Ti Sekreto ti Kinaragsak

KAYATTAYO amin ti agbalin a naragsak, di ngamin?⁠— Ngem manmano ti tattao a pudno a naragsak. Ammom kadi no apay?⁠— Saanda ngamin nga ammo ti sekreto ti kinaragsak. Ipagarupda a ti pananggun-od iti adu a material a sanikua ti sekreto ti kinaragsak. Ngem no magun-oddan dagitoy, saan nga agpaut ti kinaragsakda.

Daytoy ti napateg a sekreto. Kinuna ti Naindaklan a Mannursuro: ‘Naragragsak ti mangted ngem ti umawat.’ (Aramid 20:35) No kasta, ania ti sekreto ti kinaragsak?⁠— Wen, ti panangted ken panangtulong kadagiti sabsabali. Ammom kadin dayta?⁠—

Palawaenta pay daytoy. Kinuna aya ni Jesus a saan a naragsak ti tao nga immawat iti regalo?⁠— Saan. Saan a kasta ti imbagana. Magustuam ti maaddaan kadagiti regalo, di ngamin?⁠— Kastatayo amin. Maragsakantayo no makaawattayo kadagiti nasayaat a banag.

Ngem kinuna ni Jesus a naragragsaktayo pay no mangtedtayo. Gapuna, siasino ti ammom a nangted iti kaaduan a banag kadagiti tattao?⁠— Wen, ni Jehova a Dios.

Kuna ti Biblia a ti Dios “mangted iti biag ken anges ken amin a bambanag iti amin a tattao.” Ikkannatayo iti tudo manipud langit ken kasta met ti lawag ti init tapno dumakkel dagiti mula ket adda pagtaraontayo. (Aramid 14:17; 17:25) Di pakasdaawan nga awagan ti Biblia ni Jehova a “ti naragsak a Dios”! (1 Timoteo 1:11) Ti panangted kadagiti sabsabali ti maysa kadagiti mangparagsak iti Dios. Ket no mangtedtayo, agbalintayo met a naragsak.

Ita, ania ti mabalintayo nga ited kadagiti sabsabali? Ania ti makunam?⁠— No dadduma, kasapulan ti kuarta tapno makapagregalo. No iti tiendaan ti pangalaam iti regalo, masapul a bayadam dayta. Gapuna, no kayatmo ti mangted iti kasta a regalo, mabalin a kasapulan nga agurnongka iti kuarta agingga nga adda umanay nga igatangmo iti regalo.

Ngem saan nga amin a regalo ket gatangen. Kas pagarigan, iti nadagaang nga aldaw, makapabang-ar ti sangabaso a nalamiis a danum. Isu a no itedmo dayta a regalo iti tao a mawaw, mariknam ti ragsak nga itden ti panangted.

Mabalin nga addanto tiempo nga aglutokayo ken ni nanangmo iti tinapay. Naimas dayta. Ngem ania ti aramidem iti dadduma kadagita a tinapay tapno ad-adda pay a naragsakka imbes a kanem amin?⁠— Wen, mabalinmo nga iregalo ti dadduma kadagita iti maysa kadagiti gagayyemmo. Kayatmo kadi nga aramiden dayta sagpaminsan?—

Ti Naindaklan a Mannursuro ken dagiti apostolna ammoda amin ti kinaragsak ti panangted. Ammom kadi no ania ti intedda kadagiti sabsabali?— Isu dayta ti kasayaatan a banag ditoy lubong! Ammoda ti kinapudno maipapan iti Dios, ket siraragsak nga inranudda daytoy a naimbag a damag kadagiti sabsabali. Inaramidda daytoy a dida pulos pinabayadan ti intedda.

Maysa nga aldaw, adda naam-ammo ni apostol Pablo ken ti naimbag a gayyemna, ni adalan a Lucas, a maysa a babai nga agtarigagay met a mangtagiragsak iti panangted. Naam-ammoda ti babai iti asideg ti karayan. Napan sadiay da Pablo ken Lucas gapu ta nadamagda nga adu ti mapmapan agkarkararag sadiay. Ket agpayso dayta gapu ta idi nakagtengda sadiay, nakitada ti sumagmamano a babbai nga agkarkararag.

Rinugian ni Pablo nga ibaga kadagitoy a babbai ti naimbag a damag maipapan ken Jehova a Dios ken ti Pagarianna. Lidia ti nagan ti maysa kadakuada, ken nagimdeng a naimbag. Kalpasanna, kayat ni Lidia ti mangaramid iti banag a mangipakita a magustuanna a talaga ti naimbag a damag a nangngegna. Gapuna, indagadagna kada Pablo ken Lucas: “No impatoyo a matalekak ken Jehova, sumrekkayo iti balayko ket agyankayo.” Ket inawisna ida a mapan iti pagtaenganna.​​—Aramid 16:13-​15.

Naragsakan ni Lidia a mangsangaili kadagitoy nga adipen ti Dios. Ay-ayatenna ida gapu ta isuda ti timmulong kenkuana a nangammo iti maipapan kada Jehova ken Jesus ken no kasano a makapagbiag nga agnanayon dagiti tattao. Naragsakan gapu ta naikkanna da Pablo ken Lucas iti taraon ken paginanaan. No kasta, naragsakan ni Lidia a nangted gapu ta talaga a kayatna ti mangted. Dayta koma ti laglagipentayo. Mabalin nga adda mangibaga kadatayo a nasken nga agregalotayo. Ngem no saantayo a talaga a kayat nga aramiden dayta, saantayo a maragsakan a mangted.

Kas pagarigan, ania ngay no adda kendim a magustuam unay? No ibagak kenka a masapul nga ibingayam ti sabali nga ubing, maragsakanka kadi a mangted?— Ngem ania ngay no adda kendim no kaduam ti magustuam unay a gayyemmo? No napanunotmo nga ikkan ti gayyemmo, saanka kadi a maragsakan?—

No dadduma napalalo ti ayattayo iti maysa a tao isu a kayattayo nga ited amin a kiddawenna ket saantayo nga imutan. Bayat a dumakkel ti panagayattayo iti Dios, kasta koma ti panagriknatayo Kenkuana.

Adda napanglaw a babai a naam-ammo ti Naindaklan a Mannursuro a kasta ti nariknana. Nakitana daydiay a babai iti templo idiay Jerusalem. Dua laeng a babassit a sensilio ti kakaisuna a kuarta ti babai. Ngem impisokna dagita iti kahon kas kontribusionna, wenno sagut, a para iti templo. Awan ti nangpilit kenkuana a mangaramid iti kasta. Kaaduan a tattao sadiay saanda pay ketdi nga ammo ti inaramidna. Inaramidna dayta gapu ta kayatna ken gapu ta ay-ayatenna a talaga ni Jehova. Naragsakan gapu ta adda naitedna.​​—Lucas 21:1-4.

Adu ti pamay-an a mabalintayo ti mangted. Adda kadi sumagmamano a mapanunotmo?— No mangtedtayo gapu ta talaga a kayattayo, naragsaktayto. Dayta ti gapuna a binilinnatayo ti Naindaklan a Mannursuro: “Iyugaliyo ti mangted.” (Lucas 6:38) No aramidentayo dayta, parparagsakentayo dagiti sabsabali. Ket datayto ti agbalin a kararagsakan!