APUG

Maysa a sangkap, puraw no puro, a maisagana babaen ti panangpuor kadagiti porma ti calcium carbonate a kas iti apug a bato, kulintipay, wenno tultulang. (Am 2:1) Naruay iti nakabambantay a rehion ti Palestina, ti apug a bato napagbalin nga apug (calcium oxide) babaen ti panangpuor kadagiti maregmeg ti apug a bato kadagiti bimmalisungsong wenno timmubong a pugon ti apug. Kadagidi kadaanan a tiempo, ti apug (Heb., sidh) ket maysa a kangrunaan a sangkap iti argamasa ken naaramat a pangpalitada kadagiti pader ken pangpapuraw kadagiti pader, tanem, ken dadduma pay. (De 27:4; Eze 13:10; Mt 23:27; Ara 23:3) Piguratibo nga us-usaren met ti Biblia dagiti nagpuoran iti apug kas mangiladawan iti pannakadadael.​—Isa 33:12; kitaenyo ti PUGON.