Nagsaem ti Kinaawan Hustisia!
IDI 2010, nawayawayaan ni Michael kalpasan a naibalud idiay Texas, U.S.A. iti 27 a tawen gapu iti panangrames—krimen a dina inaramid. Nawayawayaan ta napaneknekan nga inosente babaen iti DNA test nga awan pay idi nasentensiaan. Idi agangay, naduktalan dagiti autoridad no siasino dagiti pudno a nakabasol. Ngem saan idan a mabalin nga idarum ta nagpason ti naikeddeng a tiempo a maarestoda gapu iti krimenda.
Ti hustisia ket maitarayan ti adu a kriminal. Idiay Britania kas pagarigan, “nagdoble dagiti di nasolbar a kaso ti pammapatay iti napalabas a 10 a tawen. Gapuna, umad-adu ti madanagan a di kabaelan dagiti polis ken korte a solbaren ti naranggas a krimen,” impadamag ti The Telegraph.
Idi Agosto 2011, narigatan dagiti polis iti Britania a mangkontrol iti sabali pay a kita ti krimen—ti nakaro a panangriribuk idiay Birmingham, Liverpool, London, ken iti dadduma pay a lugar. Dagiti di maanawa a manangriribuk ket nangpuor, nangbuong iti tawtawa dagiti tiendaan, sada nagtakaw. Kas resulta, saan la a nadadael dagiti negosio, balbalay, luglugan, no di ket uray dagiti pagsapulan. Ania ti motiboda? Adu ti agkuna a gapu iti nakaro a kinaagum. Ngem para iti dadduma, ti inaramid dagiti manangriribuk ket kasla reaksionda laeng kadagiti pagarupda a kinaawan hustisia. Sigun iti dadduma a komentarista, dagita a manangriribuk ket mabalin a dagiti dismayado, “nabaybay-an” nga agtutubo nga agnanaed kadagiti nakurapay a komunidad ken awanan gundaway nga umasenso.
Kinuna ti maysa a karakter ti Biblia nga agnagan Job: “Agpatpatulongak, ngem awan kinahustisia.” (Job 19:7) Adu met ita ti agpakpakaasi a maipaayanda koma iti hustisia. Ngem kaaduanna a dida maipangpangag. Nupay kasta, adda kadi asinoman a makapagpatingga iti kinaawan hustisia? Wenno minamaag laeng kadi ti mangnamnama nga iti masanguanan, ad-addanton nga agraira ti kinahustisia iti lubong? Tapno maammuantayo ti makapnek a sungbat, masapul a sukimatentayo ti dadduma kadagiti ramut ti kinaawan hustisia.