HADADRIMMON

Nabatad a maysa a lugar iti ginget a tanap ti Megiddo. (Zac 12:11) Masansan a maikunkuna a ti Hadadrimmon isu ti Rummana, maysa a disso nga agarup 7 km (4.5 mi) iti abagatan nga abagatan-a-daya ti Megiddo.

Ti ‘dakkel a panagdung-aw’ idiay Hadadrimmon a nadakamat iti padto ni Zacarias ket nalabit tumukoy iti panagun-unnoy maigapu ken Ari Josias, a napapatay iti panagdadangadang idiay Megiddo. (2Ar 23:29; 2Cr 35:24, 25) Ngem ti sumagmamano inaigda daytoy a panagun-unnoy kadagiti ritual a seremonia ti panagleddaang kas kadagiti panagleddaang maipaay iti ulbod a dios a ni Tammuz (idiligyo ti Eze 8:14) ken ibilangda ti “Hadadrimmon” kas ragup a nagan ti maysa a dios. Imposible daytoy, nangnangruna ta ti sasao ni Jehova, babaen ken Zacarias, ket paset ti maysa a padto maipapan iti Mesias. Saan la ketdi a naaramat dagiti idolatroso a seremonia ti panagsangit kas ilustrasion iti padto; ngem mabalin nga agserbi a kasta ti panagleddaang a nagpaay iti maysa a matalek nga ari ti Juda.​—Idiligyo ti Jn 19:37 ken Apo 1:7 iti Zac 12:10-14.