nga agpayson a miembro ti pamiliami ti madrastak.
Louise: Panagriknak ket saankamin a basta agkabbalay laeng ken Elise. Nasingedkami payen nga aggayyem.
“NAPATPATEG TI PANAGKAYKAYSA”
Saggatlon ti annak da Anton ken Marelize sakbay a nagkasarda innem a tawenen ti napalabas.
Anton: Agkakaduakami a sangapamiliaan no adda aramidenmi kas iti panagpasiar. Mangilatangkami met iti panawen iti tunggal anakmi. Ngem limmabas pay ti sumagmamano a tawen sakbay a limmag-an ti riknami iti maysa ken maysa. Narisuten ti kaaduan a problemami.
Marelize: Para kadakami, nasken a mariknami a dagiti annak ket “annakmi” imbes nga “annakmo ken annakko.” Malagipko nga adda idi tiempo a nagreklamoak. Kasla ngamin saan a patas ti panangdisiplina ti Anton iti maysa kadagiti annakko ken pinagtugawna ti anakna a babai iti sango ti lugan. Nasursurok a napatpateg ti panagkaykaysa ngem iti aniaman kas iti panagtugaw iti sango. Ikagkagumaanmi ti agbalin a patas nupay saan nga eksakto nga agpapada ti panangtratomi iti amin nga annakmi.
Likliklikak met nga iyestoria dagiti naragsak idi a kanito iti immuna a pamiliak tapno di marikna dagiti siumanko a kasla sabsabalida. Imbes ketdi, iyeb-ebkasko ti panangapresiarko iti agdaman a pamiliami.
‘KOMENDASION NGA UMUNA’
Uppat a tawenen ti napalabas sipud idi nagkasar da Francis ken Cecelia. Tallo ti agkabannuag nga annak ni Cecelia idinto ta maysa ti barito ni Francis.
Francis: Ikagkagumaak ti agbalin a nalaka a maasitgan ken di agbalin nga arsagid. Agkakaduakami a mangan ken us-usarenmi dayta a gundaway tapno makapagsasaritakami. Iparparegtak met a pagtitinnulonganmi ti dadduma a trabaho iti balay yantangay pagimbagan dayta ti intero a pamiliami.
Cecelia: Adda tiempok iti tunggal anakmi. Denggek dagiti pakadanagan ken pakasuronanda. Bayat nga agsasaritakami a sangapamiliaan, ikagkagumaanmi ti mangted nga umuna iti komendasion sakbay a bagbagaanmi ida kadagiti nasken a parang-ayenda. No met agkamaliak, aminek dagita ken naimpusuan nga agpadispensarak.
PINADAKKEL TI DUA NGA AGSIUMAN
Agtawen ni Yuki iti 20. Dinan nakita ti amana sipud idi lima ti tawenna. Idi agangay, nakiasawa ni nanangna ken ni Tomonori. Idi 10 ti tawen ni Yuki, natay ni nanangna. Lima a tawen kalpasanna, inkasar ti agsiuman kenkuana ni Mihoko. Dua ngaruden ti agsiuman ken Yuki.
Yuki: Idi inkeddeng ti agsiuman kaniak ti mangasawa manen, napanunotko a diak kasapulan ti madrasta. Adu unayen dagiti panagbalbaliw iti pamiliak. Diak maawat ti kasasaad isu nga adayo idi ti riknak iti madrastak.
Mihoko: Nupay dinak pinilit ni lakayko a mangipateg iti siumanna a kas iti ar-aramidenna, inyasidegko ti riknak ken Yuki. Inkagumaanmi a di baliwan ti nakairuamanna agraman dagiti narelihiosuan nga aktibidadna, paglinglingayanna, ken ti rinabii a panaggigiddanmi a mangan ken panagsasaritami kalpasanna. Ad-adda a naawatak ti riknana kalpasan a napagsasaritaanmi ti maipapan iti ipapatay ni nanangna.
Idi nagsikogak, maseknankami maipapan ken Yuki. Kayatmi nga iparikna a dungdungnguenmi latta. Idi addan adingna, sinuruanmi ni Yuki a mangdigus ken mangsukat iti diaper ni Itsuki. Kinomendaranmi ni Yuki iti imatang ti sabsabali gapu iti itutulongna. Nakapaspasig ni Itsuki ken ni Yuki. Sakbay pay a nasursurona ti sasao a “papa” wenno “mama,” ammonan nga ibalikas ti niinii—manong iti Iloko.
Yuki: Kas siuman, natural laeng a mariknak nga agmaymaysaak ken maipupueraak. Mailawlawagko ti kasasaadko iti sabsabali ngem kasla didak maawatan. Ngem maragsakanak ta talaga a tinulongandak dagiti padak a Kristiano. Saanen nga adayo ti riknak iti madrastak. Nasayaat dagiti ibalbalakadna kaniak ket maibagak kenkuana ti amin a problemak.
[Blurb iti panid 9]
Agan-anuskayo! Posible nga agbalin a naragsak ken naballigi dagiti adda siumanna a pamilia