MEMUCAN

Ti panguluen a pannakangiwat maipaay iti pito a Medo-Persiano a prinsipe iti daydi panagkedked ni Vasti nga agtulnog ken Ari Asuero. (Est 1:13-15) Sigun ken Memucan, saan laeng a nakaaramid ni Vasti iti dakes iti biang ti ari no di pay ket kadagiti prinsipe ken kadagiti umili iti imperio, ngarud rebbeng a maikkat kas reyna, tapno amin nga asawa a babbai iti imperio masursuroda ti agtulnog iti assawada. Ti ari ken ti dadduma pay a prinsipe immanamongda ken Memucan, ket naisurat ngarud ti maysa a naarian a bilin a karaman kadagiti di mabalbaliwan a linteg dagiti Medo ken Persiano.​—Est 1:16-22.

Dagitoy a “pito a prinsipe ti Persia ken Media” ket ‘nalalaing iti linteg ken legal a kaskaso.’ Isuda dagiti kasingedan a mammagbaga ti ari, a ‘situtugawda iti umuna a saad iti pagarian.’ (Est 1:13, 14) Patalgedan ti Esdras 7:14 nga addaan ti Persiano a palasio iti kasta a konseho a buklen ti pito nga indibidual.