SUR
[Pader].
Nagan ti maysa a lugar a nadakamat iti nadumaduma a pamay-an kas siudad, naintar a sarsarikedked iti beddeng, maysa a rehion, wenno kabambantayan. Nadeskribir kas “adda iti sango ti Egipto,” kayatna a sawen, iti makindaya a beddeng ti Egipto wenno iti dayaen dayta. Sigun iti konteksto, ti Sur ket adda iti makin-amianan a laud a paset ti Peninsula ti Sinai. (Ge 25:18) Kalpasan ti panangballasiw ti Israel iti Nalabaga a Baybay, indalan ida ni Moises manipud iti takdang ti baybay nga agturong iti “let-ang ti Sur.”—Ex 15:22.
Nabayag pay sakbay daytoy a pasamak, nagparang ti anghel ni Jehova iti maysa nga ubbog iti “dalan nga agturong iti Sur” ket nakisarita ken Agar (nalabit agsubsublin mapan idiay Egipto) a maysa nga Egipcio nga adipen ni Abraham. (Ge 16:7) Idi agangay, immakar ni Abraham manipud iti rehion ti Hebron (Ge 13:18) ket nagnaed iti nagbaetan ti Cades (Cades-barnea, iti abagatan ti Beer-seba iti rehion ti Negeb) ken ti Sur, nupay adda met tiempo a nagnaed idiay Gerar, maysa nga ili dagiti Filisteo nga adda iti amianan ti Cades. (Ge 20:1) Gapu iti panagallaalla dagiti Ismaelita nga agnanaed iti desierto, nakadanonda agingga iti “Havila iti asideg ti Sur.” (Ge 25:18) Nagballigi ni Ari Saul a nakirupak kadagiti Amalekita agingga idiay Sur, ngem idi tiempo ni David, agnanaed pay laeng iti daytoy a lugar dagiti Amalekita kasta met dagiti Gesurita ken dagiti Girzeo.—1Sm 15:7; 27:8.
Ti sumagmamano kadagitoy a teksto ket ad-adda a tumukoy iti maysa nga espesipiko a lugar saan nga iti maysa laeng a nalawa a rehion. No umiso daytoy, ti sasao a “let-ang ti Sur,” a naminsan laeng a nausar, ket mabalin ngarud a tumukoy iti let-ang nga adda iti asideg ti maysa a siudad wenno disso a napanaganan iti Sur.—Ex 15:22; idiligyo ti pannakatukoy ti “let-ang ti Damasco” iti 1Ar 19:15, wenno ti let-ang ti Zif, 1Sm 23:14.
Ti kaipapanan daytoy a nagan (Pader) ti nangtignay iti dadduma a mangibaga nga isu dayta ti Sur iti kadaanan a pangdepensa a pader a naitaraigid iti Lipit ti Suez. Ipakita dagiti kitikit dagiti Egipcio a nabangon dayta iti nasapa a paset ti pakasaritaan dayta a nasion. Kunaen met ti dadduma a ti termino ket tumukoy iti naintar a sarsarikedked dagiti Egipcio a naitaraigid iti makindaya a beddeng ti Egipto iti sanguanan ti Peninsula ti Sinai. Nupay kasta, ipasimudaag ti Exodo 15:22 ti maysa a lugar iti makindaya a deppaar ti Nalabaga a Baybay, ngarud, tumukoy iti maysa a lugar iti ruar ti Egipto imbes nga iti las-ud dagiti beddengna. Gapu itoy, naikuna met a ti nagan a Sur (Pader) ket isu ti makin-amianan a laud a paset ti intar ti bambantay a mangsaklaw iti dakkel a paset ti Peninsula ti Sinai. Manipud iti Gulpo ti Suez iti deppaar ti Egipto, makita a dagiti puraw a rangkis daytoy atiddog a kabambantayan ket kasla maysa a pader, wenno sagiped. Mabalin nga adda idi maysa a lugar wenno ili a naawagan Sur nga adda iti rabaw, wenno iti sakaanan, dayta a kabambantayan, nalabit ti maudi nga ili ti Arabia sakbay ti beddeng ti Egipto. Nupay kasta, saan pay laeng nga ammo ti eksakto nga ayanna.