BET-REHOB

[Balay iti Publiko a Plasa (Akaba a Disso)].

Nabatad a nagan daytoy ti maysa a bassit nga Aramaeano a pagarian, nalabit nangnangruna a nagaplikar iti kangrunaan a siudad dayta. Iti salaysay maipapan iti panangraut ti 600 a Danita iti siudad ti Lais, nadeskribir ti Lais kas adda “iti nababa a tanap a kukua ti Bet-rehob.” (Uk 18:7, 28) Idi agangay, bayat ti tiempo ni David, dagiti Ammonita nangtangdanda kadagiti Sirio a soldado manipud Bet-rehob iti awan nagmamaayanna a panangidepensada iti bagbagida maibusor kadagiti puersa ti Israel. (2Sm 10:6) Kasta met, naawagan laeng iti “Rehob” (2Sm 10:8), ket naipagarup ngarud a dayta met laeng ti lugar a nadakamat kas maysa kadagiti nakadanonan ti 12 a managsimisim nga Israelita iti damo a panangsukimatda iti daga ti Canaan.​—Nu 13:21.

Gapu ta ti Bet-rehob nainaig iti “nababa a tanap” a nagsaadan ti Lais (idi agangay Dan) ken gapu iti sasao iti Numeros 13:21 nga adda ti Rehob iti direksion nga agturong iti “seserkan ti Hamat,” nalabit maysa dayta a disso iti makin-abagatan a paset ti Ginget Beqaʽ, a nagsaad iti nagbaetan ti kabambantayan ti Libano ken ti Anti-Libano. Saan a masigurado ti eksakto nga ayanna.