Umadanika iti Dios
Ukom a Kanayon nga Umiso ti Aramidna
KINAHUSTISIA. Di panangidumduma. Saanka kadi a maay-ayo kadagiti kasta nga agkakaimbag a galad? Nainkasigudan kadatayo a tattao ti tarigagay a maaddaan iti patas a pannakatrato. Nakalkaldaang ta masansan a narigat a magun-odan ti hustisia iti agdama a lubong. Ngem adda Ukom a mapagtalkantayo—ni Jehova a Dios. Kanayon nga umiso ti aramidna. Nabatad daytoy iti pannakisarita ni Jehova kenni Abraham, kas nailanad iti Genesis 18:22-32.a
Idi imbaga ni Jehova kenni Abraham a panggepna a sukimaten ti kasasaad ti Sodoma ken Gomorra, nagamak ni Abraham agpaay iti seguridad ti asinoman a nalinteg a tao nga agnanaed sadiay, a pakairamanan ti kaanakanna a ni Lot. Ni Abraham impakaasina ken Jehova: “Pudno kadi a punasemto ti nalinteg a mairaman iti nadangkes? Kas pagarigan ta adda limapulo a nalinteg a tattao iti tengnga ti siudad. Punasemto kadi, ngarud, . . . ket saanmo a pakawanen ti disso maipagapu iti limapulo a nalinteg nga adda iti unegna?” (Bersikulo 23, 24) Kinuna ti Dios a saanna a dadaelen dagiti siudad no adda uray 50 laeng a nalinteg sadiay. Naminlima pay a nagpakaasi ni Abraham kenni Jehova, nga in-inut a kinissayanna ti bilang agingga iti sangapulo. Iti tunggal pakaasina, kuna ti Dios a saanna a dadaelen dagiti siudad no adda kasta a bilang dagiti nalinteg nga agnanaed sadiay.
Makisupsupiat kadi ni Abraham iti Dios? Saan a pulos! Nakaro a kinatangsit no kasta ti aramidenna. Ipakita ti pannakisarita ni Abraham nga isu ket managraem ken napakumbaba. Tinukoyna ti bagina kas maysa laeng a ‘tapok ken dapo.’ Namimpat a sidadayaw a kinunana, “pangngaasim.” (Bersikulo 27, 30-32) Maysa pay, ipakita dagiti sasao ni Abraham ti panagtalekna a saan a mangidumduma ni Jehova. Saan laeng a naminsan no di ket namindua a kinuna ni Abraham a “narigat a pagarupen” a no dadaelen ti Dios dagiti nadangkes, iramanna a dadaelen dagiti nalinteg. Inyebkas ti matalek a patriarka ti panagtalekna a ‘ti Ukom ti intero a daga aramidenna no ania ti umiso.’—Bersikulo 25.
Umiso kadi dagita a kinuna ni Abraham? Wen ken saan. Nagkamali ti pagarupna nga adda di kumurang a sangapulo a nalinteg a tattao iti Sodoma ken Gomorra. Ngem umiso ti imbagana a ti Dios dina pulos ‘punasen ti nalinteg a mairaman iti nadangkes.’ Idi dinadael ti Dios dagita a nadangkes a siudad, naispal ti matalek a ni Lot agraman ti dua a balasangna babaen ti tulong ti anghel.—2 Pedro 2:7-9.
Ania ti maadaltayo iti daytoy a salaysay maipapan ken Jehova? Idi impakaammona ken Abraham ti panggepna a mangsukimat kadagita a siudad, arigna nga ik-ikkan ni Jehova iti gundaway a mayebkas ni Abraham ti kapanunotanna. Kalpasanna, siaanus a nagimdeng bayat nga inyebkas ti gayyemna a ni Abraham dagiti pakaseknanna. (Isaias 41:8) Anian a nagsayaat a mangisuro kadatayo a ni Jehova ket napakumbaba a Dios, a raemen ken padayawanna dagiti adipenna ditoy daga! Nalawag nga adda rasontayo a naan-anay nga agtalek ken Jehova, ti Ukom a kanayon nga umiso ti aramidna.
[Footnote]
a Iti dayta a gundaway, maysa nga anghel ti nagserbi a pannakangiwat ni Jehova. Para iti sabali pay a pagarigan, kitaenyo ti Genesis 16:7-11, 13.
[Ladawan iti panid 24]
Nagpakaasi ni Abraham kenni Jehova mainaig iti Sodoma ken Gomorra