REHOB

[Publiko a Plasa; Akaba a Disso].

1. Ama ni Hadadezer nga ari ti Zoba nga inabak ni David iti gubat.​—2Sm 8:3-12.

2. Maysa kadagiti Levita wenno inapo ti maysa a nangpatalged iti tulag babaen iti selio idi tiempo da Nehemias ken Esdras.​—Ne 10:1, 9, 11.

3. Maysa a lugar wenno siudad a nadakamat iti pannakasukimat ti Canaan babaen iti 12 a Hebreo a managsimisim nga imbaon ni Moises. (Nu 13:21) Nalabit isu met laeng ti lugar a “Rehob” ken “Bet-rehob” a nadakamat iti 2 Samuel 10:6, 8.​—Kitaenyo ti BET-REHOB.

4. Ti nagan ti maysa wenno nalabit dua a siudad iti teritoria ti Aser. (Jos 19:24, 28, 30) Nupay ibilang ti dadduma nga eskolar a maymaysa a siudad ti ipasimudaag ti dua a pannakatukoy ti Rehob, ngem ipakita ti dadduma a nainaig a teksto a nagduma dagitoy a disso. Gapuna, kunaen ti Uk-ukom 1:31, 32 a “ti Aser saanna a pinagtalaw dagiti agnanaed iti . . . Rehob,” iti kasta napilitan dagiti Aserita a makipagnaed kadagiti Canaanita nga adda iti daga, idinto ta kunaen ti Josue 21:27, 31 ken ti 1 Cronicas 6:71, 75 a ti Rehob ket naited iti annak ni Gersom (Gerson) kas maysa a siudad dagiti Levita. Dagidiay mangibagbaga a maymaysa laeng a disso ti matuktukoy ket ibilangda a ti nadakamat a panangpatalaw kadagiti Canaanita manipud Rehob ket nalapdan idi damo ngem napagtalawda met laeng kamaudiananna, iti kasta nakapagyan met laeng sadiay dagiti Levita. Sigun kadagidiay mangibagbaga a nagduma dagitoy a disso, ti maysa nga ili ket nagtalinaed iti im-ima dagiti Canaanita, idinto ta ti sabali pay ket karaman kadagidiay kinautibo ti Aser idi damo ken naited kadagiti Levita. Maipapan kadagitoy a disso, kunaen ti dadduma a ti Rehob iti Josue 19:28 ket isu ti Khirbet el-ʽAmri, agarup 4 km (2.5 mi) iti amianan a daya ti Aczib; kasta met a kunaenda a ti Rehob iti dadduma pay a teksto ket isu ti Tell el-Bir el-Gharbi (Tel Bira), agarup 10 km (6 mi) iti daya nga abagatan-a-daya ti Acco. Daytoy naud-udi a disso ti anamongan dagidiay mangibagbaga a tumukoy ti nagan iti maysa laeng nga ili.