Asino ti Dios?
ANIA ti sungbatyo iti dayta a saludsod? Ibaga ti dadduma nga am-ammoda unay ti Dios—nga ibilangda a maysa a nasinged a gayyem. Adda met dagidiay mangmatmat iti Dios kas adayo a kabagian. Patienda nga adda Dios ngem bassit ti ammoda maipapan kenkuana. No mamatikayo iti Dios, ania ti sungbatyo kadagiti sumaganad a saludsod?
1. Talaga kadi a maysa a persona ti Dios?
2. Adda kadi nagan ti Dios?
3. Ni kadi Jesus ti Mannakabalin-amin a Dios?
4. Maseknan kadi kaniak ti Dios?
5. Awaten kadi ti Dios ti amin a kita ti panagdayaw?
No iyimtuodyo dagitoy kadagiti sabsabali, nalabit a nagduduma ti sungbatda. Saan ngarud a pakasdaawan a timmaud ti nagduduma a sarsarita ken di umiso a kapanunotan maipapan iti Dios.
No Apay a Napateg Dagiti Sungbat
Bayat a kasarsaritana iti asideg ti bubon ti maysa a babai a mamati iti Dios, impaganetget ni Jesu-Kristo ti kinapateg ti panangammo iti kinapudno maipapan iti Dios. Daytoy a Samaritana nabigbigna a ni Jesus ket maysa a mammadto. Ngem adda pakaseknanna. Agdumada ken Jesus iti relihion. Idi inyebkasna dayta a pakaseknanna, prangka a kinuna kenkuana ni Jesus: “Agdaydayawkayo iti saanyo nga am-ammo.” (Juan 4:19-22) Nalawag nga insuro ni Jesus a saan nga amin a relihioso a tattao ket talaga nga am-ammoda ti Dios.
Kayat kadi a sawen ni Jesus nga awan ti asinoman a mabalin a mangammo iti Dios? Saan, yantangay intuloy a kinuna ni Jesus iti babai: “Dagiti pudno a managdaydayaw agdayawdanto iti Ama buyogen ti espiritu ken kinapudno, ta, pudno unay, ti Ama sapsapulenna dagiti kasta nga agdayaw kenkuana.” (Juan 4:23) Maysaka kadi kadagidiay agdaydayaw iti Dios “buyogen ti espiritu ken kinapudno”?
Nakapatpateg nga umiso ti sungbatmo iti dayta a saludsod. Apay? Intampok ni Jesus ti kinapateg ti umiso a pannakaammo idi inkararagna: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Wen, ti mismo a masakbayam ket mainaig unay iti panangammom iti kinapudno maipapan iti Dios!
Talaga kadi a posible a maammuan ti kinapudno maipapan iti Dios? Wen! Kasano ngarud a magun-odam dayta? Kinuna ni Jesus maipapan iti bagina: “Siak ti dalan ken ti kinapudno ken ti biag. Awan ti umay iti Ama malaksid no baeten kaniak.” (Juan 14:6) Kinunana pay: “No asino ti Ama, awan makaammo no di ti Anak, ken daydiay kayat a pangipalgakan kenkuana ti Anak.”—Lucas 10:22.
Maam-ammotayo ngarud ti Dios babaen kadagiti pannursuro ni Jesu-Kristo, ti Anak ti Dios. Kinapudnona, inkari ni Jesus: “No agtalinaedkayo iti pannursurok, dakayo dagiti napaypayso nga adalak. Maammoanto ti pudno, ket ti pudno wayawayaannakayto.”—Juan 8:31, 32, Ti Baro a Naimbag a Damag Biblia.
Ania ngarud ti sungbat ni Jesus kadagiti lima a saludsod a nadakamat iti artikulo?
[Ladawan iti panid 4]
Agdaydayawkayo kadi iti Dios a diyo am-ammo?