Saludsod Dagiti Agbasbasa
Poligamia—Anamongan Kadi ti Dios?
Saan; ti pagalagadan nga inted ti Dios idiay Eden iti immuna a pagassawaan ket monogamia. Idi agangay, pinasingkedan manen ni Jesus dayta a pagalagadan kadagiti pasurotna.—Genesis 2:18-24; Mateo 19:4-6.
Saan kadi nga adu met ti assawa dagiti lallaki a kas kada Abraham, Jacob, David, ken Solomon sakbay ti panawen dagiti Kristiano? Wen, ngem kasano ti panangdeskribir ti Biblia iti dayta nga urnos? Ipalgakna a gapu iti poligamia, rimsua dagiti rinnisiris ken susik kadagiti pamilia da Abraham ken Jacob. (Genesis 16:1-4; 29:18–30:24) Idi agangay, nairamanen iti Linteg ti Dios daytoy a bilin iti tunggal ari: “Saan . . . a mangpaadu iti assawa maipaay iti bagina, tapno saan a sumiasi ti pusona.” (Deuteronomio 17:15, 17) Di inkankano ni Solomon dayta a bilin ta nangasawa iti nasurok a 700! Nakalkaldaang ta simiasi ken Jehova ti puso ni Solomon gapu iti dakes nga impluensia ti adu nga assawana. (1 Ar-ari 11:1-4) Nalawag a negatibo ti panangdeskribir ti Biblia maipapan iti poligamia.
Nalabit pampanunoten latta ti dadduma no apay a ti poligamia ket impalubos ti Dios iti ilina. Usigem: Nupay nasken koman a sukatam ti maysa a muebles, napadasam kadin nga inan-anusan pay laeng dayta yantangay saan pay a praktikal a gumatangka iti baro wenno adu a parikut ti rumsua no ikkatem dayta ita? Siempre, nangatngato ti daldalan ken pampanunot ti Dios ngem kadatayo. (Isaias 55:8, 9) Ngem maawatantayo nga addada praktikal a rason no apay nga impalubosna dayta iti sumagmamano a tiempo.
Laglagipem nga idiay Eden, nangikari ni Jehova iti “bin-i” a mangdadaelto a naan-anay ken Satanas. Idi agangay, naibaga ken Abraham nga isu ti agbalinto nga ama ti maysa a dakkel a nasion ken aggapunto iti kaputotanna ti naipadto a Bin-i. (Genesis 3:15; 22:18) Determinado ni Satanas a manglapped iti idadateng dayta a Bin-i. Inkagumaanna ngarud a dadaelen dayta a nagkauna a nasion ti Israel. Masansan a sinulisogna nga agbasol ti Israel tapno mapukaw dayta a nasion ti anamong ken salaknib ti Dios.
Tapno maliklikan ti Israel dagiti palab-og ni Satanas, maulit-ulit a nangibaon ni Jehova kadagiti propetana a mamakdaar iti ilina no mangrugidan a sumiasi iti nalinteg a pagalagadanna. Nupay kasta, nasaksakbay nga ammona a ti ilina ket masansan a sumukir uray kadagiti kasimplean a bilin kas iti panangliklik iti idolatria. (Exodo 32:9) No marigatanda nga agtulnog iti kasta kasimple a linteg, anianto laengen iti linteg a maibusor iti poligamia? Gapu ta naan-anay nga ammo ni Jehova ti pakabuklan ti tao, nakitana a saan pay a tiempo nga iparitna dayta a nabayagen nga ar-aramidenda. No imparitna dayta idin, linaklaka la koma ni Satanas a sinulisog ti Israel nga agbasol.
Adda dadduma pay a pagsayaatan ti temporario a panangipalubos ti Dios iti dayta. Gapu iti poligamia, alisto nga immadu dagiti Israelita. Nakatulong ti dakdakkel a populasionda tapno agtalinaed ti nasionda agingga iti idadateng ti Mesias. Gapu iti poligamia, uray kaskasano ket nasalakniban met ti dadduma a babbai ta naaddaanda iti pagtaengan ken sangakabbalayan bayat dagiti napeggad a tiempo.
Ngem laglagipenyo a saan a ni Jehova ti namunganayan dayta nga aramid. Impalubosna dayta iti sumagmamano a tiempo bayat a siiinget a nangipaay kadagiti pagannurotan tapno malapdan dagiti panagabuso. (Exodo 21:10, 11; Deuteronomio 21:15-17) Idi inkeddeng ni Jehova a pagpatinggaenen ti poligamia, inusarna ti mismo nga Anakna a nangpasingked manen iti inyussuatna nga urnos ti panagasawa idiay Eden. Imparit ngarud ni Jesus ti poligamia kadagiti pasurotna. (Marcos 10:8) Idi agangay, ad-adda pay a limmawag daytoy a kinapudno: Nasayaat ti Linteg ni Moises idi tiempo dayta, ngem nasaysayaat “ti linteg ti Kristo.”—Galacia 6:2.