KAPITULO 17

Ania ti Rumbeng a Maammuak Maipapan iti Pannakigayyem Kadagiti Kaeskuelaan?

“No dadduma makakitaak iti grupo dagiti agtutubo ket mapampanunotko, ‘Makapaapalda. Nagsayaat ti panagkakaduada. Adda koma met kasta a gagayyemko.’”​—Joe.

“Naglakaak la a makigaygayyem idiay eskuelaan. Ngem nagproblemaak gapu iti dayta.”​—Maria.

KASAPULANTAY amin ti gagayyem​—daydiay kaduatayo nga agaliwaksay iti tiempo ti nam-ay ken daydiay mapagsadagantayo iti tiempo ti rigat. Adda gagayyem ni Jesus ken tinagiragsakna ti pannakilangen kadakuada. (Juan 15:15) Idi ngangnganin matay iti kayo a pagtutuokan, adda iti sibayna ti nasinged a gayyemna a ni Juan, “ti adalan a dinungdungngona.” (Juan 19:25-27; 21:20) Kasapulam dagiti kasta a gagayyem​—dagidiay kabinnadangmo iti tiempo ti rigat ken nam-ay!

Nalabit adda kasta a gagayyem a naam-ammom idiay eskuelaan​—maysa wenno dua kadagiti kaklasem a dagus a nakasinningedmo. Agpapadakayo kadagiti paginteresan ken maayatankayo nga agtutungtong. Para kenka, kasla saanda a maibilang a dakes a kakadua. (1 Corinto 15:33) “Dandani inaldaw a makitkitak ida,” kuna ni Anne. “Komportableak kadakuada idinto ta no dagiti kapammatiak ti kaduak, limitado ti garawko. Nawayaak no addaak idiay eskuelaan.” Kanayonanna, mabalin a matmatmatam payen ti bambanag a kas iti panangmatmat ni Lois a nagkuna, “Kayatko a paneknekan kadagiti gagayyemko idiay eskuelaan a normal met dagiti Saksi ni Jehova ken saanda a karkarna a kas iti pampanunoten ti adu.” Nainkalintegan kadi dagitoy a rason tapno makisinningedka kadagiti kaeskuelaam?

Apay a Nasken nga Agannadka?

Usigem ti napasamak ken Maria a nadakamat itay. Gapu ta mannakigayyem unay, adu ti nabarkadana ngem marigatan a mangikeddeng iti pagpatinggaan ti pannakigayyemna. Inaminna: “Maragragsakanak no kaykayatdak dagiti kapatadak a babbai ken lallaki. Nagbanaganna, in-inut a nailumlomak kadagiti aramid ti lubong.” Kasta met laeng ti napadasan ni Lois. “Natuladko ti panagug-ugali dagiti gagayyemko, agingga nga awanen ti nakaidumaak kadakuada.”

Saan a nakaskasdaaw ti kasta a resulta. Kinapudnona, tapno agtalinaedka a nasinged iti gayyemmo, masapul nga agpadakayo kadagiti paginteresan ken prinsipio. No makisinningedka kadagiti tattao a saan a mangan-annurot iti naibatay iti Biblia a pammati ken prinsipiom, sigurado a maapektaran ti kababalinmo. (Proverbio 13:20) Dayta ti gapuna nga insurat ni apostol Pablo: “Dikay agbalin a di agkaasmang a naisangol kadagiti di manamati.”​—2 Corinto 6:14.

No Ania ti Maaramidam

Kayat kadi a sawen ni Pablo a naan-anay a liklikam dagiti kaeskuelaam ken dimon kasarsarita ida? Saan! Dagiti Kristiano ket nasken nga ammoda ti makilangen kadagiti tattao iti aniaman a puli, relihion ken kultura tapno matungpalda ti annongenda a ‘mangaramid iti ad-adalan kadagiti tattao iti amin a nasion.’​—Mateo 28:19.

Nangipaay ni apostol Pablo iti nagsayaat a pagwadan iti daytoy a banag. Ammona no kasano ti makipatang iti “amin a kita ti tattao,” nupay naiduma dagiti patpatienda. (1 Corinto 9:22, 23) Mabalinmo a tuladen ti inaramid ni Pablo. Agbalinka a mannakigayyem kadagiti kapatadam. Sursuruem ti umiso a wagas ti pannakisarita kadakuada. Nupay kasta, dika agpaimpluensia iti panagsasao ken panagug-ugali dagiti kaeskuelaam. Imbes ketdi, aginggat’ mabalin, sidadayaw nga ilawlawagmo a dagus kadakuada no apay a pinilim ti agbiag a maitunos kadagiti pagalagadan ti Biblia.​—2 Timoteo 2:25.

Pudno a saan a nalaka ti agbalin a naiduma. (Juan 15:19) Ngem utobem daytoy: Ibagatayon a nakaluganka iti maysa a pangalaw a bangka. Napalawlawanka kadagiti tattao a malmalmes. Kasanom nga alawen ida? Panawam kadi ti bangka ket tumapogka iti danum? Siempre, saan!

Umasping iti dayta, idiay eskuelaan, napalawlawanka kadagiti tattao nga awanan iti proteksion nga adda kadagiti gagayyem ni Jehova. (Salmo 121:2-8) No laksidem dagiti pagalagadan ni Jehova tapno laeng makasinningedmo dagiti kaeskuelaam, isarsarakmo ti naespirituan a salun-atmo ken ti kinaragsakmo. (Efeso 4:14, 15; Santiago 4:4) Nasaysayaat nga amang no tulongam dagiti kaeskuelaam nga agkamang iti arigna pangalaw a bangka, babaen ti panangipakitam kadakuada no kasano ti agserbi ken Jehova. Kinapudnona, adda kadi pay nasaysayaat ngem iti dayta tapno maipakitam a maysaka a pudpudno a gayyem?

KANGRUNAAN A TEKSTO

“Aramidek ti amin a bambanag maipagapu iti naimbag a damag, tapno agbalinak a manangiranud iti dayta iti sabsabali.”​—1 Corinto 9:23.

BALAKAD

No interesado dagiti kaeskuelaam a mangammo kadagiti patpatiem, bay-am ida a mangyebkas met kada- giti kapanunotanda. Dumngegka a naimbag. No agsaoka, nabuyogan koma iti “naalumamay a kababalin ken nauneg a panagraem.”​—1 Pedro 3:15.

AMMOM KADI . . . ?

Adu nga agserserbi iti Dios ita ti nakaammo kadagiti isursuro ti Biblia manipud iti maysa a kaeskuelaanda a situtured a nangisarsar- ita kadagiti patpatienna.

DAGITI ARAMIDEK!

No madlawko a nasingedak unayen iti kaeskuelaak, masapul nga ․․․․․

No uyawen ti kaeskuelaak dagiti patpatiek, kastoy ti aramidek ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Iti panagkunam, apay a kasla nalaklaka ti makigayyem idiay eskuelaan ngem iti uneg ti kongregasion Kristiano?

● Ania dagiti pagdaksan ti panagaliwaksay a kadua ti di manamati a kaeskuelaan kalpasan ti klase?

● Ania dagiti pagsayaatanna no ibagam kadagiti kaeskuelaam a maysaka kadagiti Saksi ni Jehova?

[Blurb iti panid 143]

Awan idi ti nakaidumaak kadagiti kaeskuelaak, isu a naglakak a nagayyem ida. Ngem adda nasursurok iti biddutko. Ita, addaanakon kadagiti gagayyem iti kongregasion​—gagayyem a mabalinko a pagtalkan.’’​—Daniel

[Ladawan iti panid 146]

Ania ti kasayaatan a pamay-an tapno maalawmo ti malmalmes a tao​—tumapogka iti danum wenno mangipurruakka iti salbabida?