Panangsuporta iti Pagarian—Panagibangon Maipaay iti Panagdaydayaw ken Panagsaranay

SIMREKKA iti Kingdom Hall-yo ket kasla saanmon a mailasin dayta. Kanayon nga ipagpampannakkelmo daytoy a pasdek. Mabalin nga adu pay ketdi ti naragsak a kapadasam idi timmulongka a nangibangon iti dayta sumagmamano a tawenen ti napalabas. Ngem ita, ad-adda manen nga ipagpannakkelmo ta ti Kingdom Hall-yo ket nagbalin a temporario a relief center. Kalkalpas laeng ti bagyo a nanglayus ken nangdadael iti lugaryo ket dagus nga inorganisar ti Branch Committee ti mangipaay iti taraon, kawes, nadalus a danum, ken dadduma pay a tulong kadagiti biktima. Nagsayaat ti pannakaurnos dagiti naidonar a saranay. Nakalinia dagiti kakabsat a mangala kadagiti kasapulanda ken adu ti aglulua gapu iti rag-o.

Kinuna ni Jesus a ti naisangsangayan a pakabigbigan dagiti pasurotna ket ti ayatda iti maysa ken maysa. (Juan 13:34, 35) Iti daytoy a benneg, usigentayo no kasano a maipakpakita ti Nakristianuan nga ayat kadagiti proyektotayo a panagibangon ken kadagiti panagsaranay dagiti Saksi ni Jehova. Dayta nga ebkas ti ayat ket nabileg a pammaneknek nga agturturayen ti Pagarian ni Jesus.