“Immasideg Kenkuana ti Dadakkel a Bunggoy”

1-3. Ania ti napasamak idi a dagiti nagannak inyegda dagiti ubbingda ken ni Jesus, ket ania ti ipalgak daytoy a pasamak maipapan ken ni Jesus?

AMMO ni Jesus a dandanin agngudo ti biagna ditoy daga. Sumagmamano laengen a lawas ti natda, ngem okupado pay laeng! Kaduana dagiti apostolna a mangaskasaba idiay Perea, maysa a lugar a dayaen ti Karayan Jordan. Agpaabagatanda nga agturong idiay Jerusalem, a pangrambakan ni Jesus iti Paskua iti maudi a gundaway.

² Kalpasan ti nainget a pannakidiskusion ni Jesus iti sumagmamano a panguluen ti relihion, adda tattao a nangyeg kadagiti ubbingda tapno makitada ni Jesus. Agparang a nagduduma ti tawen dagiti ubbing, ta ti sao nga inusar ni Marcos kas awag kadakuada ket umasping iti sao nga immun-una nga inusarna a nangdeskribir iti ubing nga agtawen iti 12, idinto ta inusar ni Lucas ti sao a mabalin nga ipatarus kas ‘maladaga.’ (Lucas 18:15; Marcos 5:41, 42; 10:13) Gagangay laeng a naariwawa no adda dagiti ubbing. Dagiti adalan ni Jesus inungtanda dagiti nagannak, ta nalabit saanda a kayat a singaen dagiti ubbing ti Apoda. Ania ti inaramid ni Jesus?

³ Idi nakita ni Jesus ti mapaspasamak, isu ket nakaunget. Kadagiti siasino? Kadagiti ubbing? Kadagiti nagannak? Saan, no di ket kadagiti adalanna! Kinunana: “Bay-anyo dagiti ubbing nga umay kaniak; dikay padasen a pawilan ida, ta ti pagarian ti Dios kukua dagiti kasta. Pudno kunak kadakayo, Siasinoman a saan nga umawat iti pagarian ti Dios a kas iti maysa nga ubing saanto a pulos makastrek iti dayta.” Kalpasanna, innalana dagiti ubbing “kadagiti takiagna,” sana binendisionan ida. (Marcos 10:13-16) Ipasimudaag ti sasao nga inusar ditoy ni Marcos a sidudungngo nga inarakup ni Jesus dagiti ubbing, a nalabit inubbana pay ketdi ti dadduma kadagiti maladaga. Nalawag a kaay-ayo ni Jesus dagiti ubbing. Nupay kasta, adda pay masursurotayo ditoy maipapan kenkuana​—isu ket nalaka a maasitgan.

4, 5. (a) Kasanotay nga ammo a nalaka a maasitgan ni Jesus? (b) Ania dagiti saludsod nga usigentayo iti daytoy a kapitulo?

⁴ No estrikto, saan a mannakigayyem, wenno natangsit a tao ni Jesus, mabalin a naatap kenkuana dagidi nga ubbing ken agalikaka dagiti nagannak nga umasideg kenkuana. Darepdepem ti pannakaay-ayo dagiti nagannak a nakakita iti kinadungngo ni Jesus kadagiti ubbing, ti panangbigbigna iti pateg dagiti ubbing iti imatang ti Dios, ken ti panangbendisionna kadakuada! Wen, uray no agkakadagsen nga annongen ti naipabaklay ken ni Jesus, isu ti kalakaan a maasitgan kadagiti amin a tao.

⁵ Siasino pay ti saan a bimdeng nga immasideg ken ni Jesus? Apay a naglaka a maasitgan? Ken kasano a masursurotayo ti agbalin a kas ken Jesus iti daytoy a banag? Kitaentayo.

Siasino Dagiti Saan a Bimdeng nga Immasideg ken ni Jesus?

6-8. Siasino ti masansan a kinapulpulapol ni Jesus, ken kasano a naiduma ti kababalinna iti kababalin dagiti panguluen ti relihion?

⁶ No basaem dagiti salaysay dagiti Ebanghelio, mabalin a masdaawka iti kinaadu ti tattao a saan a bumdeng nga umasideg ken ni Jesus. Kas pagarigan, mainaig kenkuana, masansan a mabasatayo ti maipapan iti “dadakkel a bunggoy.” “Simmurot kenkuana dagiti dadakkel a bunggoy manipud Galilea.” “Naguurnong kenkuana ti dadakkel a bunggoy.” “Immasideg kenkuana ti dadakkel a bunggoy.” “Makipagdaldaliasat idi kenkuana ti dadakkel a bunggoy.” (Mateo 4:25; 13:2; 15:30; Lucas 14:25) Wen, masansan a nalikmut ni Jesus iti umariwekwek a tattao.

⁷ Kaaduanna, gagangay a tattao laeng dagitoy, dagidiay siuumsi nga inawagan dagiti panguluen ti relihion kas “tattao ti daga.” Sipapanayag a kinuna dagiti Fariseo ken papadi: “Daytoy a bunggoy a saan a makaammo iti Linteg nailunodda a tattao.” (Juan 7:49) Dagiti insurat dagiti rabbi idi agangay pasingkedanda ti kasta a kababalin. Adu dagiti panguluen ti relihion a nababa ti panagkitada kadagiti kasta a tattao, a saanda a kayat ti makipangan kadakuada, gumatang kadagiti lakoda, wenno makilangen kadakuada. Kinapudnona, impetteng ti dadduma nga awan ti namnama nga agungar dagiti kasta a tattao a di makaammo iti oral a linteg (saan a naisurat a linteg)! Adu a nanumo a tattao ti sigurado a limmiklik kadagita a panguluen imbes nga agpatulong wenno agpaiwanwanda kadakuada. Ngem naiduma ni Jesus.

⁸ Masansan a nakipulapol ni Jesus kadagiti gagangay a tattao. Nakipangan kadakuada, pinaimbagna ida, sinursuruanna ida, ken inikkanna ida iti namnama. Siempre, realistiko ni Jesus, nga ammona a paiden ti kaaduan a tattao ti gundaway nga agserbi ken ni Jehova. (Mateo 7:13, 14) Nupay kasta, positibo ti panangmatmatna iti tunggal maysa ken nakitana nga adu ti agtarigagay nga agaramid iti umiso. Anian a naiduma kadagidiay natangken ti panagpuspusoda a papadi ken Fariseo! Ngem nakaskasdaaw ta uray dagiti papadi ken Fariseo immasidegda ken ni Jesus, ket adu kadakuada ti nagbalbaliw ken nagbalin a pasurotna. (Aramid 6:7; 15:5) Adda met dagiti nabaknang ken agtuturay a saan a bimdeng nga immasideg ken ni Jesus.​—Marcos 10:17, 22.

9. Apay a dagiti babbai saanda a nagalikaka nga immasideg ken ni Jesus?

⁹ Dagiti babbai saanda a nagalikaka nga immasideg ken ni Jesus. Awan duadua a masansan a mariknada ti makaipababa iti dayaw a panangumsi kadakuada dagiti panguluen ti relihion. Inumsi dagiti rabbi ti siasinoman a mangisuro kadagiti babbai. Kinapudnona, saan a mapalubosan dagiti babbai nga agtestigo; maibilangda a saan a mapagtalkan a saksi. Iti kararagda, nagyaman pay ketdi dagiti rabbi iti Dios gapu ta saanda a babbai! Ngem ni Jesus saanna nga inumsi dagiti babbai. Adu a babbai ti immasideg kenkuana ta magagaranda nga agsursuro. Kas pagarigan, ni Maria a kabsat ni Lazaro nagtugaw iti sakaanan ti Apo, a sipapasnek nga umim-imdeng ken Jesus bayat a maringringgoran ni Marta a kabsatna a mangisagsagana iti taraon. Kinomendaran ni Jesus ni Maria gapu kadagiti banag nga impangpangrunana.​—Lucas 10:39-42.

10. Kasano a naiduma ni Jesus kadagiti panguluen ti relihion no iti pannakilangenna kadagiti masakit?

¹⁰ Napan met ken ni Jesus uray dagiti masakit, nupay masansan a saan ida nga ikabkabilangan dagiti panguluen ti relihion. Impaannurot ti Mosaiko a Linteg a makuarentinas dagiti agkukutel tapno saanda a makaakar, ngem saanda a rumbeng a mairurumen. (Levitico, kapitulo 13) Ngem idi agangay, iti babaen dagiti paglintegan dagiti rabbi, maibilang dagiti agkukutel kas nakaar-ariek nga ibleng. Adda pay ketdi dagiti panguluen ti relihion a nangubor kadagiti agkukutel tapno saanda nga umasideg! Karkardayo a maitured dagita a mairurrurumen a tattao ti umasideg iti asinoman a mannursuro, ngem dagiti agkukutel immasidegda ken ni Jesus. Maysa nga agkukutel ti nangyebkas iti pammatina, a kunkunana: “Apo, no kayatmo laeng koma, kabaelannak a dalusan.” (Lucas 5:12) Iti sumaganad a kapitulo, pagsasaritaantayo ti sungbat ni Jesus. Ngem ita, maikunatayo a dayta ti kalawagan a pammaneknek a ni Jesus ket nalaka a maasitgan.

11. Ania a pagarigan ti mangipakita a dagidiay madagdagsenan gapu iti basolda saanda a bimdeng nga immasideg ken ni Jesus, ken apay a nasken daytoy?

¹¹ Saan a bimdeng nga immasideg ken ni Jesus dagidiay madagdagsenan gapu iti basolda. Panunotem, kas pagarigan, daydi pannakipangan ni Jesus iti pagtaengan ti maysa a Fariseo. Napan sadiay ti maysa a managbasol a babai ket nagparintumeng nga agsangsangit iti sakaanan ni Jesus gapu kadagiti basolna. Nagtedted dagiti luana kadagiti saka ni Jesus, ket pinunasanna ida iti buokna. Nupay nakapungtot daydi nangsangaili ken binabalawna ni Jesus gapu ta impalubosna nga umasideg daytoy a babai, napnuan asi a kinomendaran ni Jesus ti babai gapu iti napasnek a panagbabawina ket impatalgedna kenkuana ti pammakawan ni Jehova. (Lucas 7:36-50) Dagiti tattao a madagdagsenan ita gapu iti basolda ad-adda a nasken a saanda a bumdeng nga umasideg kadagidiay makatulong kadakuada a mangisubli iti relasionda iti Dios! Apay a nalaka a maasitgan ni Jesus?

Apay a Nalaka a Maasitgan ni Jesus?

12. Apay a saan a nakaskasdaaw a nalaka a maasitgan ni Jesus?

¹² Laglagipem a tinulad a naan-anay ni Jesus ti ipatpategna a nailangitan nga Amana. (Juan 14:9) Ipalagip kadatayo ti Biblia a ni Jehova “saan nga adayo iti tunggal maysa kadatayo.” (Aramid 17:27) Ni Jehova a “Managdengngeg iti kararag” ket kanayon a mabalin nga asitgan dagiti matalek nga adipenna ken ti asinoman a sipapasnek nga agtarigagay a mangsapul ken agserbi kenkuana. (Salmo 65:2) Panunotem laengen​—nupay ni Jehova ti kabilgan ken katan-okan a Persona iti uniberso, isu ti kalakaan a maasitgan! Kas iti Amana, ipatpateg ni Jesus dagiti tattao. Kadagiti sumarsaruno a kapitulo, pagsasaritaantayo ti nasged nga ayat nga adda iti puso ni Jesus. Nupay kasta, nalaka a maasitgan ni Jesus kangrunaanna gapu ta nabatad nga ipatpategna dagiti tattao. Usigentayo ti dadduma kadagiti galad ni Jesus a pakakitaan iti kasta nga ayat.

13. Kasano a dagiti nagannak matuladda ni Jesus?

¹³ Nalaka a marikna dagiti tattao a maseknan ni Jesus kadakuada. Saan a nagkupas ti kasta a personal a pannakaseknan uray kadagiti kanito nga adda dagiti pakadagensenan ni Jesus. Kas nakitatayon, idi a dagiti nagannak inyegda kenkuana dagiti ubbingda, inasikaso latta ida ni Jesus uray no okupado kadagiti nadagsen a responsabilidadna. Anian nga ulidan ti impasdekna para kadagiti nagannak! Saan a kaskarina ti mangpadakkel iti annak kadagitoy a tiempo. Ngem nasken a dagiti annak nalakada a maasitgan dagiti dadakkelda. No maysaka nga ama wenno ina, ammom nga adda dagiti tiempo nga adu ti pakakumikomam ket saanmo a maasikaso a dagus ti anakmo. Nupay kasta, mabalinmo nga ibaga kenkuana nga ileppasmo pay biit ti ar-aramidem sa isu met ti asikasuem. No tungpalem ti saom, masursuro ti anakmo ti agtutor. Masursurona met a mabalinna nga ibaga kenka ti aniaman a parikut wenno pakaringgoranna.

14-16. (a) Ania a kasasaad ti nangiturong iti damo a panangaramid ni Jesus iti milagro, ket apay a nakaskasdaaw dayta? (b) Ania ti ipalgakna maipapan ken ni Jesus ti panangaramidna iti milagro idiay Cana, ket ania ti maadal iti daytoy dagiti nagannak?

¹⁴ Imbatad ni Jesus kadagiti tattao a napateg kenkuana dagiti pakaseknanda. Kas pagarigan, usigem ti damo a milagro nga inaramid ni Jesus. Dimmar-ay ni Jesus iti boda idiay Cana, maysa nga ili ti Galilea. Adda rimsua a nakababain a problema. Naibus ti arak! Ni Maria nga ina ni Jesus imbagana iti anakna no ania ti napasamak. Ket ania ti inaramid ni Jesus? Imbilinna kadagiti agserserbi a punnuenda iti danum ti innem a dadakkel a burnay. Idi timmakoda ket impanda iti mangiwanwanwan iti padaya, naimas nga arak ti nagbalinan ti danum! Pangallilaw laeng kadi dayta tapno mamati dagiti tattao nga adda napasamak a milagro? Saan, ti danum “napagbalinen nga arak.” (Juan 2:1-11) Nabayagen nga arapaap dagiti tattao a pagbalinen a sabali a banag ti maysa a banag. Iti adu a siglo, dagiti maaw-awagan iti alchemist pinadasda a pagbalinen a balitok ti buli. Ngem napaayda nupay iti kinapudnona, agkaarngi nga elemento ti buli ken balitok.a Ti ngay danum ken arak? Dua laeng a kangrunaan nga elemento ti mangbukel iti danum. Iti sabali a bangir, agarup sangaribu a substansia a buklen ti adu a narikut a kombinasion dagiti elemento ti mangbukel iti arak! Apay a nangaramid ni Jesus iti kasta a milagro tapno laeng marisut ti bassit la a parikut a kas iti panagkurang ti arak iti boda?

¹⁵ Para iti nobio ken nobia, saan a bassit a banag dayta a parikut. Iti nagkauna a Makintengnga a Daya, nagpateg ti panangsangaili kadagiti naawis a bisita. Pakaibabainan ti nobia ken nobio no maibus ti arak iti boda ket saanto a nasayaat ti pakasarsaritaanda uray no manon a tawen ti naglabas manipud idi nagkasarda. Pakaseknanda dayta, ket pakaseknan met dayta ni Jesus. Isu a rinisutna ti parikut. Makitam kadi no apay a dagiti tattao inyasidegda kenkuana dagiti parikutda?

¹⁶ Adda manen napateg a maadal ditoy dagiti nagannak. Ania ti aramidem no adda parikut nga iyasideg kenka ti anakmo? Mabalin nga agduyoska a di mangikaskaso ken mangtagilag-an iti pakaseknanna. Baka katawaam pay ketdi dayta. No idilig kadagiti bukodmo a problema, mabalin a kasla awan kaes-eskan ti problema ti anakmo. Ngem laglagipem a saan a bassit a banag dayta kenkuana! No pakaseknan dayta ti ipatpategmo unay nga anak, saan kadi a rumbeng a pakaseknam met dayta? No ipariknam iti anakmo a maseknanka kadagiti parikutna, saan nga agalikaka nga umasideg kenka nga ama wenno inana.

17. Ania nga ulidan iti kinaalumamay ti impasdek ni Jesus, ken apay a natibker ti tao a naalumamay?

¹⁷ Kas nasalaysay iti Kapitulo 3, naalumamay ken napakumbaba ni Jesus. (Mateo 11:29) Maysa a nagsayaat a galad ti kinaalumamay. Nalawag dayta a pammaneknek a napakumbaba ti panagpuspuso ti maysa a tao. Paset dayta ti bunga ti espiritu ti Dios ken nainaig iti nadiosan a sirib. (Galacia 5:22, 23; Santiago 3:13) Uray iti sidong ti nariribuk unay a kasasaad, nagparbeng ni Jesus. Nabatad a saan a maysa a pagkapuyan ti kinaalumamayna. Maipapan iti daytoy a galad, kinuna ti maysa nga eskolar: “Ti naalumamay a tao ket kas katibker ti asero.” Wen, masansan a kasapulan ti kinatibker tapno magawidan ti pungtottayo ket saan a nagubsang ti pannakilangentayo kadagiti sabsabali. Ngem iti tulong ni Jehova, matuladtayo ti kinaalumamay ni Jesus, ket pagbalinennatayo dayta a nalaka a maasitgan.

18. Ania a pagarigan ti mangipakita a nainkalintegan ni Jesus, ken apay a daytoy a galad pagbalinenna ti maysa a tao a nalaka a maasitgan?

¹⁸ Nainkalintegan ni Jesus. Idi adda ni Jesus idiay Tiro, napan kenkuana ti maysa a babai agsipud ta ti balasangna “nakaro ti pannakasairona.” Iti tallo a nagduduma a wagas, impasimudaag ni Jesus ti panagkedkedna a mangaramid iti kalikagum ti babai. Umuna, saan a simmungbat; maikadua, imbagana no apay a saanna a mabalin a patgan ti dawat ti babai; maikatlo, nagusar iti ilustrasion nga ad-adda a nangipaganetget no apay nga agkedked ni Jesus. Ngem kayatna kadi a sawen nga awan ti panangisakit ni Jesus ken natangken ti panagpuspusona? Imparipiripna kadi nga agpeligro ti babai no supiatenna ti imbaga ti natan-ok a tao? Saan, no di ket nalawag a natalged ti rikna daytoy a babai. Saan laeng a nagpakaasi no di ket impatengtengna ti dawatna iti baet ti panagkedked ni Jesus a tumulong kenkuana. Nakita ni Jesus ti naisangsangayan a pammati ti babai a nangtignay kenkuana a di sumardeng nga agpakpakaasi, ket pinaimbagna ti balasangna. (Mateo 15:22-28) Nalawag ngarud a gapu iti kinanainkalintegan ni Jesus, kinamasindadaanna a dumngeg ken agpabus-oy no maiparbeng, magagaran dagiti tattao nga umasideg kenkuana!

Nalakaka Kadi a Maasitgan?

19. Kasanotay a maammuan no pudno met laeng a nalakatayo a maasitgan?

¹⁹ Kayat a panunoten dagiti tattao a nalakada a maasitgan. Kas pagarigan, ibagbaga dagidiay adda saadda a mabalin ida nga asitgan dagiti tattao uray kaano, ken nawaya dagiti masakupanda nga umasideg kadakuada. Nupay kasta, mamagannad ti Biblia: “Ti umariwekwek a tattao iwaragawagdanto tunggal maysa ti bukodna a naayat a kinamanangngaasi, ngem ti matalek a tao siasino ti makasarak?” (Proverbio 20:6) Nalaka laeng nga ibaga a nalakatayo a maasitgan, ngem pudno met laeng kadi a sipapasnek a tultuladentayo daytoy nga aspeto ti ayat ni Jesus? Ti sungbat ket saan nga agpannuray iti panangmatmattayo iti bagitayo no di ket iti panangmatmat kadatayo dagiti sabsabali. Kinuna ni Jesus: “Ti kinanainkalinteganyo maammuan koma dagiti amin a tattao.” (Filipos 4:5) Nasayaat nga isaludsod ti tunggal maysa kadatayo: ‘Kasano ti panangmatmat kaniak dagiti sabsabali? Ania ti reputasionko?’

20. (a) Apay a nasken a dagiti Kristiano a panglakayen nalakada koma a maasitgan? (b) Apay a rumbeng a nainkalintegantayo no maipapan iti namnamaentayo kadagiti panglakayen iti kongregasion?

²⁰ Dagiti Kristiano a panglakayen nangnangruna nga ikagumaanda ti agbalin a nalaka a maasitgan. Sipapasnek a tarigagayanda ti agbalin a kas iti nadakamat maipapan kadakuada iti Isaias 32:1, 2: “Tunggal maysa agbalinto a kas paglemmengan a lugar manipud iti angin ken lugar a pakaitalimengan manipud iti natutudo a bagyo, kas barbaresbes ti danum iti awanan danum a pagilian, kas salinong ti maysa a nadagsen a napasdok a bato iti napaksuyan a daga.” Makaipaay laeng ti panglakayen iti kasta a pannalaknib, bang-ar, ken gin-awa no kanayon a nalaka a maasitgan. Pudno, saan a kanayon a nalaka nga aramiden dayta, ta nadagsen ti responsabilidad a naipabaklay kadagiti panglakayen kadagitoy narigat a tiempo. Nupay kasta, ikagumaan dagiti panglakayen a di pulos iparipirip kadagiti sabsabali nga adu unay ti pakakumikomanda ket awan ti panawenda a mangasikaso iti kasapulan dagiti karnero ni Jehova. (1 Pedro 5:2) Dagiti dadduma a kameng ti kongregasion ikagumaanda met ti agbalin a nainkalintegan no maipapan iti namnamaenda kadagita a matalek a lallaki, nga ipakitada ti kinapakumbaba ken makikooperarda.​—Hebreo 13:17.

21. Kasano a makapagtalinaed dagiti nagannak a nalaka a maasitgan dagiti annakda, ket ania ti masalaysay iti sumaganad nga artikulo?

²¹ Ikagumaan dagiti nagannak nga addada a madadaan kaanoman a kasapulan ida dagiti annakda. Serioso a banag daytoy! Kayatda nga iparikna kadagiti annakda a di rumbeng nga agalikakada a makisarita ken ni Tatang wenno ni Nanang no adda dagiti parikutda. No kasta, ikagumaan dagiti Kristiano a nagannak ti agbalin a naalumamay ken nainkalintegan, a saanda nga agunget iti kasta unay no ti ubing ipudnona ti biddutna wenno no di umiso ti panagrasrasonna. Bayat a siaanus a sanayen dagiti nagannak ti annakda, ikagumaanda a pagtalinaeden a nawaya ti komunikasion. Wen, kayattayo amin ti agtalinaed a nalaka a maasitgan, kas ken Jesus. Iti sumaganad a kapitulo, pagsasaritaantayo ti naimpusuan a pannakipagrikna ni Jesus​—a maysa kadagiti kangrunaan a galad a namagbalin kenkuana a nalaka a maasitgan.