Panangasaba Kadagiti Tiendaan
BAYAT ti kaaddana iti siudad ti Atenas, ni apostol Pablo ket inaldaw a mapmapan iti plasa tapno ikasabana ti naimbag a damag maipapan ken Jesus. (Ara. 17:17) Kaay-ayo ni Pablo ti mapan iti plasa ta sadiay ti ayuyang dagiti taga-Atenas.
Agarup 2,000 a tawen kalpasanna, mapmapan pay laeng dagiti adipen ni Jehova kadagiti plasa tapno ipakaammoda ti mensahe maipapan iti Pagarian ti Dios. Apay? Agsipud ta adu ti tao kadagita a lugar. Ita, ti plasa ket mabalin a tiendaan wenno shopping mall. Kalpasan nga agkiddawda iti pammalubos ti manedyer wenno makinkukua iti mall, dadduma a Saksi ket agus-usar iti lamisaan wenno bassit a puesto a pagidispleyanda kadagiti literatura a naibasar iti Biblia.
Kas pagarigan, iti maysa a mall idiay New Jersey, E.U.A., adda puesto a pakakitaan kadagiti makaatrakar ti pannakaidispleyda a literatura. Natemaan dayta iti “Kasano a Mataginayon Dagiti Nasayaat a Kababalin ti Pamilia?” Ania ti resultana? Iti maysa laeng nga aldaw, nakaipaima dagiti kakabsat iti 153 a libro iti innem a lenguahe.
Maysa a babai ti immasideg iti dayta a puesto ket sipapasnek a nagimdeng iti panangasaba ti maysa kadagiti kapammatiantayo. Immanamong dayta a babai a nasken nga ikabilangantayo ti Dios iti biag ken iti pamiliatayo. Nangala kadagiti libro nga Agsursuroka iti Naindaklan a Mannursuro, Ti Sekreto ti Kinaragsak iti Pamilia, ken Dagiti Saludsod nga Iyimtuod ti Agtutubo—Dagiti Sungbat nga Epektibo
Iti malmalem, adda lalaki a limmabas iti nakaidispleyan dagiti literatura ket idi sumrek koman iti paggatangan a kaabay dayta a puesto, napataliaw iti libro a Saludsod nga Iyimtuod ti Agtutubo. Ti maysa a kapammatiantayo nga agbambantay iti puesto nadlawna nga interesado ti lalaki isu nga inyimtuodna, “Adda kadi kayatyo kadagitoy a libro?” Nagtung-ed sana intudo ti libro a Saludsod nga Iyimtuod ti Agtutubo. Inyawat ti kabsat ti libro nga intudo ti lalaki. Bayat ti saritaanda, kinuna dayta a lalaki nga adda tallo nga annakna ket tin-edyeren ti dua kadagita. Nadakamatna a maminsan iti kada lawas nga adda panagsasaritada nga agaama. Bayat a palpalabsanna ti libro, kinunana a nalakana laeng nga usaren dayta kas giya iti panagsasaritada a sangapamiliaan. Impakita met ti kabsattayo ti libro a Ti Sekreto ti Kinaragsak iti Pamilia. Impasigurado ti kabsat a babaen iti dayta a libro, isu ken ni baketna ket makasarak kadagiti makatulong unay a balakad maipapan iti panagaramid kadagiti desision mainaig iti pamiliada. Nagyaman ti lalaki gapu iti dayta, nangted iti donasion, ket immanamong nga isu ken ti pamiliana ket sarungkaranto ti maysa a Saksi.
Ania ti makuna dagiti kapammatiantayo maipapan iti nagmalmalem a panangasabada iti mall? Kinuna ti maysa a kabsat: “Natagiragsakko dayta a wagas ti panangasaba. Nagsayaat a kapadasan dayta!” Kastoy met ti imbaga ti maysa pay a kabsat: “Kuna ni Jehova a ti naimbag a damag ket maikasaba agingga iti kaadaywan a paset ti daga. Ita, ti naimbag a damag ket maikaskasaban kadagiti tattao a nagduduma ti lenguaheda ditoy Paramus, New Jersey. Makaparagsak ti makiraman iti dayta nga urnos. Naragsakkami amin a nakiraman. Dimi pay koma kayat ti agawid uray no rumabiin.”
Kabaelanyo kadi nga ikasaba ti naimbag a damag iti nadumaduma a pamay-an? Ti kangrunaan a pamay-antayo ket ti panangasaba iti binalaybalay. (Ara. 20:20) Nupay kasta, kayatyo met kadi ti mangasaba kadagiti plasa, tiendaan, wenno iti mall?