PISIDIA

Makin-uneg a rehion iti makin-abagatan nga Asia Menor. Maysa dayta a kabambantayan a nangsaklaw iti makinlaud a paset ti Kabambantayan ti Taurus; Pamfilia ti adda iti amiananna, ti Frigia ti Galacia ti adda iti abagatanna, Caria ken Licia ti adda iti laudna, ken Licaonia ti adda iti dayana. Maikunkuna nga agarup 190 km (120 mi) ti rukod daytoy a rehion manipud daya nga agpaabagatan ken agarup 80 km (50 mi) ti kaakabana. Aduan dayta iti nangangato a pantok a nabal-etan iti gingginget ken karkarayan ti bantay; addaan pay iti kabakiran ken pagaraban.

Narungsot ken mannakigubat dagiti umili ti Pisidia, nga uray la addaan dagiti tribu iti bunggoy dagiti mannanakaw. Dagitoy a taga bambantay ket narigat nga iturayan ken saan a nalaka a maimpluensiaan iti kultura a Heleniko wenno Romano. Dagiti Romano dinutokanda ni Ari Amyntas ti Galacia a mangparukma kadagiti umili ti Pisidia, ngem natay sakbay a naitungpalna dayta. Ti Pisidia ket nagbalin a paset ti Galacia a probinsia ti Roma idi 25 K.K.P., ket idi 6 K.K.P. adda dagiti bunggoy dagiti soldado a naipan kadagiti kolonia iti dayta a lugar tapno makontrol dagiti umili. Dagitoy a kolonia ket tinarawidwidan ti Antioquia, maysa a siudad iti asideg ti nagbedngan ti Pisidia ken Frigia. (Kitaenyo ti ANTIOQUIA Num. 2.) Idi 74 K.P., ti makin-abagatan a paset ti Pisidia naitipon iti Pamfilia ken Licia ket napagbalinda a probinsia ti Roma. Ti makin-amianan a benneg ket nagtalinaed a paset ti probinsia ti Galacia agingga a nairaman iti baro a probinsia nga addaan iti nagan a Pisidia kalpasan ti panawen dagiti apostol.

Limmasat ni apostol Pablo iti Pisidia iti umuna a panagdaliasatna kas misionero, a dimmalan kadagiti bantay manipud kosta ti Pamfilia nga agturong iti Antioquia sadi Pisidia. (Ara 13:13, 14) Limmasat met iti Pisidia iti panagsublina. (Ara 14:21, 24) Kinuna ni Pablo a napasaranna ‘dagiti peggad iti karkarayan, dagiti peggad kadagiti tulisan,’ mabalin a maigapu daytoy kadagiti bandido ken naapres a karkarayan ti bantay iti dayta a lugar.​—2Co 11:26.