Mangikeddengkayo Kadagiti Rasonable a Kalat ket Agrag-okayo

“NAPAAYAK manen!” Namin-anon nga imbagayo ti kasta gapu ta saanyo a naragpat ti inkeddengyo nga aramiden? Mabalin a kasta ti mayebkas ti maysa nga agkabannuag a Kristiano nga ina a napaksuyan a mangas-asikaso iti kappasngay nga anakna ken maupay ta basbassit ti panawenna kadagiti naespirituan a bambanag. Gapu iti wagas ti pannakapadakkelna, nalabit a marikna ti maysa a Kristiano a bassit ti maar-aramidanna ken saanna a maipaay ti amin a kabaelanna iti kongregasion. Mabalin a maladingitan ti nataenganen a Saksi gapu ta limitadon ti maaramidanna kadagiti Nakristianuan nga aktibidad a tagtagiragsakenna idi nakaradkad pay. “No dadduma, makasangitak no mangngegko ti maysa a palawag a mangiparparegta iti panagpayunir,” kinuna ni Christiane, agsipud ta limitado ti maipapaayna a panagserbi ken Jehova gapu iti kasasaad ti pamiliada.

Ania ti aramidentayo no kasta ti kasasaadtayo? Kasano a napatanor ti dadduma a Kristiano ti umiso a panangmatmat iti kasasaadda? Ania dagiti gunggona iti panangikeddeng kadagiti kalat a kabaelan a ragpaten?

Agbalin a Nainkalintegan

Imbaga ni apostol Pablo no kasanotayo a mataginayon ti rag-otayo: “Kankanayon nga agrag-okayo iti Apo. Maminsan pay a kunaek, Agrag-okayo! Ti kinanainkalinteganyo maammuan koma dagiti amin a tattao.” (Fil. 4:4, 5) Tapno maaddaantayo iti rag-o ken pannakapnek iti panagserbitayo iti Dios, nasken a nainkalintegan dagiti namnamaentayo sigun iti kabaelan ken kasasaadtayo. No ipilittayo a gun-oden dagiti kalat a ditay met kabaelan a ragpaten aniaman ti mapasamak, marigatantayo laeng. Iti sabali a bangir, nasken nga agannadtayo di la ket ta pagpambartayo ti pagarupentayo a limitasiontayo ket saantayon nga ikagumaan nga ipaay ti ad-adu pay a tiempo iti Nakristianuan a ministerio.

Aniaman ti kasasaadtayo, kayat ni Jehova nga itedtayo kenkuana ti amin-kararua ken naimpusuan a panagserbitayo. (Col. 3:23, 24) No ditay ipaay ken Jehova ti amin a kabaelantayo, saantay nga itungtungpal ti dedikasiontayo kenkuana. (Roma 12:1) Kasta met, saantayo a masagrap ti pudno a pannakapnek ken rag-o, agraman dagiti nabaknang a bendision nga itden ti amin-kararua a panagserbi.​—Prov. 10:22.

Iti Biblia, ti sao a naipatarus a “nainkalintegan” ramanenna ti panagbalin a nakonsiderasion. Dayta a sao literal a kaipapananna ti “manangpabus-oy.” (Sant. 3:17) Ipamatmat pay dayta a sao ti panagbalin a di unay nainget. No ngarud nainkalintegantayo, natimbeng ti panangmatmattayo iti kasasaadtayo. Narigat kadi nga aramiden dayta? Mabalin a narigat dayta para iti dadduma uray pay no nakonsiderasionda iti sabsabali. Kas pagarigan, madlawtayo a nabambannog ti maysa a nasinged a gayyemtayo gapu ta adu unay dagiti as-asikasuenna. Ditay kadi ikagumaan a tulongan tapno mabigbigna a nainsiriban ti mangaramid iti sumagmamano a panangbalbaliw iti biagna? Umasping iti dayta, nasken a sursuruentayo nga ilasin no adu unayen a trabaho ti ibakbaklaytayo ngem iti kabaelantayo.​—Prov. 11:17.

Nalabit a narigrigattayo a maaddaan iti umiso a panangmatmat kadagiti limitasiontayo no pinadakkeldatayo dagiti nagannak nga addaan iti nangato unay a namnamaen kadagiti annakda. Narikna ti sumagmamano nga idi ubbingda, nasken a kanayon a nasaysayaat pay ti aramidenda tapno magun-odda ti pammateg dagiti dadakkelda. No kasta ti pannakapadakkeltayo, mabalin nga addaantayo iti di umiso a kapanunotan maipapan iti panangmatmat kadatayo ni Jehova. Ngem ti kinapudnona, ay-ayatennatayo ni Jehova gapu iti naimpusuan a panagserbitayo kenkuana. Ti Sao ti Dios ipasiguradona kadatayo a ni Jehova “pagaammona unay ti pannakapormatayo, a laglagipenna a tapoktayo.” (Sal. 103:14) Ammona ti kabaelantayo ken ayatennatayo no sireregta nga agserbitayo kenkuana iti laksid dagiti limitasiontayo. No laglagipentayo a ti Diostayo ket saan nga estrikto a kapatas, makatulong dayta kadatayo nga agbalin a nainkalintegan iti namnamaentayo ken mangbigbig kadagiti kabaelantayo.​—Mik. 6:8.

Kaskasdi, marigatan latta ti dadduma a mangpatanor iti kasta a natimbeng a panangmatmat. No mapaspasaranyo dayta, apay a dikayo agpatulong iti maysa nga aduan iti kapadasan a Kristiano a makaam-ammo unay kadakayo? (Prov. 27:9) Kas pagarigan, kayatyo kadi ti agserbi kas maysa a regular pioneer? Nagsayaat dayta a kalat! Ngem marigatankayo kadi a mangragpat iti dayta? Nalabit kasapulanyo ti tulong tapno mapasimpleyo ti biagyo. Wenno mabalin a pagsaritaanyo iti mapagtalkan a Kristiano a gayyemyo no iti agdama ket praktikal nga aramidenyo a kalat ti ag-regular pioneer iti laksid ti adu nga annongenyo iti pamiliayo. Matulongannakayo a mangtingiting no kabaelanyo nga ibaklay dagiti kanayonan nga aktibidad a kalikaguman ti panagbalin a payunir wenno ania a panagbalbaliw ti masapul nga aramidenyo tapno ad-adu ti magapuananyo. Dakkel met ti maitulong ti asawa a lalaki tapno makita ni baketna no kasanona a maragpat dayta a kalat sigun iti kasasaadna. Kas pagarigan, mabalin nga isingasingna ken baketna nga aginana sakbay a rugianna ti baro a bulan ti ad-adu a panagserbi. Tumulong daytoy kenkuana a maaddaan iti kired ken mangtaginayon iti rag-ona iti ministerio.

Aramidenyo no Ania Laeng ti Kabaelanyo

Ti kinanataengan wenno ti kumapkapuyen a salun-at nalabit limitaranna ti maaramidantayo a panagserbi ken Jehova. No maysakayo a nagannak, nalabit panunotenyo a bassit ti magunggonayo iti personal a panagadal wenno kadagiti Nakristianuan a gimong gapu ta maibus ti kaaduan a tiempo ken pigsayo a mangaywan kadagiti babassit nga annakyo. Nupay kasta, saan kadi a no dagiti laeng limitasionyo ti pampanunotenyo, mabalin a diyonto makita dagiti kabaelanyo nga aramiden?

Rinibu a tawenen ti napalabas, inyebkas ti maysa a Levita ti tarigagayna nga imposible a maragpatna. Isu ket addaan iti pribilehio nga agserbi idiay templo iti dua a lawas iti tunggal tawen. Nupay kasta, inyebkasna ti tarigagayna nga agnaed a patinayon iti asideg ti altar. (Sal. 84:1-3) Ania ti nakatulong iti daytoy matalek a lalaki a makontento iti pribilehiona? Naamirisna a naisangsangayan a pribilehio uray ti maysa laeng nga aldaw a kaaddana kadagiti paraangan ti templo. (Sal. 84:4, 5, 10) Umasping iti dayta, imbes a tarigagayantayo dagiti ditay kabaelan, nasken nga ikagumaantayo a sapulen ken apresiaren dagiti kabaelantayo nga aramiden.

Alaentayo a pagarigan ni Nerlande, maysa a kabsat a babai idiay Canada. Gapu ta naidalit iti wheelchair, tagibassitenna ti maar-aramidanna iti ministerio. Ngem binaliwanna dayta a kapanunotan ket minatmatanna ti asideg a shopping mall kas personal a teritoriana. Inlawlawagna: “Agtugawak iti wheelchair-ko ket agpuestoak iti asideg ti pagtutugawan iti mall. Maragragsakanak a mangasaba kadagiti tattao nga umay agtugaw ken aginana iti apagbiit.” Nangted iti dakkel a pannakapnek ken Nerlande ti pannakiramanna iti kastoy a nagpateg a kita ti ministerio.

Mangaramidkayo iti Panagbalbaliw no Kasapulan

Nalabit nakaparpardas ti bilog bayat nga idurduron ti angin dagiti layagna. Ngem no makasabat ti timonero iti nadawel a bagyo, mapilitan a mangbaliw iti posision ti layag. Saanna a mapasardeng ti bagyo, ngem makaaramid kadagiti panagbalbaliw tapno maiturongna ti bilogna. Umasping iti dayta, masansan a ditay malapdan dagiti arig bagyo a kasasaad nga umapay iti biag. Ngem maiturongtayo ti biagtayo iti kasayaatan a direksion no usarentayo a naimbag dagiti pisikal, mental, ken emosional a gamengtayo. No usigentayo dagiti sumangbay a kasasaadtayo, matulongantayo a mangtaginayon iti pannakapnek ken rag-o iti panagserbitayo iti Dios.​—Prov. 11:2.

Usigentayo ti sumagmamano a pagarigan. No limitado laeng ti pigsatayo, nasaysayaat no liklikantayo dagiti makabannog nga aktibidad iti bigat tapno nakaradkadtayo a tumabuno iti Nakristianuan a gimong iti rabii. Makatulong daytoy tapno naan-anay a magunggonaantayo iti pannakitimpuyog kadagiti padatayo a Kristiano. Wenno no saan a magundawayan ti maysa nga ina ti makiraman iti panangasaba iti binalaybalay gapu ta masakit ti anakna, nalabit a praktikal no awisenna ti maysa a kabsat a babai iti pagtaenganda tapno kaduana a mangasaba babaen ti telepono bayat a matmaturog ti anakna.

No ngay saan nga ipalubos ti kasasaadyo nga adalenyo a nasaksakbay ti amin a mausig kadagiti gimong? Mabalin nga ikeddengyo no kasano kaadu ti kabaelanyo nga isagana ket aramidenyo a naimbag dayta. No baliwantayo dagiti kalattayo sigun iti agdama a kasasaadtayo, makapagtalinaedtayo nga aktibo ken naragsak.

Kasapulantayo ti determinasion ken panagregget a mangbalbaliw kadagiti kalattayo. Da Serge ken Agnès, maysa a pagassawaan idiay Francia, kasapulanda idi ti mangaramid iti dakkel a panagbalbaliw kadagiti planoda. Kuna ni Serge: “Idi naammuanmi a masikog ni Agnès, saanmin a ninamnama a maragpatmi ti kalatmi nga agmisionero.” Ita ta addaanen iti dua a naganaygay a babbalasitang, inlawlawag ni Serge no kasanoda a nangipasdek iti baro a kalat kas agassawa. Kunana: “Gapu ta saanmi a kabaelan ti agserbi iti sabali a pagilian, napanunotmi ti ‘agmisionero’ iti bukodmi a pagilian. Nakitimpuyogkami iti kongregasion a ganggannaet ti pagsasaona.” Nagunggonaan kadi dagitoy nga agassawa iti panangipasdekda iti baro a kalat? Ingngudo ni Serge: “Mariknami a dakkel ti pakaus-usaranmi iti kongregasion.”

Gapu iti osteoarthritis, saanen a makatakder iti nabayag ni Odile, maysa a kabsat a babai a taga-Francia ken agtawenen iti nasurok a 70. Nakarikna iti pannakaupay ta saanen a makakasaba iti binalaybalay gapu iti sakitna. Nupay kasta, saan a simmuko. Binaliwanna ti pamay-an ti panangasabana babaen ti telepono. Kunana: “Nalaklaka ken naragragsak dayta ngem iti ninamnamak.” Daytoy a pamay-an ti panangasaba ti nangisubli iti gagarna a makiraman iti ministerio.

Mangyeg Kadagiti Bendision Dagiti Rasonable a Kalat

Maliklikantayo ti adu a pannakapaay no addaantayo iti umiso a panangmatmat iti kabaelantayo. No rasonable dagiti ikeddengtayo a kalat, mariknatayo nga adda magapgapuanantayo iti laksid dagiti limitasiontayo. Iti kasta, makapagrag-otayo iti maaramidantayo uray bassit laeng dagita.​—Gal. 6:4.

No natimbeng ti panangmatmattayo iti kabaelantayo a ragpaten, agbalintayo nga ad-adda a nakonsiderasion kadagiti padatayo a Kristiano. Gapu ta ammotayo dagiti limitasionda, matignaytayo a kanayon nga agyaman kadagiti maar-aramidanda kadatayo. Mataginayontayo ti panagtutunos ken panagkikinnaawatan no apresiarentayo ti aniaman a tulong nga ipaay dagiti padatayo a Kristiano. (1 Ped. 3:8) Laglagipentayo a kas naayat nga Ama, di pulos kidkiddawen ni Jehova ti nalablabes ngem iti kabaelantayo nga ipaay kenkuana. Ket no nainkalintegan dagiti namnamaentayo ken mangikeddengtayo kadagiti kalat a kabaelantayo a ragpaten, ad-adda nga agrag-o ken mapnektayo kadagiti naespirituan nga aktibidadtayo.

[Blurb iti panid 29]

Tapno maaddaantayo iti rag-o ken pannakapnek iti panagserbitayo iti Dios, nasken a nainkalintegan dagiti namnamaentayo sigun iti kabaelan ken kasasaadtayo

[Ladawan iti panid 30]

Maragragsakan ni Nerlande iti kabaelanna nga aramiden iti ministerio

[Ladawan iti panid 31]

Sursuruenyo a ‘baliwan ti posision dagiti layag’

[Credit Line]

© Wave Royalty Free/​age fotostock

[Ladawan iti panid 32]

Nagunggonaan da Serge ken Agnès iti panangipasdekda kadagiti baro a kalat