Saludsod Dagiti Agbasbasa
Sadino ti Pakapasamakan ti Gubat ti Armagedon?
Awan ti espesipiko a disso a pakaaramidan ti gubat ti Armagedon. Imbes ketdi, mapasamak dayta iti intero a daga. Apay? Agsipud ta adu unay dagiti kameng ti dua nga agkalaban a dasig ket awan ti maymaysa a lugar a makalaon kadakuada amin.
Ti Armagedon, wenno Har–Magedon, ket maawagan met kas “gubat ti naindaklan nga aldaw ti Dios a Mannakabalin-amin.” Usarento ni Jehova a Dios ti Anakna, ni Kristo Jesus, a mangummong iti maysa a buyot dagiti anghel a manggubat iti nagtitipon a puersa ti amin a nadangkes nga agtuturay ditoy daga. —Apocalipsis 16:14; 19:11-16.
Dagiti puersa ni Satanas maallukoyda dagiti nasion a makiraman iti gubat. Dakamaten ti Biblia ti “ebkas nga impaltiing dagiti sairo” a mapanda “iti ar-ari [agtuturay] iti intero a mapagnaedan a daga, tapno urnongenda ida a sangsangkamaysa iti . . . disso nga iti Hebreo maaw-awagan iti Har–Magedon.” —Apocalipsis 16:14-16.
Kadagiti libro ti Biblia, ti laeng Apocalipsis ti namagpanunot iti kasta unay kadagiti adu a managbasa iti Biblia. Dagidiay mangmatmat a literal dagiti linaon dayta a libro ipatuldoda no sadino ti eksakto a lugar a patienda a pangrugian ti gubat, ket sipsiputanda dagiti mapaspasamak iti aglawlaw dayta a rehion. Ti pagarup a ti Armagedon tukoyenna ti maysa a naikeddeng a lugar ket masarakan kadagiti immuna a Griego a komento maipapan iti Apocalipsis, nga insurat ni Oecumenius idi maikanem a siglo K.P.
Ni John F. Walvoord, dati a presidente ti Dallas Theological Seminary, inyebkasna ti nalatak a kapanunotan dagiti Pundamentalista a klero idi imbagana a ti Armagedon “ti maudin a panagdadangadang dagiti desperado a nasion ken naisentro dayta a dangadang iti Makintengnga a Daya.” Imbaga ni Walvoord a mapasamak ti masanguanan a dakkel a dangadang “‘iti Bantay ti Megiddo,’ maysa a bassit a bantay iti amianan a Palestina iti ungto ti nalawa a katanapan.”
Nupay kasta, ti libro nga Apocalipsis ket saan a maysa a mapa a mangitudo iti literal a lugar a maawagan iti Armagedon. Ibaga dagiti panglukat a sasaona a ti salaysay ket naiparang babaen “kadagiti pagilasinan.” (Apocalipsis 1:1) Nabayagen nga imbaga dagiti Saksi ni Jehova iti publikasionda nga Studies in the Scriptures, Tomo IV: “Ditay namnamaen a literal nga aguummong dagiti tattao iti Turod ti Megiddo.”
No ibataytayo iti historia, ti Megiddo ket mangiladawan iti maysa a kasasaad a saan a pulos a malibasan dagiti kabusor ti Dios. Gapuna, inton Armagedon, siguraduen ti Dios a mapukawto amin a kinadakes, sadinoman ti ayanda iti daytoy a globo. —Apocalipsis 21:8.
Dagiti managayat ken Jehova a Dios ken iti Anakna, ni Jesu-Kristo, saan a masapul a pagbutnganda ti Armagedon. Ti gubat ti Dios ket maibusor laeng kadagiti tattao nga imbilang ti Dios a nadangkes. Dagita laeng ti dadaelenna. “Ammo ni Jehova no kasano ti mangispal kadagiti tattao nga addaan nadiosan a debosion,” kuna ti Biblia. (2 Pedro 2:9) Maysa a makaparagsak a kari ti kinuna ti Salmo 37:34: “Manginanamaka ken Jehova ket salimetmetam ti dalanna, ket itan-oknakanto a mangtagikua iti daga. Inton magessat dagidiay nadangkes, makitamto dayta.”