JOCTAN

Putot ni Eber, kabsat ni Peleg, ken ama ti 13 nga annak. (Ge 10:25-29; 1Cr 1:19-23) Agparang a ti nagnagan ti sumagmamano kadagiti putot ni Joctan ket mayaw-awag pay laeng iti nadumaduma a lugar iti makin-abagatan ken makin-abagatan a laud nga Arabia. Naikuna a ni Joctan ti nagtaudan dagiti nagkauna a tattao ti Arabia, a naiduma kadagiti tribu a nagtaud iti annak ni Abraham babaen kada Agar ken Ketura. Dagiti pagbedngan ti teritoria a nagnaedan dagiti putot ni Joctan ket nadeskribir iti Biblia a “manipud Mesa agingga iti Sefar” (Ge 10:30), ngem saan a masigurado ti eksakto a disso a saklawna.