SIHON

Maysa nga Amoreo nga ari idi asidegen ti Israel iti Naikari a Daga. Adda idi tiempo a ti sakup ti pagarian ni Sihon ket manipud naapres a ginget ti Jaboc (beddeng ti pagturayan ni Ari Og) agingga iti naapres a ginget ti Arnon, ken manipud Karayan Jordan nga agpadaya iti desierto. Ti kabeserana a siudad ket Hesbon, iti daya ti makin-amianan nga ungto ti Natay a Baybay. (Nu 21:23, 24; Jos 12:2, 3) Naagaw ni Sihon ti daga ti Moab nga adda iti amianan ti Arnon, ket nalawag nga inturayanna ti Midian, ta dagiti panguluen ti Midian naawaganda kas ‘dagiti duke ni Sihon.’ (Nu 21:26-30; Jos 13:21) Idi nangibaon ti Israel kadagiti mensahero a dumawat iti pammalubos ni Sihon a lumasatda iti pagarianna iti dalan ti ari ken ikarida a saanda a takawan dagiti Amoreo iti aniaman a banag, saan a pinalubosan ida ni Sihon ket inummongna ti buyotna tapno lapdanda ti Israel. Naabak ni Sihon ken napapatay idiay Jahaz.​—Nu 21:21-24; De 1:3, 4; 2:24-35; 3:2, 6.

Napateg daytoy a panagballigi ti Israel maibusor ken Sihon agsipud ta namin-adu a nadakamat iti pakasaritaan ti Israel, a kasta met ti pannakaabak dagiti Egipcio idiay Nalabaga a Baybay. Dayta a pasamak ket masansan a dinakamat ni Moises, ni Jefte, ti maysa a salmista, ken dagiti Levita kalpasan ti pannakaidestiero kas makaparegta a pagarigan dagiti panagballigi ni Jehova maipaay iti matalek nga ilina. (Nu 21:34; De 31:4; Uk 11:19-22; Ne 9:5, 22; Sal 135:9-12; 136:18, 19) Natignay ni Rahab ken dagiti Gabaonita a makikappia iti Israel gapu iti damag iti dayta a panagballigi. (Jos 2:10; 9:9, 10) Ti daga ni Sihon ket nagbingayan dagiti tribu da Ruben ken Gad.​—Nu 21:25, 31, 32; De 29:7, 8; Jos 13:8-10, 15-28.