Posible nga Agbalinka a Naragsak iti Laksid ti Pannakaupay

SIASINO ti di pay pulos naupay? Kinapudnona, uray ti nailangitan nga Amatayo a ni Jehova a Dios, napasaranna met ti saem ti pannakaupay. Kas pagarigan, inispalna dagiti Israelita manipud iti pannakaadipenda idiay Egipto ken sipaparabur a binendisionanna ida. Kaskasdi a kuna ti Biblia: “Maulit-ulit a subokenda ti Dios, ket pinasakitanda uray Daydiay Santo ti Israel.” (Salmo 78:41) Kaskasdi, ni Jehova ket kankanayon a “naragsak a Dios.”​—1 Timoteo 1:11.

Kinapudnona, adu ti mabalintay a pakaupayan. Iti laksid dagita, kasanotay a mataginayon ti kinaragsaktayo? Ania ti masursurotayo iti pamay-an a panangtaming ni Jehova kadagiti makapaupay a kasasaad?

Dagiti Pakaupayan

“Ti tiempo ken di mapakpakadaan a pasamak” mapagteng kadatayo amin, kuna ti Sao ti Dios. (Eclesiastes 9:11) Agleddaang ken maupaytayo no adda kellaat a rumsua a krimen, aksidente, wenno sakit. Kuna pay ti Biblia: “Ti inanama a maitantan pagsakitenna ti puso.” (Proverbio 13:12) Maragsakantayo unay no adda banag nga in-inanamaentayo, ngem no ditay met laengen magun-odan wenno maragpat dayta, mabalin a mariknatayo ti nakaro a pannakaupay. Kas pagarigan, ni Duncan,a a pakaragsakanna unay ti agmisionero ket masapulen nga agawidda nga agassawa kalpasan ti adu a tawen a panagserbida kas misionero. “Idi pay la a nariknak a kasla awanen a pulos ti panggep ti biagko,” kinunana. “Awanen ti kalatko. Kasla awanen ti serserbi ti amin.” Mabalin nga agpaut ti pannakaupay, kas iti narikna ni Claire. Inlawlawagna: “Pito a bulan ti sikogko idi maalisanak. Nabayag daydin, ngem agingga ita, no adda ubing nga agpaset iti plataporma, mapanunotko a kasta met koman ti kadakkel daydi anakko.”

Nasaem met no adda mangupay kenka, a kas koma no isinanaka ti nobio wenno nobiam, agsinakayo nga agassawa, agrebelde ti anakmo, adda kaduam a nangtraidor kenka, wenno adda gayyemmo a dina man la ammo ti agyaman. Yantangay agbibiagtayo a kadua dagiti imperpekto a tattao ken iti narigat a tiempo, mabalin a maupaytayo iti aniaman a kanito.

Mabalin a maupaytayo met gapu kadagiti pannakapaaytayo. Kas pagarigan, mabalin a mariknatayo nga awan serserbitayo no ditay makapasa iti eksamenasion, ditay makastrek iti trabaho, wenno no ti maysa ket dinatay masursuro nga ayaten iti laksid dagiti panangikagumaantayo. Maupaytayo met no ti maysa a patpatgentayo ket saannan nga itultuloy ti rumang-ay kas Kristiano. Kuna ni Mary: “Kasla nakasingsingpet met idi ti anakko. Impagarupko a nasayaat ti ulidan nga impakitak kenkuana. Ngem idi simiasi ken Jehova a Dios ken kadagiti pagalagadan ti pamiliami, nariknak ti naan-anay a pannakapaay. Uray naballigiak unay iti dadduma nga aspeto ti biag, saanda a makaanay a mangep-ep iti nakaro a pannakaupayko.”

Kasanotayo a madaeran dagita a pakaupayan? Tapno masungbatan dayta, usigem ti ulidan ni Jehova iti panangrisutna iti pakaupayan.

Ti Solusion ti Ad-adda a Panunotem

Ni Jehova a Dios siaayat a pinaraburanna ti umuna nga agassawa, ngem dida nangipakita iti panagyaman ket simmukirda. (Genesis, kapitulo 2 ken 3) Kalpasanna, nangrugi a dumakes ti kababalin ti anakda a ni Cain. Nupay pinakdaaran ni Jehova, pinapatay ni Cain ti mismo a kabsatna. (Genesis 4:1-8) Mapanunotmo kadi no kasano kakaro ti pannakaupay ni Jehova?

Apay a naragsak latta ti Dios iti laksid dayta a pannakaupayna? Agsipud ta pinanggepna a punnuen ti daga kadagiti perpekto a tattao ket ibambanagna latta dayta. (Juan 5:17) Maitunos iti dayta, nangipaay iti daton a pangsubbot ken nangipasdek iti Pagarian. (Mateo 6:9, 10; Roma 5:18, 19) Saan a ti parikut, no di ket ti solusion ti nangnangruna a pinanunot ni Jehova a Dios.

Iparparegta kadatayo ti Sao ti Dios a dagiti positibo a banag ti nangnangruna a panunotentayo imbes a dagiti naglabas a pannakapaay. Kunana: “Aniaman a bambanag a napudno, aniaman a bambanag a serioso a pakaseknan, aniaman a bambanag a nalinteg, aniaman a bambanag a nadalus, aniaman a bambanag a maay-ayat, aniaman a bambanag a naimbag ti pakasarsaritaanda, aniaman ti adda a kinasingpet ken aniaman ti adda a banag a nadayaw, itultuloyyo nga utoben dagitoy a banag.”​—Filipos 4:8.

Umiso a Panangmatmat iti Pannakaupay

Adda dagiti banag a mabalin a kellaat ken nakaro a mangapektar iti biagtayo. Kas pagarigan, mabalin a kellaat a mapukawantayo iti trabaho, iti asawa, wenno kadagiti pribilehio a tagtagiragsakentayo. Mabalin nga agsakittayo, mapukawantayo iti pagtaengan wenno gagayyem. Kasanotayo a madaeran dagiti kasta a panagbalbaliw?

Napaneknekan ti dadduma a makatulong ti panangaramid kadagiti prioridad. Kinuna ti nadakamat itay a ni Duncan: “Napalalo ti pannakaupaymi idi naammuanmi nga agassawa nga agsardengkamin a misionero. Ngem idi agangay, nangipasdekkami iti dua a prioridad: aywananmi ni Nanang ken no kabaelanmi, agtultuloykami iti amin-tiempo a ministerio. No agaramidkami idi kadagiti pangngeddeng, usigenmi no makaapektar dagita kadagiti prioridadmi. Gapu iti dayta, saankami a narigatan a mangaramid kadagiti nainsiriban a desision.”

Agannayas ti adu kadatayo a dagiti negatibo a kasasaad ti ad-adda a panunotentayo no mapasarantayo ti pannakaupay. Kas pagarigan, mabalin a saan a kas iti inanamaentayo ti resulta dagiti panagreggettayo a mangpadakkel iti maysa nga anak, panagbalin a kualipikado iti maysa a trabaho, wenno mangikasaba iti naimbag a damag iti sabali a pagilian. Nalabit a mapanunottayo a napaaytayo. Ngem no kasano a ti makapaupay a rugi ti sangatauan ket saanna a pinaneknekan a napaay ti Dios, saan a makuna a napaaytayo gapu laeng ta saan a dagus a nagballigi ti panagreggettayo.​—Deuteronomio 32:4, 5.

Nalaka nga agsakit ti nakemtayo no adda mangupay kadatayo. Saan a kasta ni Jehova. Idi nakikamalala ni Ari David sana immaniobra ti pannakapapatay ti asawa ti kamalalana, naupay ni Jehova. Ngem nakitana a napasnek ti panagbabawi ni David isu nga intultuloyna nga inusar ni David kas adipenna. Umasping iti dayta, nagbasol ti matalek nga ari a ni Jehosafat idi nakialiansa daytoy kadagiti kabusor ti Dios. Kinuna ti propeta ni Jehova: “Gapu itoy adda rurod maibusor kenka manipud persona ni Jehova. Nupay kasta, adda naimbag a bambanag a nasarakan kenka.” (2 Cronicas 19:2, 3) Nabigbig ni Jehova a saan a makuna a traidor ni Jehosafat gapu laeng iti maysa a biddutna. Iti umasping a pamay-an, ditay mapukaw dagiti gagayyemtayo no liklikantay ti mangipakita iti nalabes a reaksion no agbiddutda. Dagiti gagayyemtayo a mangupay kadatayo kaskasdi nga adda met latta nasayaat a galadda.​—Colosas 3:13.

Mabalin a ditay maliklikan dagiti pannakaupay sakbay ti panagballigitayo. Mabalin a maupaytayo no makabasoltayo. Ngem mabalintay ti mangabaruanan no mangaramidtayo iti umiso ken determinado a tignay tapno makapagbalbaliwtayo. Idi nakaro ti pannakaupay ni Ari David gapu iti mismo a basolna, insuratna: “Narunot dagiti tulangko babaen ti panagasugko iti intero nga agmalem. . . . Ti basolko impudnok kenka [Jehova] iti kamaudianan . . . , ket sika pinakawanmo ti biddut dagiti basolko.” (Salmo 32:3-5) No maamiristayo a ditay naaramid ti namnamaen kadatayo ti Dios, masapul a kiddawentayo ti pammakawanna, agbalbaliwtayo, ken mas determinado nga agtulnogtayon iti balakadna.​—1 Juan 2:1, 2.

Agsaganaka Itan a Mangsango iti Pannakaupay

Awan duadua a mapasarantay amin ti nadumaduma a kita ti pannakaupay. Ania ti maaramidtayo tapno sisasaganatayo? Makapainteres ti nakuna ni Bruno, maysa a nataengan a Kristiano a nagpasar iti pannakaupay a namagbalbaliw iti kabibiagna. Kinunana: “Iti biangko, ti kapatgan tapno madaerak ti pannakaupay ket ti panangitultuloyko iti ar-aramidek idi tapno mapabileg ti relasionko iti Dios. Naammuak no apay nga ipalpalubos ti Dios ti panagtultuloy ti naulpit a sistema. Adun a tawen ti nabusbosko a mangpasinged iti relasionko ken Jehova. Agyamyamanak unay ta pinabilegko ti espiritualidadko. Makaliwliwa ti pannakaammo a tartarabayennak ni Jehova, ket nakatulong dayta tapno madaerak ti panagleddaangko.”

Bayat a pampanunotentayo ti masanguanan, masiguradotayo daytoy: Nupay mabalin a maupaytayo iti bagitayo wenno iti sabsabali, dinatayo pulos upayen ti Dios. Kinapudnona, impakaammo ti Dios a ti naganna a Jehova ket kaipapananna ti “Agbalinakto no anianto ti pagbalinak.” (Exodo 3:14) Gapu iti dayta, agtalektayo a ti Dios ket agbalin iti aniaman a kasapulan a pagbalinanna tapno matungpal dagiti karina. Inkarina a babaen ti Pagarianna, maaramidto ti pagayatanna “kas sadi langit, kasta met iti daga.” Dayta ti makagapu nga insurat ni apostol Pablo: “Kumbinsidoak nga uray ti ipapatay wenno ti biag wenno dagiti anghel wenno dagiti gobierno . . . wenno ti aniaman a sabali pay a parsua saandatayto a kabaelan nga isina iti ayat ti Dios nga adda ken Kristo Jesus.”​—Mateo 6:10; Roma 8:38, 39.

Buyogen panagtalek a mabalintay ti manginanama iti kaitungpalan ti kari ti Dios nga impakaammo ni propeta Isaias: “Adtoy mangparsuaak iti baro a langlangit ken baro a daga; ket dagiti immun-una a banag saandanto a maipalagip, saandanto met a tumpuar iti puso.” (Isaias 65:17) Talaga a nagsayaat ti namnama nga asidegen a mapukaw dagiti amin a pakaupayan!

[Footnote]

[Blurb iti panid 13]

Saan a makuna a napaaytayo gapu laeng ta saan a dagus a nagballigi ti panagreggettayo

[Blurb iti panid 14]

Iparparegta kadatayo ti Sao ti Dios a dagiti positibo a banag ti nangnangruna a panunotentayo imbes a dagiti naglabas a pannakapaay

[Dagiti Ladawan iti panid 15]

Iti laksid ti pagkurkurangan dagiti tattao, naragsak latta ti Dios gapu ta sigurado a matungpalto ti panggepna

[Ladawan iti panid 16]

Makatulong ti panangaramid kadagiti naespirituan a kalat tapno madaerantayo ti pannakaupay