Ania ti Napasamaken iti Respeto iti Bagi?

NO APAY A NAPATEG TI RESPETO ITI BAGI

Dagiti tattao nga adda respetoda iti bagida agtalekda a kayada a sanguen dagiti problema iti biag. Saanda a nalaka a sumuksuko.

Ipakita ti research a dagiti nababa ti panagkitada iti bagida ket dakdakkel ti posibilidadna a maaddaan iti anxiety, depression, ken eating disorder. Dakdakkel met ti posibilidadna nga agbartek ken agdrogada.
Dagiti tattao nga adda respetoda iti bagida saanda nga ikomkompara ti bagida iti dadduma, isu a nalaklakada a makibagay kadagiti makalangenda ken maaddaan kadagiti nadekket a gagayyem. Ngem dagidiay bassit ti respetoda iti bagida kanayon a dagiti kamali ti kitkitaenda a mangdadael iti panaggagayyem.
Dagiti tattao nga adda respetoda iti bagida ket napigsa latta ti pakinakemda uray no maipasangoda kadagiti pakarigatan. Saanda nga ipalubos a dagita ti manglapped kadakuada a manggaw-at kadagiti arapaapda. Ngem dagidiay bassit ti respetoda iti bagida padakkelenda dagiti babassit a problema isu a nalakada laeng a sumuko.

TI MABALINMO NGA ARAMIDEN

Makigayyemka kadagidiay tumulong kenka tapno dumakkel ti respetom iti bagim. Makikaduaka kadagiti tattao a mangipakpakita iti respeto, kadagidiay mangpampanunot iti pagsayaatam, ken kadagidiay tumulong kenka tapno dumakkel ti respetom iti bagim.

“Ti pudno a gayyem agayat iti amin a tiempo ken maysa a kabsat a mapangnamnamaan no adda rigat.”—Proverbio 17:17.

Tumulongka. No naimbagka ken tumultulongka uray kadagidiay awan ti maisubadda kenka wenno uray kasla awan ti mangap-apresiar kadagiti nasayaat a maar-aramidam, agbalinka a naragsak ken mariknam nga adda pategmo.

“Naragragsak ti mangted ngem ti umawat.”—Aramid 20:35.

Tulongam dagiti annakmo tapno masursuroda a respetuen ti bagida. Ti maysa a pamay-an a maaramidyo dayta ket palubosanyo ida a mangsolbar kadagiti bukodda a problema agingga a kayada. Dayta ti tumulong kadakuada tapno masursuroda no kasano a sanguen wenno solbaren dagiti problema. No masursuroda nga aramiden dayta, dumakkel ti respetoda iti bagida saan laeng nga ita no di ket uray inton dadakkeldan.

“Sanayem ti ubing iti dalan a rumbeng a papananna; uray inton lumakay saannanto a panawan dayta.”—Proverbio 22:6.

Saksi ni Jehova a mangyad-adal iti Biblia iti maysa a babai iti café.

TI AR-ARAMIDENMI

Dagiti gimong ken ti programa dagiti Saksi ni Jehova a panangyadal iti Biblia ket tumultulong kadagiti tattao tapno sumayaat ti biagda ken dumakkel ti respetoda iti bagida.

DAGITI LINAWAS A GIMONGMI

Kadagiti linawas a gimongmi, maragragsakankami a dumngeg kadagiti palawag a naibatay iti Biblia. Masansan a karaman kadagita dagiti suhestion no kasano ti maaddaan iti respeto iti bagi. Awan ti bayadna dagiti gimongmi ken mabalin nga umatender ti amin. Kas pagarigan, masursurom kadagiti gimongmi . . .

no apay nga ipatpategnaka ti Dios
no ania ti pangusaram iti biagmo
no kasano ti maaddaan iti nalagda ken permanente a panaggagayyem

Kadagiti gimongmi, maam-ammom met dagiti pudno a gagayyem a ‘mangisakit’ iti maysa ken maysa.—1 Corinto 12:25, 26.

Tapno maammuam ti ad-adu pay maipapan kadagiti gimongmi, birokem ti ababa a video nga Ania ti Maar-aramid iti Kingdom Hall? iti jw.org/ilo.

TI PROGRAMAMI A PANAGADAL ITI BIBLIA

Iyaw-awismi ti libre a panagadal iti Biblia babaen ti libro nga Agbiagka a Naragsak iti Agnanayon! Daytoy a maadal a libro ket naglaon kadagiti epektibo a saludsod a makatulong iti agadal nga agrason maibatay kadagiti teksto. Adda met dagiti nagpipintas a piktiur ken makapainteres a video a mangpalaka iti panagadal. Makatulong kadagiti tattao ti programami a panagadal iti Biblia tapno maaddaanda iti respeto iti bagida ken tapno sumayaat ti biagda.

Tapno maammuam no kasano a pagsayaatam ti pannakipagadalmo iti Biblia kadagiti Saksi ni Jehova, birokem ti ababa a video nga Apay nga Adalem ti Biblia? iti jw.org/ilo.